18
Wetsi n weyi altepetl de Babilonia
1 Satepa ijkuak nochi yopanok, onikitak ok se ángel owaltemoaya de ilwikak ika miak tlanawátili, iwa okitlawili n tlaltíkpaktli ika itlawilnextilis.
2 Iwa chikaktik okijtoaya:
—Yowetski, yowetski n weyi Babilonia, axa ompa yomochachantijkeh n demóniojteh, ompa motlaatiah n espíritus amokualteh, ompa motepajsoltia nochteh n totomeh non tikinkokolia kemi tsojpilomeh.
3 Nochteh n tlaltikpaktlakah yomotlawantijkeh ika imekatanajchiwalis pitsotik. N tlanawatijkeh non tlanawatijtokeh itech nin tlaltíkpaktli omomekatijtinenkeh iwa nin mekatanajsiwatl. Iwa n tlasemankeh de nin tlaltíkpaktli yomotojtomintijkeh íwa.
4 Ijkuakó onikak ok se tlájtoli kan ilwikak non okijtoaya:
—Nomejwah akimeh onomechpejpenki, xikisakah de Babilonia, iwa amo xitlajtlakolchiwakah iwa non mekatanajsiwatl, para amo mawetsi nomopah n tlaijyowílistli non ipa wits.
5 Ijkó kiné, itlajtlakolwah yomonenepanojkeh iwa yoajsito asta ilwikak, iwa Dios nochipa kinmilnamiktos itlajtlakolwah.
6 Xiktlaxtlawikah kemi ye okitlaxtla, iwa xikojpatilikah tlan ye yokitlaxtla. Xikchijchiwilikah se tlaónili ojpa chikaktik non ye okinmoniti oksikimeh.
7 Xiktlaijyowiltikah iwa xikchochoktikah ijkó kemi ye omoweyilijtinemia iwa omopaktijtinenki itech tlan satlawel pitsotik, ken ye okimoliaya itech iyolo: “Nika niewatok kemi se Reina. Ne amo niiknosiwatl, nion ayik nichokas.”
8 Ika noni, san itech se tonati nochi nin tlaijyowílistli wetsiki ipa: mikílistli, neyolkókoli iwa apisotl. Kichichinoskeh ijtik tletl, ken weletini n Toteko Dios, iwa yokitlajtlakolmák.
9 N tlanawatijkeh de nin tlaltíkpaktli akimeh íwa omomekatijtinenkeh iwa omopajpaktijtinenkeh iwa nin mekatanajsiwatl, moyolkokoskeh iwa kichokiliskeh ijkuak kitaskeh n Babilonia sa popokatok.
10 San wejka konitoskeh porke kimawiliskeh makintlaijyowiltikah noiwa, iwa kijtoskeh:
—¡Ay! ¡Ay! ¡Timialma Babilonia non otikatka tiweletini! Porke san itech se ora mopa owetsiko nochi motlaijyowilis.
11 N tlasemankeh de nochi n tlaltíkpaktli chokaskeh iwa kinyolkokos tlan omochi non altepetl, ken ayakmó yetos akin kinkuilis tlan yejwah kinamakah,
12 n oro, plata, tetsitsinteh non tsotsotlakah, perlas, tlakemitl de lino, de seda, non chichiltik iwa mojmorado. Noiwa okatka san miak kuawitl ajwiak, noiwa okatkah tlachijchiwalteh de marfil, de kuawitl non satlawel patio, de bronse, de tépostli iwa de mármol;
13 kanela, ajwiak xiwitl, kópali, mirra, iajwiaka n xiwitl, oktli, aseite, arina iwa trigo. Noiwa okoninnamakayah yolkameh non tlamamah, ichkameh, kabayojteh, karretajteh, iwa asta tlakah non okinnamakayah.
14 ¡Babilonia, nochi tlan moyolo okipaktiaya mach ok ayik tikpias, san semi opojpoliwik nochi tlan kualtsi de te iwa nochi tlan otiktlawelpiaya!
15 N tlasemankeh non omotlaweltomintijkeh ika tlan okwalnamakiltiayah non weyi Babilonia, san wejka konitoskeh ken kimawiliskeh noiwa makintlaijyowiltikah; chokaskeh, moyolkokoskeh,
16 iwa kijtoskeh:
—¡Ay! ¡Ay! ¡Mialma Babilonia! Kualtsi omotaya kemi se siwatl non otlakentitoka ika lino non kuali. ¡Okinmonakiaya itlakenwah non chichiltikeh iwa mojmoradojteh, iwa omochijchiwaya ika oro, ika tetsitsinteh non tsotsotlanih iwa ika perlas!
17 ¡Iwa axa san itech se ora owalpoliwik nochi tlan okitlawelpiaya!
Nochteh non kinnejnemitiah n barkojteh, nochteh non oyayah itech barkojteh iwa nochteh non otekitiah itech weyi atl, san wejka omokajkeh,
18 iwa ijkuak okitakeh n poktli non okisaya itech n weyi Babilonia non otlatlatoka, otsajtsikeh:
—¡Mach okatka ok se altepetl kemi nin weyi altepetl!
19 Iwa omokuatlekonexwijkeh; ochokayah, omoyolkokoayah iwa okijtoayah:
—¡Ay! ¡Ay! ¡Mialma Babilonia! Ika nochi tlan okitlawelpiaya, omotomintijkeh nochteh non okimpiayah inbarkojwah itech weyi atl; ¡iwa itech se ora nochi san owalpoliwik!
20 Xipakikah nomejwah akimeh nonkitlakitah Dios,
akimeh non kateh ilwikak,
ken Dios okipojpolo n weyi altepetl.
Xiyolpakikah nomejwah akimeh non tlapejpénalteh
iwa nomejwah n profetas,
ken Dios yokitlaijyowilti n Babilonia
Ika nochi tlan amokuali yokichi.
21 Ijkuakó se ángel weletini okajkok se weyi tetl, kemi non ika tlakuechoah n molinojteh, okontlamotlak ijtik weyi atl, iwa okijto:
—¡Ijkí chikawak kitlamotlaskeh n weyi altepetl de Babilonia, iwa ayik oksepa kitaskeh!
22 Ayik oksepa motech mokakiskeh makintsotsontokah arpajteh, akatlapítsalteh, noso tlapítsalteh, nion motas aka non matekitito, nion mokakis ijkuyukatok n tetl kan otlakuechoayah molinojteh.
23 Ayik oksepa motech motas maxotlato se tláwili, iwa ayik ok mokakis mailwichiwakah kan monamiktilo, maya motlasemankeh okatkah non okachi okipiayah tomi ipan nin tlaltíkpaktli, iwa nochteh n tlaltikpaktlakah otikinmixtlapololti ika motetlajchiwilis.
24 Porke motech, Babilonia, omajsik inmesso n profetas, inmesso n nochteh akimeh iaxkawah Dios, iwa de nochteh akimeh okintoskatsontekeh itech nin tlaltíkpaktli.