4
1 बोगवानाह एने मसी यीशुन उपस्थिती माय जो जीवतालान एने मुरेलान दुयून नियाव केरी, एने राजा बोणीन राज केरने आवी गोवा मानेन मी विन्ती केरथु।
2 काय तु वचनान पारचार केर, टेम माय एने बिगेर टेम माय तियार रे, आखी बातीन सेहणे माय एने हिकवोण हेऱ्यो उत्साह आपीन जोर दे, एने दोपकाव एने सोमजाड़।
3 काहाकाय ओहलो टेम आवी जेवी माणहे खेरलो हिकवोण नाय वेठ सेकती ता फोक्तो सोताह समादान जुड़ी ओहल्यु वातु काना केरीन होमेलनेन केरता आपणा लोब लालुसान गेत आपणी केरता जुलूम होवटा मास्तेर्याह टोलीव लेती।
4 एने तान कान खेरायीन उगे रेन फेरवीन काल्पनीक वार्ता पोर लागाड़तेह।
5 पुण तु आखी परीस्थिती माय सोताह ताबाम मेल दुख विस, हाजाली खोबरीन पारचार ने काम केर, एने तारी सेवाह पुरी केर।
6 काहाकाय एवी मारो अर्पण ईथे, एने माहु ज्यो जीवणो सोड़ीन जाणेन टेम आव लागेल हे।
7 मी हाजी दोवोड़ दोवेड़ लीदोह, मारो दोवड़नो मी पुरो केर लियेल हे, एने बोरहान राखवाली मी किरेल हे।
8 एवी ओंगाण मार केरता नियाव तो मुकूट मेल रिनोह, मालीक जो देरमी एने नियाव केरनार हे, ते दिह माहु आपी, एने माहु ओलोस नाह, पुण ता आखान केरता जा तान आवणेन मोंगाल्लो जाणतेह।
व्यक्तिगत खुबेर
9 तुवाह एय तोलोक उतवाल्योह मार फाय आवणेन कोसीत केर।
10 काहाकाय देमास ज्यी दुनियाह मोंगाल्ली जाणीन माहु सोड़ दिनोह, एने थिस्सलुनिक्यो माय जात रिनोह। क्रेसकेंस गलातीयाम एने तीतुस दलमतीया माय जात रिनोह।
11 लुका ओलोस मार हिऱ्यो हे। मरकुसाह लेन आवती रे; काहाकाय सेवान केरीन तो मार केरता जुलूम मोदेक केरनार हे।
12 तुखीकुसाह मी इफिसुस माय मुकलेल हे।
13 जेवी तु आवहे तेवी मार डेगलो जो मी त्रोआसाम करपुस फाय मेलीन आयेल हे, ताह एने पुस्तेक खास केरीन लेखणेन केरता चामड़ान पोत्रो लीयावजे।
14 आलेकजांडर ताम्रकार माहु जुलूम नुकसान पोचाड़ेल हे, मालीक तान कामान गेत ताह बुदलो आपी।
15 तु बी ताह रेन जोगवीन रे, काहाकाय तो आमरी वातुन जुलूम विरोद किरेल हे।
16 पेल्ली वार मार जापाप आपणेन टेम माय मार उगे कुणूस नाह एतो, पुण आखा माहु सोड़ दियेल एता। हाजो एय काय ताह ज्यान लेखो आपणे नाय पोड़ी।
17 पुण मालीक मार मोदेक ने केरता मार हिऱ्यो उब रिनो, काहाकाय मार द्वारे पुरो पुरो पारचार एय एने आखा देसान माणहे होमेल लेय केरीन तो माहु ताकेत आप्यो। एने माहु मोतीन डेंडाह रेन सोड़वेल।
18 मालीक माहु आखा खाराब कामाह रेन सोड़ीव लेय, एने तान हेरगान राज माय होमालीन पोचाड़ी। तान जेलेम बोड़ाय एते रेय। आमेन।
बोरकेत
19 प्रिस्का एने अक्विलाह एने उनेसीफुरूसान गेराणान माणहाह नमस्कार।
20 इरास्तुस कुरिंथीयो माय रेय गीयोह, एने त्रुफिमुस दुखाऱ्यो एय गीयोह ताह मी मीलेतुस माय मेलीन आवोह।
21 ईवालो आवणेन पेल मार फाय आवणेन कोसीत केर। युबूल एने पुदेस, एने लीनुस एने क्लोदिया, एने आखा विश्वासी बायाख नमस्कार।
22 मालीक तार जीवा हिऱ्यो रेय। एने तुमू पोर बोगवानान गीण एती रेय।