ECHOS
Ich Jesuucha jʉr autarr khʉʉnag Ẽwandam Akharau nem waupimarr ag nem ĩgkhaa
Chi phãtarr. Mʉg libro gaai nacharam versículo oonaa Lucas 1:1-4 gaaijã ookhiin, ich ag wounagpaita phãnaa deepʉ̈i sim, merag chukhu sim. Ajapcharan Lucas gaai Lucaau jöoi Teofiloog nacha ichdëu jaaum ig sĩerrpai jaaupʉ̈ijim, ich Jesuucha nem wau nʉrrarrma. Maimua mʉg Echos gaaita deeu ũwaai jaaubaadëmua jũrr chi Jesús thõopʉ̈iwi ich Aai aar matarr khur ya amach ap paaukhawi i dʉ̈i wënʉrrarr khʉʉnau nem waumatarr jaau sim. Ich Jesús ʉ̈gthar maagpamua jaauwai, irua ich jũrr Ẽwandam Akhaar pʉ̈ibarm jua theegauta amag nem khĩir pogkhe waupiju arr aawai, chadcha ag juapaau nem waumatarrta jöoi Teofiloog jaaupʉ̈i sim, Lucaau.
Khan jawaag ajĩ.
1. Jãga Jesús iek durrpierr aaidʉmajĩ: Mag chi ʉ̈kha nʉm khʉʉn gaai Ẽwandam Akhaar phẽs aicheewai, ag dʉ̈ita amach jierrnemkha aaidʉjierram. Ich Ẽwandam Iewaa agtha amach dʉ̈icha khitaawai jaautarrjö, Jerusalenmua jaauphöbaaderr, Judea durrjã jaaunaa, khĩrab Samaria eem magwe jajawag wëtumua amach durr eemua öbërdʉtkhawi, amach meeun khabam eem magwe Antioquiapienagpa Siria durr ee jaaumajierram. Mag nʉm ee Pabloou warag jaaubaadëm gaaimua griegonaan eemua Romapien eepa aaidʉ jöisijim. Magʉm ĩs chará durrpierrta aaidʉ wëjöm, maach eepa.
2. Jãga aajeejĩ Ẽwandam Akharau ich juapá chi ʉ̈kha durrarr khʉʉnag deemamua: Amach eepai khaigba aadëp aawai nem wauju khaugbam aigjã Ẽwandam Akharauta khĩirjug deejeejim. Ich Ẽwandam Akharau mag amag jaau wai nʉrrarr aawaita khapan khaba narr ee ewag paawai ʉ̈u ʉ̈kha durrum khʉʉn khapaana aphöbaadëjim. Magbaadëm gaaimua warr sĩi õor amach meeun appai khĩet nʉnʉidʉmjö atarrjã Cristo gaaimua ãbam khodkha nʉisijim.
3. Chijã khʉʉnauta maach peerdʉajem iek durrpierr aaidʉpʉ̈ijierrá: Mʉg libro gaai peer jãrrchapaím Pedro appai jaau sim (caps. 1-12); maimua cap. 13 aigmua atagta khĩeb ö nʉm aar Pablo phidag jaau sim.
1
Ẽwandam Akhaar pʉ̈iju Jesuu jaautarr
1 Jöoi Teófilo, ¿jãgpai chirʉ́? Pʉch khapeer ajapham Lucaauta pʉrʉg mʉg ẽsap phã deepʉ̈i chirʉm.
Nacharam ẽsap phã deepʉ̈itarr gaai mua pʉrʉg jaau chirajim, Jesuu warrcha ich phidkhabaadeewaiwe nem waunaa jaaujerr aigmua khĩeb i ʉ̈gthar matarrpa.
2 Mua pʉrʉg jaau chirajim ĩchab, mag ich Jesuu ʉ̈gthar maju nawe, Ẽwandam Akharau ichig jaaupibaawai, jũrr irua ich dʉ̈i ogdʉba wënʉrramkhĩir ichdëucha jʉr autarr khʉʉnag, jãga amau nem wau wënʉrraju a jaau pʉatarr.
3 Na mʉchdëu pʉrʉg jaau chirarrjö, makhʉʉn mag ichdëucha jʉr autarr khʉʉnagta õrau i juau thõowi deeu iiu phiidʉtarr khurjã dau daau öbërchëwi ich oopiejeejim aajem, chadcha ich iiu chirʉm khap amkhĩir. Cuarenta días nʉm ee ich mag ich oopiejeejim aajem. Mag ich oopi simua, jãga Ẽwandamau õor ich dënkha auwia ichta am Pörkhaajẽ a jaaujeejim aajem amag.
