☰ Veauneke Eta Vinaula 1
VEAUNEKE ETA VINAULA
Puka Laloana Ilelena Luvana
Puka Kanania 'eva Vali Nama'ina Luka eleleia davana mulinai eleleia. Puka kanania laloanai eka ikala 'eva Idume Kabukabuna eta'u veauneke kauta dala bevinaula vaia evaikata, kanaua'i ia deta'u Iesu valina nama'ina deilolo vaia Ielusalemai mai Iudeai mai Samaliai mai kanobata to'onai 'abu vaida kevatai (1.8). Puka kanania 'eva Keliso ena kau 'itota lovata eakuia, kanaua'i Iuda kauta ita viloatai emakavala, inoku namana eao koanai, kanobata kauta eta abiveniai eao. Luka 'eva Keliso ena mauli lovana eakuia kave'i mai ia mulinai deda'a kauta vaka, kanaua'i 'eva Keliso eta'u Dilava ena luva 'ana'i 'ani siako Isalaela kauta evenita davana bounai evamomo'aia kave'i.
Puka kanania'i dava ka namana lovana eakuia kanaua 'eva Idume Kabukabuna ena vinaula, ia e'ovu easi Veauneke kauta kevata, inoku e'ana'ia vaita mai evakula'ilata. Dala kanania'i Vali nama'ina deabiadae, abiveni kauta eta mato 'eva namana. Puka kanania laloanai 'eva veauneke kauta doutamo sisibata, maivaka Petelo mai Paulo eta vinaula devavai luvata vaka doutamo. Petelo 'eva veauneke kauna mai ia 'eva Iesu ebanoia. Beiamo Paulo 'eva sia kanauamo boina. Makavanai Paulo ekula'ila Iesu ena kau bevavaita si'asi'a. Beiamo Iesu ia e'aeia laloanai elalo'udai, inoku da'ala abi kaunai eao Iesu ena vinaulamo evavaita.
Puka Iduvuna Namata
a. Va'olu luva umauna i'oudaena. (1.1 - 26)
1. Iesu ena luva mai luva'ana'i to'ota. (1.1 - 14)
2. Iuda 'abuna iabina ka iabiana isi. (1.15 - 26)
b. Ielusalemai luva umauna i'oudaena. (2.1 — 8.3)
c. Iudea mai Samaliai luva umauna i'oudaena. (8.4 — 12.25)
d. Paulo ena vinaula kau kevatai. (13.1 — 28.31)
1. Ilolo vinaulana kalimana lava'ana'ina. (13.1 — 14.28)
2. Ielusalemai do'u luvaluvana. (15.1 - 35)
3. Ilolo vinaulana kalinama ivaluana. (15.36 — 18.22)
4. Ilolo vinaulana kalimana ivakoina. (18.23 — 21.16)
5. Paulo vabuto'o kauna Ielusalemai, Kaisaleai, mai Lomai. (21.17 — 28.31)
1
Iesu Eluva'ana'i Idume Kabukabuna Besinia Be'asi.
1 Teofilo e, e'u puka makavana laloanai Iesu ena vinaula mai ena vaikabasi emakavala evavai davata, 2 eda'amo ia eabia isi ele'au vutuvutu eda'aia koanai valina boutai aleleta. Asido'o ele'au laloanai, Idume Kabukabuna siavunai ena veauneke ia edilata kauta kevatai vinaula bevavaita vinaulata lovata eaku. 3 Ena ba mulinai, bevamomo'aia ia 'eva emauli dokadoka 'ounai boni vaninavui (40) laloatai ia sibona melala doutamo ena veauneke kau kevatai evala'asia, maivaka kevatai Dilava ena lovia vanuana valina ekava. 4 Melala ka eta miado'u laloanai Iesu luva kanania evenita ediaka, “Ielusalema sia oi bovikania, beia Kama'u eluva'ana'i vaia Idumena Kabukabuna oi bo'imala, luvana kanaua lau oi 'ani a'oumui. 5 Ioane 'eva veiai kau evaidi'uta kabukabu, beia boni vidamo laloatai oi 'eva Idume Kabukabuna ai oi boidi'u kabukabu.”
Iesu Ele'au Eda'a Vutuvutu.
