8
ก๋าจ๊ำอันตี้เจ็ด
1 เมื่อพระองค์เปิดก๋าจ๊ำอันตี้เจ็ดออกมา สวรรค์ก็ดักไปเป๋นเวลาประมาณเกิ่งจั้วโมง
2 แล้วข้าพเจ้าก็หันทูตสวรรค์ตึงเจ็ดองค์ยืนอยู่ต่อหน้าพระเจ้า หมู่เขาได้ฮับแกเจ็ดอัน
3 แล้วทูตสวรรค์แหมองค์นึ่งก๋ำกระถางไฟคำเข้ามายืนอยู่ตี้แต้นปู่จา พระเจ้าได้หื้อเครื่องหอมจ๋ำนวนนักขนาดกับทูตองค์นั้น เปื้อใจ๊เผาถวายฮ่วมกับกำอธิษฐานของคนของพระเจ้าบนแต้นปู่จาคำตี้อยู่หน้าบัลลังก์
4 ควันของเครื่องหอมในกระถางตี้ทูตสวรรค์ก๋ำอยู่นั้นกับกำอธิษฐานของคนของพระเจ้าก็ลอยขึ้นไปหาพระเจ้า
5 จากนั้นทูตสวรรค์เอาไฟจากแต้นปู่จามาใส่ลงในกระถาง แล้วเอากระถางนั้นโจ้งลงไปบนแผ่นดินโลก เยียะหื้อเกิดฟ้าแมบ ฟ้าฮ้องเสียงดัง กับแผ่นดินไหว
ทูตสวรรค์ตึงเจ็ดเป่าแก
6 จากนั้นทูตสวรรค์ตึงเจ็ดองค์ก็ปากั๋นเกียมพร้อมตี้จะเป่าแกตึงเจ็ดอันของเขา
7 เมื่อทูตสวรรค์องค์ตี้นึ่งเป่าแกขึ้น บ่าเห็บกับไฟตี้สูนกับเลือด ก็ตกลงมาบนแผ่นดินโลก เยียะหื้อนึ่งในสามของโลก รวมตึงนึ่งในสามของเก๊าไม้ กับหญ้าตี้เขียวจุ้มก็ถูกไฟเผาไปหมด
8 เมื่อทูตสวรรค์องค์ตี้สองเป่าแกขึ้น มีสิ่งนึ่งตี้ผ่อเหมือนดอยใหญ่ขนาดตี้ก่ำลังลุกไหม้เป๋นไฟ ถูกโจ้งลงไปในทะเล เยียะหื้อนึ่งในสามของทะเลก๋ายเป๋นเลือด
9 นึ่งในสามของสิ่งมีจีวิตในทะเลกับนึ่งในสามของเฮือตึงหมดก็ถูกทำลายไป
10 เมื่อทูตสวรรค์องค์ตี้สามเป่าแกขึ้นก็มีดาวใหญ่แก่นนึ่งเป๋นเหมือนโกมไฟลุกแจ้งอยู่ ตกลงมาจากต๊องฟ้าลงไปตี้นึ่งในสามของแม่น้ำตังหลายกับต๋าน้ำตังหลาย
11 ดาวแก่นนี้จื้อว่า บอระเพ็ด เยียะหื้อน้ำนึ่งในสามขมกับเยียะหื้อคนจ๋ำนวนนักขนาดตี้กิ๋นน้ำนั้นต๋ายไปย้อนน้ำขม
12 เมื่อทูตสวรรค์องค์ตี้สี่เป่าแกขึ้น เยียะหื้อนึ่งในสามของตะวัน เดือนกับดาวต่างๆ ถูกทำลายจ๋นมืดไป เยียะหื้อนึ่งในสามของเมื่อวันกับเมื่อคืนมืดไป
13 ต๋อนตี้ข้าพเจ้าผ่ออยู่นั้น ก็ได้ยินเสียงนกอินทรีตั๋วนึ่งตี้บินอยู่ก๋างอากาศฮ้องเสียงดังว่า “ฉิบหาย ฉิบหาย ฉิบหาย จะมีแก่คนบนโลกนี้ ย้อนว่าทูตสวรรค์แหมสามองค์ก่ำลังจะเป่าแกขึ้นมาแหมแล้ว”