8
Jesús Toweyi Tiópixki inawak Dios
1 Tlan okachi weyi kijtosneki, tikpiah se tiopixkatlayákanki non kajki ilwikak, Ye ewatok ik iyekma n Totajtsi Dios,
2 Non Tiópixki Ye n Cristo Jesús iwa ompa kichiwa iteki, kan milajka tiopa, non Dios inewia okichijchi iwa amo okichijchijkeh n tlakah.
3 Nochteh n wejweyi tiopixkeh kintlaliah para makitemakakah itla tlamánali iwa tlamíktili para makinchichinokah yolkameh kan artal, yika Jesús noiwa kipia tlan kitemakas imak Dios.
4 Tla Jesús yetoskia itech nin tlaltíkpaktli, amo yetoskia tiópixki, porke ok onkateh tiopixkeh non kinteixpantiah tlamánalteh ijkó kemi tlanawatia n tlanawatílistli.
5 Pero intekih ninteh tiopixkeh, san nejma technextiliah noso itlasekawilo tlan kichiwah nepa ilwikak. Yika ijkuak Moisés kichijchiwaskia n tiopa, Dios okili: “Kuali techkaki, kuali nonkimajmantiaskeh n tiopa, kemi onimitsili nepa kan tepetl. Éx. 25:40
6 Pero n tekitl non Jesús okiseli okachi weyi ke non yejwah okichiwayah, porke Ye axa omotlajtolsentlali itech tlan okachi ipati, iwa techilia tiyetoskeh okachi kuali.
7 Porke tla yetoskia kuali keman sikinika omoyekkajkeh, amo monekiskia mopatlas.
8 Pero Dios okitak n tlakah amo okitlakitayah kemi Ye okinekia, iwa okijto:
Ajsiki tonati ijkuak niktlalis se yankuik tlájtoli
iwan tlakah de Israel iwan tlakah de Judá.
9 Amo nikchiwas kemi onimotlajtolsenka iwa nomowejkatatawah,
n tonati keman onikinmatilanki iwa onikinkixti de Egipto,
porke amo okichijkeh tlan onikinmili makichiwakah,
yika onikinkajka, kijtoa n Toteko.
10 Ye ni tlan ika nimotlajtolsenkawas iwan tlakah de Israel itech nekateh tonatijmeh non sikin witseh, ye ni itlajtol Dios:
Nikintlalis notlanawatilwah itech intlalnamikilis
iwa nikintlalis itech inyolo,
iwa Ne niyetos in Dios
iwa yejwah yetoskeh noaltepetlakawah.
11 Ayakmó monekis aka makimachti se itlakaikni,
nion aka kilis ikni:
—Xikixmati n Toteko Dios—,
porke nochteh nechixmatiskeh,
n kokoneh asta non ya tetajmeh.
12 Iwa Ne nikintlapojpolwis nochi tlan amokuali okichijkeh,
iwa ayik nikinmilnamikis intlajtlakolwah. Jr. 31:31-34
13 Ijkuak Dios kijtoa oksepa inwah nimoyekkawas, kijtosneki ya wewe n tlájtoli non ika omoyekka inwah, iwa tlan ya wewejtitok iwa ya panotok, mach ok wejkawas iwa sannima pojpoliwis.