15
Sĩi jua sũgba thach khö nʉmuapai chan maach ãrba aajem a jaautarr
(Mr 7:1-23)
Ĩchab Moiseeu phã pʉatarr iek wajapcha ʉʉrkhaajem khʉʉn dʉ̈i Ẽwandam iek jawaag chi machnaan i aig bëejierram. Makhʉʉn Jerusalenmua bëetarr khʉʉn ajim. Mag bëewi irig, —¿Jãgwi pʉ khapeenau maach jöoin i pʉa nʉ? ¿Jãgwi thach khoowaijã jua ʉbata thach khoojẽ? ¿Pãrau khaugba naab jãg ʉ̈u khaba sim? aichëjierram.
Magbaawai Jesuu ĩchab, —¿Khanthee pãraujã agjö Ẽwandamau jaau sim thum ipierraa abanaa sĩi pãach jöoin iita ʉ̈rcha ʉʉrkhaju ẽkhaajerráma? ajim amag. Magnaa amag, ¿Pãrau khaugba nʉ ajim, Ẽwandam iek phã sim gaai jaauwai, “Pʉch aaijã pʉch ãd dʉ̈i jãsenenaa ökhö abá” a sim? Maimua “Ar iwiir ãbmua khãijã ich aai wa ich ãd khãijã thõpnaa ãaukha iekha simʉn warreta thõopʉ̈iju aai nʉm” a sim, ¿majã pãrau khaugba nʉ? ajim amag. Magnaa ichdëupai, Pari Ẽwandamau ich iek gaai mag jaau simta, jũrr pãar iek mag ãbmua khãijã dich ayag wa dich ãdag khãijã, “Pãrau ig nʉm mua wai chirab mamʉ, pöd mua deeju khabam, ya thum Ẽwandam atheem aawai” a iekhaju aai sim anʉm, dich dënnaan dau aug khaugba. Pari pãrau õrag mag jaau nʉm aig, Ẽwandamau nem jaau sim isegnaa jũrr pãach jöoin iita ʉ̈rcha ʉʉrkha naabahab ajim Jesuu, amach khĩircha. Magnaa, Chadcha jãg Ẽwandam iek gayam pãachdëu nem jaaujemjö khaba jũrr ag chaaur nem wau sĩerrjëem khapta Ẽwandamau ich i jaaumie jöoi Isaías khararrag pãach igwia ich iekhatarr iek mʉg phãpijimgui ajim.
Magnaa chadcha ag gayam jaaubaadëmua,
“Pãran, sĩi par iekhaupaita Ẽwandam iek ʉ̈kha nʉm ʉ̈kha nʉm aajemgui” ajim Jesuu amag.
“Pari mag nʉm chan par chadcha thãraucha ʉ̈khabamta mag sĩerrjëem.
Pãach mag nʉm gaaimua pãar thãar chan i dakhajã khaba, sĩi i warpta thʉnʉmgui” ajim.
“Jãg nʉm aiguin parii pãach iphithur pãrau irig jëeuju.
Pãrau jaau nʉmjã sĩi wir aig pãach khĩirjugpaiu; jã i iek khabamgui” ajim Jesuu amag, warrgarwe Ẽwandamau jaautarr igwia. (Is. 29:13)
10 Magnaa õragta eerpanaa, ’Wajapha mʉ iek ũrbat ajim. 11 Maadëu nem parhooba khö nʉmuapai chan Ẽwandam dau na maach ãrpiba aajemgui ajim. Ẽwandam na õor ãrpiejemʉn iekhaju khabam nempa khĩirjunaa iekha nʉmuata õor ãrpiejemgui ajim.
12 Irua magbapäaiwai maach chi khapeenauta irig, —Fariseonaan iek, mag pua magbarm aig, am khĩirta iekhabapʉ̈im aajem anaajim.
13 Magbaawai jũrr ichdëu maachigta iekhamamua, —Oob am iek asekasmiet ajim. Pãrau khaphʉ nʉm, nemjĩir ee phũak khaigbam öbeerwai thʉrrëupäaijem. Ich jãgta ajugui ajim mʉ Ayau am dʉ̈i. Am ichdëu jʉr au sim khʉʉn khaba aawai nemjĩir ajapham eemua phũak chi khaarpa thʉrrëunaa barbapʉ̈imjöta ajugui ajim. 14 Magua, idëu warag khĩuu sĩubat ajim. Jãkhʉʉnan amachjã dau khĩsu nʉmta agjö dau khĩsum khʉʉn jua gaai pʉrnaa ëudʉ arrjem khʉʉnjöta nʉmgui ajim. Pãrau oowai merag chukhu sĩebá, dau khaugba khitʉmua agjö dau khĩsu khitʉm jua gaai pʉrnaa arrkhiin, ãb bʉ̈ëu subaadee amach numwe burrjugui ajim.