4 Mag ichdëu doce jʉr autarr khʉʉnag ich oopipikham jaarta ĩchab amag Jerusalén phöbör eemuajã chawag wëtpiba jaaumamua amag, —Mua pãrag jaaujeejimgui ajim anʉm, mʉ Ayau pãar athee ich Akhaar pʉ̈iju. Magtarr aawai mʉg phöbör eemua chawag wëtba, mʉigpai nʉbat ajim anʉm, ichdëu chadcha pãrag ich Akhaar dee nʉm ora.
5 Juanaun chadcha dödamaupaita õor pör choojeejim, mamʉ mʉgtarr khur pömcha khaba nʉm ee, jũrr Ẽwandamau ich Akhaarta pãrag deejugui ajim anʉm. Mag ich Akhaar deebarmuata, chadcha pãar pör choo chaar pör choo nʉisijugui ajim aajem Jesuu amag.
Teófilo, maach Pör Jesuu mag iekhatarr aawai, chadcha ichdëu iekhatarrjö, jãga mag Ẽwandam Akhaar bëejĩ a khap amkhĩirta ĩs mua deeu pʉrʉg mʉg ẽsap phã deepʉ̈i chirʉm. Maimua mag bëewi, jãga mag ich Jesuu ichdëucha jʉr autarr khʉʉn ee sĩeichëwi, amag nem waupimarrjã agjö mua pʉrʉg jaaupäaigpam.
Jesús ʉ̈gthar matarr
6 Maan mʉgta ajim aajem:
Mag amau chi Jesús thõowi deeu iiu phiidʉtarr khur ya ãbmiecha ichdëu jʉr autarr khʉʉn dʉ̈i sĩejim aajem. Mag amach aig sĩerr aawai amach garmuata irig, —Señor, marau khap am ig nʉmgui ajierram anʉm, marag jaaubá. ¿Ĩsta pua chadcha chikhamnaan jua eemua maar peerdʉ auwi pʉchta thumaam khʉʉn Pörkhaagpá, maach gobierno chaarcha wai nʉisieg?
7 Magbaawai Jesuu amag magjim aajem:
—Ẽwandam ichta thumaam khʉʉn khãai nem jua theeg simua ichdëupaita magʉm nem thum khap aju arr aawai pãrau chan bʉ̈ʉrjã magʉm khap aju aai khaba nʉmgui ajim anʉm, jãagwaita magju, wa khan edta magju khai.
8 Mag khãai Ẽwandam Akhaar pãach gaai phẽs sĩeichëjuun chad pãrau khaphʉ aju aai nʉmgui ajim anʉm. Mag pãach gaai phẽs sĩeichëm ed pãar jua theeg aphöbaadëmua mua nem waaujerr pãach daúacha oonaa mʉ iek pãach jʉ̈gʉucha ũurjerrjã pãrau õrag jaau nʉrrjëe aju. Nacha mʉg Jerusalén phöbör ee, maigmua Judea durr, Samaria durr, ich mag khĩeb durrpierr jaau wëtumua warp durr chaauram magwe pãrau jaau wënʉrrajugui ajim anʉm amag.
9 Ya ich Jesús mag iekha öbarm ee, sĩi warag ʉ̈gthaa papagmam dʉ̈i jʉʉnthumie baug bëewi sĩi ag ee i meer athamjö abaawai ʉ̈u amau i oo wai durrarrjã warag oohba pamamua chukkhu aadëjim aajem.
10 Mag warag i ʉ̈gthaa papagmam eerpa dʉnʉnʉidʉ nʉm ee, emkhooin numí khajũa bäpphä jũa sĩsidʉmta dëgölp am aig dʉnʉʉutkhachëjim aajem.
11 Mag dʉnʉʉutkhachëwia amag, —Keena, ¿khanta ʉ̈gthaag jãg eerpa dʉnʉnʉidʉ nʉma? aichëjierram anʉm. Jesús ya ʉ̈gthar petabahab. Mamʉ ar jãg pãrau i mam oo naabá; ich jãg pãachdëu oo nʉmjö ũmaai deeu i bëebajupa ajierram anʉm amag, mag chi khajũa bäpphä jũa sĩsid arr khʉʉnau.
Judas jũrr Matías anʉm jʉr autarr
12 Mag amach dʉ̈i ãba sĩewia petam oobaawai, durrdam Olivo Durrsĩ anʉm gaai naawi ich aigpaimua Jerusalenag wëtjim aajem. Mag durrsĩ Jerusalenmua warpcha khaba, peer kilómetro ãbpaím sim aajem.
13 Mag wëtwia phöbör ee paaukhabaimaawai ʉ̈gthaa amach jẽerjem aar ãba biirdʉ nʉisijim aajem. Maig naajim aajem: Pedro, Santiago, Juan, Andrés, Felipe, Tomás, Bartolomé, Mateo, Santiago jöoi Alfeo iewaa, Simón ibʉʉr wauwia Celote a thʉ̈ʉrjem, maimua Judas, woun ãb deeum agjö Santiago anʉm dʉ̈i ãbam khʉʉn.