6 Iesu ibanona kauta ita dedo'u koanai ia delavuaia dediaka, “Lovia namana e, vali'u mo kanania'i Isalaela kanobatana ena siavu bovenia 'udai, una?” 7 Iesu eta luva evamuea ediaka, “Kama'u sibona siavunai melalata mai bonita 'ani eva'oluta, oi sia mai emui komolo dava kanania aida bepupulu davana oi boikabasia. 8 Beia Idume Kabukabuna be'ovu oi akamuiai koanai siavu oi boabia, lau vali'u oi bokava odaoda Ielusalemai, Iudea mai Samalia vanuata itoinai, maivaka beda'a mo kanobata to'ona.”
9 Iesu luva kanania eluvavaia mulinai, ia makata umaunai eabia isi ele'au vutuvutu eda'aia deikaia, inoku oli ka ia e'alavua, kanaua'i ia sia deikaia 'udai. 10 Ia vutuvutuai ele'au 'abuna deika 'inia laloanai, komolonai kau lua tubu'a deva'ita devadodota 'eva ia delava basita. 11 Inoku de'outa dediaka, “Kalilea kaumui e. Dava 'ounai nia'i oi olalava oi o'a'ali dae vutuvutu oi oikala? Iesu vali'u kevamuiai eabia isi vutuvutu eda'ala kauna mune'e bemumue be'asi 'eva vali'u ele'au vutuvutu eda'ala oi oikala vitaitanai be'asi.”
Veauneke Kauna Ka Deabia Isi
Iuda 'Abunai.
12 Inoku veauneke kauta Olive lolonai de'ovu deda'a Ielusalema, 'abu kataua viloata eta dau'a 'eva kilomita ka'onamo boina. 13 Ielusalemai deda'adodo koanai deda'a demia vaia lumanai dele'au deda'a aka daiutuna. Kauta kataua vata 'eva katania, Petelo, Ioane, Iakobo, Andelea, Pilipo, Toma, Batolomeo, Mataio, Alepeo nakuna Iakobo, Simona Selote kauna, mai Iakobo nakuna Iuda. 14 Ia boutai 'abu ka'onamoai devaka'ona mai'a'ateta ita mai Iesu sinana Malia mai kadina ita demeamea kevanai kevanai.
15 Melala kanaua'i abiveni kauta 'avaeana boutai sinavu ka luanavui (120) dedo'u, inoku Petelo eko'isi vailatai elavadivo eilolota. 16 Ediaka, “Bo'akala'u e! Puka Kabukabuna luvana be'asi bemomo'ai davana Idume kabukabuna eta'u Davida nutunai Iuda lovana ka 'ani eakuia makava Iesu iabina bedada'a kauta 'eva ia be'ana'ia vaita. 17 Iuda 'eva lai banomai ka, 'olana ia vaka edilaia lai ita lai avinaula ka'ona vinaula kanania laloanai.”
18 (Iuda ena si'avana moninai kano ka etavaia, inoku ua'i e'eko 'olana e'ana'ia, bo'ana epou silina boutai dedouasi mulimuliai. 19 Ielusalemai demia kauta boutai vali kanania deika, kanaua 'ounai kano kanaua vana de'aeia ‘Akeledama’, ita leletai luva kanaua anina 'eva ‘Lala Kanona’.)
20 “'Olana Salamo pukanai 'ani ilelena ediaka,
‘Ena luma 'eva be'avaea.
Sia kau ka ua'i bemimia.’
Sal 69.25
Mune'e eleleia,
‘Ia 'abuna 'eva kau ka
betata'u beabia.’
Sal 109.8
21 Kanaua dainai vali'u 'eva ita viloatai banota ka ekabiaisi. Kau kanaua 'eva Lovia namana Iesu ena da'a to'ato'a itoina eikaia kauna mai 22 Ioane ena vaidi'u kabukabu ai epulu melalanai easimo Iesu ele'au vutuvutu eda'aia koanai ia vaka ua'i kauna ka. Lai ita lai bavinaula ka'ona Iesu ena ko'isi 'udai valina ikavana dainai.”
23 Kanaua 'ounai kau lua deula venita ka beabia isi, ka vana Iosepa vaida de'aea Balasaba mune'e de'aea Iusto, mai ka 'eva vana Matia. 24 Inoku demeamea dediaka, “Lovia namana e! Oni 'eva kau boutai nuata oikabasi, kau katania luana viloatai davana odilala kauna 'eva vali'u bovaikamai. 25 Ia 'eva vidulu mai veauneke vinaulana kanania Iuda evikania vinaulana bevavaia, 'olana Iuda 'eva 'ani eda'aovo ena 'abu umauna eda'aia.” 26 Inoku depunipuni, laloanai va ela'asi 'eva Matia, inoku veauneke kauta 'ouka ka'onamo 'eva eva'ouka luata.
☰