4
ATOPAPOTEGARI GE MOKA ATOPATAE EDO ERA AINDA GE AWA
1 Asisi Kotopu mi isaga sira iji ambo be amboda embo nenei awa Keriso gebe ari atae adera. Edo ungo Keriso gebe ari atae edo asisi mi ge busedo ira awa kera ise asisi biae da atopatari awa dengoro adera.
2 Edo ungo ingido ungoda kotari ewa mo rawara edo biae mo rawari awa atae ari ungo ge busari ge awa embo nenei da yei atopatadera.
3 Edo embobo amimi aro jimbari awa awara aera awa atopatadera. Edo ungo mi indari eiawa eiawa indove awa atopatadera. Awarate embo mi indorase sedo awa God mi indari awa isira. Edo embo God da ge awa be gido Keriso gebe edo era awa God ungo umo doio sedo awa indari awa indadera awa dipapa edo ira.
4 Edo rora berari God mi isira awa ewagaewa ra. Edo embo mi mana God mi rora da ro isira awa ujo ae adera te ungo God da yei doio sise indari unemi ititira awa badera.
5 Ainda be awawa eire. God mi ingode indari kumborase sisira awawa kumbuse indari awasedo doio sera.
IESU KERISO DA AGIPO EMBO EWAMEI ARI DA GE AWA
6 Imo ge eiawa nanonamendi da yei atopatadesa awa imo awa Iesu Keriso da agipo embo ewamei na. Edo embo ave iji berari Keriso gebe ari God da ge moka atopatari de da ge awa kotadira embo awa Iesu Keriso da agipo embo ewamei na. Edo embo da ave awodo kotadira awa umo teta indari ewamei indari inge adira. Edo Timothy imone awodo esa.
7 Awarate kiki gebe ae awa ingose ainda be awa kiki awa sadera amimi kondade ari embo God gadi aera. Edo embo tembuse buro ira awa uso tamo awa goroba de atira awarate embo iji berari anumbedo atima ira awa uso tamo awa goroba ae edo ira. Da awodo iji berari ro aso iso tumonda ari awa goroba de atadira awa eio.
8 Edo embo tembuse buro adira awa ewamei na awarate embo ro ari uso tumonda ari awa goroba de atarase adira amone ewamei be ra ainda be awa tumonda ari Keriso da yei amimi kondade iri embo boroko atari ewamei edo ira edo daedo amboda utu da atari ewamei adira.
9 Edo na ro sena amone gebe ra. Edo nango embo berari mi ge eiawa ujo ae orase dipapa ae rate gebe orase dipapa era.
10 Awasedo nango memesi nembodiba burise buro nembodiba edo era ainda be awa nango gebe era God awa wasiri de atira. Edo God embo berari simba edo ira te embo ave umo gebe edo era awa soregedo ira.
11 Edo goroba de da ge eiawa embo da yei atopatio.
12 Edo embo amemi imo awa singa banga awasedo sapo ae adira awa embo ainda ge ingose ta iji berari ge ewagaewa sise atari ewamei atio edo embo dubo buio edo Keriso tumonda ise kotari ewamei de da atio. Edo imo awodo iriroso Iesu gebe ari embobo mi imo gido awa ungo esa da awodo awa adi dipapa adera.
13 Edo embo dada oro gido imo iji berari embo da uworo da God da ge jiwari awa ungoda yei ajigeio. Edo binga ewamei awa minonu seio. Edo God da ge moka awa atopatio. Edo imo awodo iriroso amboda na iso yei da bugadena.
14 Edo God da binga sari embo mi kando inemi badesa ainda ge awa sisera. Edo Iesu gebe ari embobo da gitijigegari embo mamatu mi ungoda ingo iso kopiri da ititero imo iso joda kando awa burisesa. Awasedo kando awa dose teta embo mi riawo doro ambudo ira da awodo.
15 Edo ge eiawa na ro setena awa koteio. Edo iji berari ge da ro sira awa eio iriroso embo mi imo iso tumonda ari goroba de bajari awa gore.
16 Edo imo ro esa awa gido gogo ise edo edo gogo edo atopatio. Edo dose ta iji berari eio ainda be awa imo awodo adesa awa iso soregari awa atae adi aera edo inemi aso God mi embo iso ge ingera awa soregadira.