7
Kinmixkuamachotiah n 144,000
1 Satepa, onikinmitak nawi ángelteh non omokejketokah itech n nawi itlatenyowah n tlaltíkpaktli, okitsakuilijtokah n ejekatl non ik ompa owalaya, para amo matlaxojpitsa ixko tlali, nion itech weyi atl, nion kan tlakuaujyo.
2 Noiwa onikitak ok se ángel non owalaya kan ik kisa tonati, iwa okualikaya non ika Dios tlaixmachotiskia. Nin ángel, chikaktik okintsajtsili n nawi ángelteh non okiselijkeh weletílistli para makikojkokah n tlaltíkpaktli iwa nochi tlan onka itech weyi atl.
3 Iwa okinmili:
—¡Amaka xikkojkokah nion n tlaltíkpaktli, nion tlan onka itech weyi atl, nion n wejweyi kuaujmeh, asta matitlamikah matikinmixkuaneskayotikah itekitwah Dios!
4 Iwa onikak okintenejkeh 144,000 non okinmixkuaneskayotijkeh, nochteh non walewatokeh de Israel.
5 Okinmixneskayotijkeh
12,000 iwejkaixwiwah n Judá;
12,000 iwejkaixwiwah n Rubén;
12,000 iwejkaixwiwah n Gad;
6 12,000 iwejkaixwiwah n Aser;
12,000 iwejkaixwiwah n Neftalí;
12,000 iwejkaixwiwah n Manasés.
7 12,000 iwejkaixwiwah n Simeón;
12,000 iwejkaixwiwah n Leví;
12,000 iwejkaixwiwah n Isacar;
8 12,000 iwejkaixwiwah n Zabulón;
12,000 iwejkaixwiwah n José iwa
12,000 iwejkaixwiwah n Benjamín.
Senmiaktikeh otlakentitokah ika intlakeh istak
9 Ijkuak yotlanki onikitak nochi ni, onikinmitak senmiaktikeh tlaltikpaktlakah non ayakmaka oweletia okimpoaya, omoketokah iyakapa n weyi yáyantli iwa iyakapa n Ichkatsi. Yejwah otlakentitokah ika intlakeh istak, iwa itech inmawah okipixtokah siki soyatl; yejwah owalajkeh ik nochteh tlalmeh itech nin tlaltíkpaktli, de nochi familiajteh, iwa de nochi altepemeh non tlatlamantli otlachixtokah iwa tlatlamantli intlajtol okipiayah.
10 Nochteh otsajtsiah chikawak:
¡Totemakixtilis wits de Todios
iwa n Ichkatsi,
Akin ewatok ipan weyi yáyantli!
11 Iwa n weyi yáyantli iwa n tetajtsitsinteh iwa non nawi non yolitokeh, okatkah tlatlajkotiah, iwa nochteh n ángelteh okinyawalojtokah. Ijkuakó nochteh n ángelteh owalmoixtlapachojkeh iyakapa n weyi yáyantli. Okiweyilijkeh Dios
12 iwa okijtoayah:
¡Ijkó mamochiwa!
Matikyektenewakah, matikweyilikah,
iwa matikmatikah Ye ixtlamati
iwa matimotlasojkamatikah inawak,
iwa sanwel Ye kipia weletílistli iwa chikawálistli.
Yika, matiktlakitakah Todios axa iwa nochipa.
¡Ijkó mamochiwa!
13 Ijkuakó seme de n tetajtsitsinteh onechtlajtlani:
—¿Akimeh ninteh non tlakentitokeh ika intlakeh istak, iwa kan walewatokeh?
14 Ne oniknankili:
—Teta, tejwatsi tikmatok.
Iwa Ye onechili:
—Nika kateh akimeh yopanokeh itech n weyi tlaijyowílistli, yejwah yokimpakeh intlakenwah iwa okinmistayaltijkeh ika iesso n Ichkatsi.
15 Yika, kateh iyakapa iweyi iyayan Dios, tlajka iwa n yuak kiweyiliah itech iweyitiopa; iwa akin ewatok ipan weyi yáyantli inwah yetos iwa kimpalewijtos.
16 Mach ok apismikiskeh nion amikiskeh. N tonati ayakmó kintlatis nion kintonalmiktis
17 porke n Ichkatsi, non kajki tlatlajkotiah kan weyi yáyantli, kinmokuitlawis kemi n tlájpixki kinmokuitlawia iichkawah, iwa kinwikas kan améyali non kichiwa se mayolito; iwa Dios kinwajwachilis inmixayo nochteh yejwah.