98
Bepaŋ adi mik gineŋ fafaŋeeŋ ninigikuk doktiŋa wou nintilonim
Yahwe adi nemenemek momohi tuguk. Unduŋ doktiŋa indi kap kobuli tominim. Adi saŋiniŋŋiŋ eŋ titiŋŋiŋ uŋgoniŋ wendoogoŋ tiŋa mik gineŋ fafaŋeeguk.
Yahwe adi mik gineŋ fafaŋeeguk wendok agaŋ yohautaguk. Ala Isilaehi metam yahaŋegukneŋ nai uŋaniŋ saŋiniŋŋiŋ tubumintaune metambop nolidi kagiŋ.
Adi mede yofolok tuguk wendoktiŋa helemahelemaŋ Isilaehi yabukahileeŋ bulaniŋgoŋ nadiyemiŋa mu biyabuguk. Kwetkwet metam hogohogok Bepaŋnikdi mikgineŋ fafaŋeeŋ kotigoŋ ninigikuk u agaŋ kaŋ nadidapmaiŋ.
Unduŋ doktiŋa metam hogohogok hidi kap tonadifo Yahwedok timineŋ. Welenadifo kap toŋa Yahwe wou nintiloneŋ.
Gita ulaŋa kap toŋa Yahwe wou nintiloneŋ. Gita ulune medeŋiŋ momooŋ hinek tobek.
Yahwe adi Mapme, doktiŋa bai eŋ manaŋ fedila nadifooŋ baham toneŋ.
Eŋ imeŋgwaŋ tiŋa nemenemek imeŋgwaŋ gineŋ hatiiŋ, hidi gibitaŋ kakalineŋ. Kaŋ kwet tiŋa metam eŋ nemenemek hogohogok kwetfoloŋ hatiiŋ, hidi kap toneŋ.
Ime wapum, ime miiŋ, hidi kohopapa utneŋ. Kaŋ kweboboe heki, hidi Yahwe namanda foloŋ kap toŋa nadifo tineŋ.
Maŋgande, adi buŋa kwetkwet kadoko-dapmawaak. Tiŋa Mapme loloŋnit ila titiŋ didimeniŋ helemahelemaŋ tiŋa metam hogohogok yabudokoluwaak.