15 Magbaawaita maar eem ãb Pedro aajemua irig, —Señor, cha pʉchdëu jaaubapʉ̈im deeu marag wajapha jaaubá; marau pöd khaugba abarmgui ajim irig.
16 Magbaawai Jesuu marag jaaubaadëwia magjim:
—¿Wa pãrau agtha khaugbata nʉwa? ajim. 17 ¿Pãrau khaphʉ naabá, maadëu nem khö nʉm thum maach bi ee mawia chëbapäaiwai deeu chukhu aadeejem? Magua dichdëu thach khö nʉmuapai chan maach ãrba aajemgui ajim. 18 Maach ãrpi nʉmʉn thãar eemua khĩirjug khaigbam iekha nʉmuata Ẽwandam na maach ãrpiejemgui ajim, ya khĩirjunaata iekhamaawai. 19 Nem thum maach khĩirjug eemuata öbër thʉnʉm: khĩirjug khaigbam, õor thõoju, dich õor khabam dʉ̈i khapes aju, dich khaman apha khãijã dich õor dʉ̈ímjö aju, nem jĩgkhaju, sëukhaju maimua chikham ëugar chad khabam iek iekhaju. 20 Magʉm nemeuta chadcha Ẽwandam na õor ãrpiejem. Mamʉ chi machnaanau jaau nʉmjö sĩi jua sũgba thach khö nʉmuapai chan Ẽwandam dau na maach ãrba aajem a jaaujim marag, ich Jesuu.
Canaanpie ʉʉirau Jesuu ich chaai monaauju khaphʉ sĩerr
(Mr 7:24-30)
21 Maigmua igbaadeeu jũrr phöbör numí Tiro Sidón dʉ̈i nʉmʉg petaawai maarjã i dʉ̈i wëtjim. 22 Maimua ya mam paaukhabaimamta, ʉʉi ãb Israel durram khaba Canaanpie ʉʉi mag perás sĩejerrta ääag bëewia Jesuug, —Señor, mʉ ap ʉrrʉm mʉ dau aug khaugbá ajim. Mua khaphʉ ʉmgui ajim, pʉʉta chadcha Ẽwandamau pʉ̈iju aajerrau. Maagwai mʉ chaai monawaagjã pʉ jua theeg sim. Mʉ kha dösãt bënëu baarjemta pʉrʉg monaaubapʉ̈i a ʉmgui aichëjim, irig chaigpamamua.
23 Pari par ũanau mag chaigpa khitʉmjã Jesuu bʉ̈ʉrjã i iek ʉ̈khabajim. Magbaawaita marau irig, —Senõr, ¿jãg pua irig mapi jaaubamma? Ya atcha magaajã marau ũrmapha nʉm. Magbamʉn ich jãg maach ẽudee ääag majuwai anaajim.
24 Pari magbaawai jũrr Jesuu chi ʉʉiragta, —Ẽwandamau mʉ pʉ̈itarran, maach meeun israelnaan sĩi oveja okhoo durrumjö durrum khʉʉn peerdʉ aumkhĩirta mʉ pʉ̈ijim ajim.
25 Pari mag nʉm ee, warag i aigcha bëenaa kanieu phõbkhanaata, —Señor, mʉ ap ʉrrʉm mʉ chaai monaaubapʉ̈i ajim.
26 Magbaa, judionaan khabam khʉʉn chan monaauju khabam awi juau ogthompai chi Jesuu warag, —¿Pua mʉ iekha chirʉm ũrbata sĩ? ajim. Pʉ deeum durram aawai, mua pʉ chaaita nacha monaaukhiin, mua oowai dich chaainag deeju arr panta khecheunaa saakienag deebarmjö ajugui ajim irig.
