จดหมายจาก
ยอห์น
ฉบับตี้นึ่ง
คริสตจักรสมัยยุคแรกยอมฮับว่า ผู้เขียนจดหมายฉบับนี้คือ ยอห์นผู้เป๋นอัครทูต ต้านเขียนจดหมายฉบับนี้เมื่อต๋อนเฒ่าแล้ว กับอยู่ตี้เมืองเอเฟซัส ต้านคงเขียนจดหมายฉบับนี้ขึ้นหละหว่างปี๋ ค.ศ. 85-90
ยอห์นเขียนจดหมายฉบับนี้ไปเถิงหมู่ผู้เจื้อในคริสตจักรต่างๆ ตี้อยู่รอบเมืองเอเฟซัสในแคว้นเอเชีย เซิ่งเขาเป๋นศิษยาภิบาลอยู่ตี้หั้น
ยอห์นเน้นความสำคัญของความฮักในจีวิตของผู้เจื้อ ต้านสอนว่าเป๋นสิ่งตี้สำคัญนักขนาด ตี้ผู้เจื้อต้องฮักกั๋น ต้านก็ได้ตักเตื๋อนผู้ตี้ได้อ่านจดหมายฉบับนี้ว่า เรื่องตี้พระเยซูคริสต์เป๋นพระบุตรของพระเจ้าแต๊ๆ นั้น ก็เป๋นความจริง กับก๋านตี้พระเยซูต๋ายบนไม้ก๋างเขนก็เยียะหื้อคนตังหลายได้คืนดีกับพระเจ้า กับมีความสัมพันธ์กับพระองค์ ยอห์นสอนหื้อหันว่าใผเป๋นผู้เจื้อแต๊ๆ ก็คือ คนนั้นจะยอมฮับว่าพระเยซูเป๋นพระบุตรของพระเจ้า กับใจ๊จีวิตอย่างบริสุทธิ์
1
ถ้อยกำแห่งจีวิต
1 หมู่เฮาขอบอกเรื่องของผู้นึ่ง เซิ่งมีมาตั้งแต่เมื่อเก๊าหัวทีแล้ว เซิ่งหมู่เฮาได้ยิน กับหันมากับต๋า ได้แยงผ่ออย่างละเอียด กับได้หยุบได้ซวามมากับมือของหมู่เฮา คือผู้ตี้ฮ้องกั๋นว่าถ้อยกำตี้หื้อจีวิต
2 เมื่อจีวิตของผู้นั้นมาป๋ากฏ หมู่เฮาก็ได้หัน กับเป๋นพยานบอกหื้อหมู่ต้านฟังเถิงผู้ตี้เป๋นจีวิตนิรันดร์ เซิ่งเกยอยู่กับพระบิดาและได้มาป๋ากฏหื้อหมู่เฮาหัน
3 หมู่เฮาก็บอกสิ่งตี้หมู่เฮาได้หันกับได้ยินนั้นหื้อหมู่ต้านฟังตวย เปื้อว่าหมู่ต้านจะได้มีสามัคคีธรรมกับหมู่เฮา สามัคคีธรรมนี้คือก๋านสามัคคีธรรมตี้หมู่เฮามีกับพระบิดาตึงกับพระเยซูคริสต์พระบุตรของพระองค์ตวย
4 หมู่เฮาจึงเขียนเรื่องหมู่นี้มาเถิงหมู่ต้าน เปื้อหมู่เฮาจะได้มีความจื้นจมยินดีอย่างเต๋มตี้
พระเจ้าเป๋นความเป่งแจ้ง
5 นี่คือเรื่องตี้หมู่เฮาได้ยินจากพระเยซูคริสต์ กับบอกหมู่ต้านหื้อฮู้ คือพระเจ้าเป๋นความเป่งแจ้ง ตึงบ่มีความมืดในพระองค์เลย
6 ถ้าเฮาอู้ว่าเฮามีสามัคคีธรรมกับพระเจ้า แต่เฮายังใจ๊จีวิตอยู่ในความมืด เฮาก็จุกับบ่ได้เยียะต๋ามความจริงแต๊ๆ
7 แต่ถ้าเฮาใจ๊จีวิตอยู่ในความเป่งแจ้งเหมือนกับตี้พระเจ้าอยู่ในความเป่งแจ้ง เฮาก็มีสามัคคีธรรมกั๋น เลือดของพระเยซูพระบุตรของพระเจ้าตี้ต๋ายนั้นก็ซ่วยล้างความบาปกู้อย่างของเฮาจ๋นหมดจ๋นเสี้ยง
8 ถ้าเฮาอู้ว่าเฮาบ่มีบาป เฮาก็จุตั๋วเก่า กับเฮาก็บ่ได้ฮู้จักความจริง
9 แต่ถ้าเฮาสารภาพบาปของเฮา พระเจ้าผู้สัตย์ซื่อกับเยียะในสิ่งตี้ถูกต้องตลอด จะยกโต้ษบาปหื้อเฮา พระองค์จะซ่วยล้างเฮาหื้อหมดใสจากบาปกู้อย่างตวย
10 แต่ถ้าเฮาอู้ว่า เฮาบ่ได้เยียะบาป ก็เต้ากับเฮาอู้ว่าพระเจ้าขี้จุ กับกำสั่งสอนของพระองค์ก็บ่ได้อยู่ในใจ๋เฮาเลย