14 Makhʉʉn amach thum ich mag biirdʉajeejim aajem Jesús eeugpeen dʉ̈i, ich Jesús ãd María maimua dewam ʉʉinpa, ãba mag biirdʉnaa Ẽwandamag jëwaag.
15 Ich mag Ẽwandamag jëwaag am ãba biirdʉdʉkham ed gaai, biek ãb Pedroou tagam khʉʉn agjö Jesús iek ʉ̈kha nʉm khʉʉn khapan ciento veinte nʉm jãrr dʉnʉʉunaa,
16 —Keena ajim anʉm, Jesús gaaimua khodamnaan. Mua pãrag jaaukhimgui ajim anʉm. Jãg maach Pör Jesús imeraa përpʉ̈itarran ichiita ich jãgju aai sĩejim, warrgarwe rey David khararrau Ẽwandam Akharau ichig jaaubaawai ich mag phã pʉarrjö. Chadcha magtarr aawaita õrau maach Pör Jesús pʉr awaan bëewaijã maach khapeer Judas khararrta chi pörkha nʉrrajimgui ajim anʉm.
17 Iin maach eem maach dʉ̈i ãba phidkhaajeejimgui ajim anʉm.
18 Magtarrta ich dau lököo mag Jesús përtarr paar ichig phagtarr phatkhonau jẽb për auwia, mam mawia, ichdëupai ich ö jorrkaawi, pöröu burrwi, bi jurrphë sĩi jʉ̈ãutarrjö apʉ̈ijimgui ajim aajem.
19 Mag ichdëupai wir aig ich thõowia magbarm Jerusalenpienau thum ũrphöbaadeewai mag durr ichdëu për autarr aig “Acéldama” a thʉ̈rjierramgui ajim aajem. Mag am meúa Acéldama aawai maach meúan jũrr “õor thõotarr param jẽb” a simʉu.
20 Judaau magju khaphʉta warrgarwe rey David khararrau Salmos anʉm phã sĩewai i igwia magjim:
“I di atarr di õor parii iseg pʉaju, ag ee joobaju khʉʉn chukhu.” (Sal. 69:25)
Maimua ich ag ẽsap gaai ich Daviiupai ĩchab,
“Deeumua jũrr i phidkhaajerr phidag phidkhaju aai simgui” a phã pʉajim. (Sal. 109:8)
21 ’Magua mua mag chirʉmgui ajim anʉm ich Pedrooupai. David khararrau jaautarrjö chadcha amkhĩir, mʉig maach ee õor nʉm eem ãb maach daumaai jʉr aujugui ajim anʉm, ich daúa Jesús iiu phiidʉtarr ootarr aawai maach ipierr jaaumkhĩir.
22 Mag maadëu jʉr aujuun, ĩchab maachjö Jesús dʉ̈i ogdʉba wënʉrranaa ĩchab warrcha Juan õor pör choomieu Jesús pör chootarr aigmua ewag pawiajã khĩeb ich Jesús ʉ̈gthar ma nʉm ed gaai ich mag maach dʉ̈i ogdʉba wënʉrraajerr khʉʉn eemta jʉr auju aai nʉmgui ajim aajem.
23 Pedroou mag iekhabaawai, aig narr khʉʉnau õor numí thʉ̈r aujierram aajem: Ãb José anʉm, ich ag wounpai Barsabás a thʉ̈rnaa ĩchab ibʉʉr wauwia Justo a thʉ̈ʉrjem; maagwai ãbakhai Matías ajim aajem.
24 Mag numí jʉr auwia Ẽwandamag jëeumamua magjierram aajem:
“Ẽwandam, pʉchdëuta chadcha õor thumaam khʉʉn thãar khaphʉ chitaawai, marau pʉrʉg jëeu nʉm, marag jaaubá” ajierram anʉm, “mʉg numí nʉm aig chijãata pʉchdëu ig chirʉm agá.
25 Ya Judajã ichdëu khaigba arr gaaimua wir aig ich thõobaawai i jũrr pʉch i jaau nʉm phidag maar dʉ̈i ãba phidkhamkhĩir marau deeum ig nʉmgui” ajim anʉm, “maach daumaai.”
26 Mag Ẽwandamag jëeu durrawia mokpör gaai am thʉ̈r numwe phãkhanaa jẽkhʉt barbapäaiwai, chi Matías thʉ̈r phã simta ʉ̈gthaag jẽer khërbaimajim aajem. Magtarr aigmua atag Matías warm khʉʉn once narr dʉ̈i ãba phidkha sĩsijim aajem, Ẽwandam i jaau nʉm phidag gaai.