27 Pari magbaa ũanau dʉ̈i, —Señor, jãan chadaugui ajim. Mamʉ pua oowai, ¿saakienaujã amach pap juasur mes eegar khʉimam khöba aajẽ? ajim. Maagjeewai mʉ Israelpie ʉʉi khaba ʉab mamʉ, ¿pua mʉ chaaijã dau aug khaugbaju khai? Mua khaphʉ ʉm, pua i monaaupʉ̈iju aai simgui ajim irig.
28 Magbaawaita, —¡Jöo! Jãgan chadchata mua pʉch chaai monaauju khaphʉnaata pua ʉ̈kha ʉmgui ajim. Magan chadcha pʉchdëu jaau simjö pʉ chaai monaauju ajim irig Jesuu.
Mag, chadcha Jesuu mag iekhabarm bʉ̈rre chi chaai monakkha aadëjim aajem.
Jesuu õor pöm monaautarr
29 Mag Sidonmua deeu maar bëewia ũwaai mag thʉrrdö pöm sim Galilea aajem igaau naaichëjim, ich Jesús dʉ̈i. Maimua buchag gaai waaidʉwia oo sĩsijim. 30 Mag amach dakhĩir jupbaimaawai õor pöm i aar wëtwi i bigaau phʉʉrbaadëjim. Mag õor pöm thʉnʉm ee i aig aibëemajim: bʉ̈ wëdʉ wëdʉ khithëem khʉʉn, dau khĩsum khʉʉn, bʉ̈dam wa juadam khãijã ãkhãraam khʉʉn, meu meraam khʉʉn maimua tag aaunaan khamor machag khĩirpierr i aig aibëenaa i bʉ̈khʉrr ausĩumaajeejim. Maagwai magʉm thum ichdëu monaaupʉ̈i maajeejim. 31 Amach daúacha mag meu meraa khithëe arrjã ijẽb nʉrrjëe, juadam wa bʉ̈dam khãijã ãkhãraa khithëe arrjã monakha, maimua dau khĩsu khithëe arr khʉʉnpa dau wajapha nʉrrjëem oowia, sĩi õor dauderraa naajim. Mag amachdëu oo nʉm gaaimua maach meeun khabam khʉʉnaupata maach meeun israelnaan Ẽwandamag jëeuphöo thʉnaajim.
Emkhooin appai cuatro mil Jesuu jãogtarr
(Mr 8:1-10)
32 Maimua mag maach ich dʉ̈i ogdʉba wënʉrraajerr khʉʉnagta, —Õor pöm mʉg thʉnʉm mʉ dau ee dau aphʉʉ durrumgui ajim. Ya khãai thãrjup pam am maach aigmua bʉ̈ʉrjã ogdʉba, thachdam khöjujã chukhu nʉm. Ich jãg thach khöba chan mua amach diig pʉ̈imapha chirʉmgui ajim. Ich jãg pʉ̈ikhiin, di aar barba khãijã khʉd ee jãdaúa phʉrëubajupa ajim, ich Jesuu.
33 Magbaawaita marau irig, —Mamʉ mʉg õorjã chuk sim ee, ¿jam maadëu khöju bawaagauma? anaajim, õor pöm mʉg thʉnʉm khöpieg.
34 Magbaawai ich Jesuu marag, —¿Pãrau pan dau kharr wai nʉma? a jëeujim.
Magbaa marau, —Sietepai, maimua ãwarrdamjã ar dau khapan khaba durrumgui anaajim.
35 Magbaawai ichdëu õrag khʉt jupkhapi jaauwia, 36 mag pandam siete narrjã chi ãwarrdam dʉ̈i ãba jua ee phë auwia, Ẽwandamag ʉ̈u ajim anaa thorreubaadëjim. Magnaa maachig ʉapʉ̈imaawai marau jũrr õrag jigmajim. 37 Mag jig phʉʉrdʉdʉgmamua thumaam khʉʉnau amachdëu khöm aig khötarrjã, pan pöm sob thʉnʉisijim. Mag chi sobtarr, thʉbʉt siete marau ipiirkha aujim. 38 Mag ed mag chi thach khö narr khʉʉn cuatro mil naajim, emkhooin appai, ʉʉinjã beerba ni chaainjã beerba. 39 Maimuan chadau õrag wëtpi jaaubaawai agdaujö amach majupierr aaidʉjierram. Mag thumaa ërëubaadeewain chadau, ichjã jap ee waaidʉbaadee, marau i Magadanag arrjim.