5
Jesús iek ʉ̈khaawain dich garmuata khaibag thum pödpäaijem
1 Jesuun chadcha Ẽwandamau ich Iewaa ichdëucha pʉ̈itarr aawaita i dʉ̈i ãba sim awia au sim wounan magan ya Ẽwandam chaairau. Magbarm aig agjö tagam khʉʉn Ẽwandam chaainkha nʉm khʉʉnaujã agjö i khõsi aju aai nʉm. ¿Jãgwi? Chi Aaijã khõsi naawaima; pöd chi Aai appai daupiinaa chi chaain khõchkhaba aju aai khaba nʉm.
2 ¿Jãga mag maadëu i chaainkha nʉm khʉʉnjã khõsi nʉm khap abarju? Chadcha ich Ẽwandamjã daupii naawai irua nem jaau sim ipierraa nem waauwaima. Mag i ipierraa wënʉrrʉmʉn, i chaainjã daupii wai wënʉrraju.
3 Chadcha Ẽwandam daupii nʉm anʉmʉn irua nem jaau sim thum i ipierraa nʉmʉu; mag irua maachig waupi jaau sim nem chan maadëu pödbaju ayaam nem khabam.
4 Thum maach chi Ẽwandam chaainkha nʉm khʉʉnau chan pekaúg ʉdʉʉr dich deeba aajem, dich garmuata pödpʉ̈pʉ̈i aajeewai.
5 Mag maadëu magʉm pekau pöd nʉmʉn, Jesús Ẽwandam Iewaa ich Ẽwandam dʉ̈i ãba sĩerrʉm iek ʉ̈kha wënʉrrʉm gaaimuata mag pödpäaijem.
Ẽwandamau ich Chaai khaugpitarr
6 ¿Pari jãga mag Jesús Ẽwandam Iewaakha sim maadëu khaphʉ nʉ? Jesús pör choo nʉm aig ich Ẽwandamaucha ʉ̈gtharmua jaauwia pakuls gaai ya meemaa aawaijã agjö jaautarr aawaima. Mag nʉm dʉ̈i ich Ẽwandam Akhaar chadcha nem jaaujemuajã khaphʉ apiejem, Jesús chadcha Ẽwandam Iewaakha sim.
7-8 Aragan biek numí ich Chaai ichë sim õrag ich iekcha ũrpijim ʉ̈gtharmua: i pör choo naawai maimua ya thõopʉ̈yaag pakuls gaai i wai naawaijã agjö ũrpijim. Maimua ĩs ewag pawiajã ich ag iekpaita Ẽwandam Akhaar maach thãar ee simuajã khaphʉ apiejem, í chadcha Ẽwandam Iewaakha sim.
9 Mʉig eegarm khʉʉnaujã maachig nem mag aawai maadëu ʉ̈khaajeewai ich Ẽwandamaucha Jesús igwia ich Chaai a jaau sim chará wajapcha ʉ̈khaju aai nʉm, ichdëuchata mag jaau sĩewai.
10 Chadcha chi Ẽwandam Iewaa iekta ʉ̈kha simuan ich thãar ee khaphʉ sĩsim, chadam iekta ichdëu ʉ̈khabarm. Mamʉ mag Jesús igwia ich Ẽwandamaucha i Iewaa a jaau simjã ʉ̈khaba simuan warag ich Ẽwandamta sëunemeg phë sim, irua jaau sim ʉ̈khabam gaaimua.
11 Mag irua maachig jaau sim iekhan, maach ich dënkha auwia ich mag ich dʉ̈i wënʉrrapijuuta jaau sim; pari mag i dënkhanaa i dʉ̈i ich mag wënʉrrajuun, ãba ich Ẽwandam Iewaa gaaimuapaiu.
12 Magua chi Ẽwandam Iewaata ich thãar ee au simʉn ĩchab warreta iiu sĩsiejem, i dʉ̈i ich mag i dënkha nʉrraag. Pari chi Ẽwandam Iewaata auba sim chan agtha i dën khaba sim, i dʉ̈i ich mag iiu nʉrraag. Magʉm khʉʉn pöd i dʉ̈i ich mag nʉrrabam.
Juanau ãbmiecha õor wawitarr
13 Keena, pãar Ẽwandam Iewaa iek ʉ̈khaajem khʉʉnagta mʉg ẽsap phã deepʉ̈i chirʉm, ya pãar i dënkha naawai chadcha pãach i dʉ̈i ich mag wënʉrraju khap amkhĩir.
14 Maadëu khaphʉ nʉm ĩchab, ich Ẽwandamau khõsi simjö maadëu irig jëeuwain irua maach iek ũrb khaba ũurjem.
15 Mag ichig jëeuwai maach iek ũurjem khaphʉ naawai mag jëeubarmjã ya wai nʉmjöta khĩirjuju aai nʉm, chadcha irua deeb khaba deeju aawai.
16 Ãbmua khãijã dich khaperau pekau wau sim oomʉn, i kõit Ẽwandamag jëeuju aai sim; majã juau ogthom khĩmie durr ich barpʉ̈imkhĩirjö Cristo ichaaur nem jaau nʉrraba sim khai mamʉ. Mag i kõit jëeumʉn, Ẽwandamau iiupi auwia ich dënkha auju, ich mag ich dʉ̈i wai nʉrraag. Ẽwandamau pödba aawai khabam, pari pogkha õrau pekau wau nʉm irua chugpaaba aajem, mag amach barpʉ̈imkhĩirjö Cristo iek khaphʉ nʉmta juau ogthom i ichaaur nem jaau wënʉrraawai. Magʉm pekauta wau nʉm kõit chan mua pãrau jëeuju aai nʉm aba chirʉm. Magʉm paran pãrau parta jëeuju, ichiita Ẽwandamau isegju aawai.
17 Nem khaigbam thum pekaukha öbër sim, pari magʉm Ẽwandamau chugpaabapäaiwai khĩmie durr maju arrjã maba aajem.
18 Maadëu khaphʉ nʉm, Ẽwandamta ich Aaikha wai sim woun chan ich mag ich pekau ee nʉrraba aajem, ich Ẽwandam Iewaauchata i thʉa wai sĩewai. Magua dösãtaujã pöd pekau ee thʉ aum iek i thʉ auba aajem.
19 Maadëu khaphʉ nʉm, maach chadcha Ẽwandam dënkha nʉm; pari khaphʉ nʉm ĩchab, mʉg jẽb gaai õor pöm sĩi dösãtauta ich jua eegar phë wai sim.
20 Maadëu khaphʉ nʉm ĩchab, Ẽwandam Iewaa maach ee bëewiata maachig khĩirjug deechëjim, Ẽwandam chaarta wajapcha khap amkhĩir. Mag gaaimuata maachin chadcha ich Ẽwandam chaar dʉ̈ita wënʉrrʉm, pari wajapcharan chi Iewaa Jesucristo dʉ̈ijã agjö naawai mamʉ. Mag Cristota Ẽwandam chaar anaa maach ich mag iiupiejemʉu.
21 Chaaina, ãbmiecha pãrag jaaukhim: Jãg Ẽwandam iek jaau nʉm anʉmjã Ẽwandam iek chaar khabamʉgta ee apiju ẽkhaajem khʉʉn dʉ̈i khĩir khaphʉ abat.
Magdam ajim pãrag jaaum ig chirarr. Ayoo keena,
Juan