1 Tesalonaika
O bolobolo ke heirin Poul tasir tamata gera tagorong mana tang Kristo i Tesalonaika
O uakikilangana ro bolobolo tasir Tesalonaika
Rone o bolobol i lolono toro Baeboul tar timuhur uelhote. Poul ke bolo tang roon o la tasir tamatang tagorong mani Tesalonika. Inggono ke heir tar uauia tang God teres nitagorong manasin, res uelmalahir, kare teres nitagorong man. Gisina ka tur kauiuir liu tasir god bohoboh, kara kalekinale puk tang God.
Gisina ra uanguangoul tena nitapokisiha Iesu. Gisin e kusempeisir niduh, kara tagorong mana dedempe tang God. Poul ke kula tasisina tar uauaha keip tang God tenas niuangoul. Gisina paka uangoul uadedeil tunis, kara kalekinalentieh. Doh gisina paka uelmalahire tunis.
Inggono song ke longoro tenas nidangatasina tena nitapokisiha Iesu. Inggono ke hire pono tasisin ahik pah ra namanantiehe tasisis ka mat. Ge gisisna pe ahik pahe siauais gete tapokisiha Iesu. Gisina tera turung ueltupara uakikilanga poluk tang Iesu tasisine ra uangoul harah.
Na nitapokisiha Iesu e turung ualutar. Temaeit o tamatang tagorong man i Tesalonaika paka kale uatoro tanikais. Gisina paka kalkalekinale bukbuk kompe.
I lolono toro bolobolo rone:
A meneng uakalahar 1.1
A niuaha tar uatakai 1.2–3.13
A mene uakalahara tar nipileseng tar nitagorong man 4.1-12
A meneng ualatut tena nilaha Kristo 4.13–5.11
Uadohinar menemen 5.23-28
1
Poul e heir tar niuaha tasir tamat i Tesalonaika
*O bolobolo rone o la tur tas Poul mes nu Sailas doh Timoti.
Roono ka bololain tas mais gera uangoul teil tar lotu i Tesalonaika gesir nang God ge Tamagigeig me Iesu Kristo ge nagi Tamata Nomaneig, rasin ura heir tar hamhamas, karo hiarouo tamiuoum.
A niuah teres nitagorong manar tamat i Tesalonaika
Inggeim mi uoto hire tang God pare, mi uaha tun tamiuoum uakapa tun, karing uoto namana tamiuoum tenami lotu.
*Doh inggeim mi uoto namana tapokis dedempe, karing lotu dede tamiuoum tang God ge Tamagigeig tenami kalekinale uaiaoum geke kotpokoso tur remi nitagorong manoum, kara niguata uaia tun geke kotpokoso tur remi nimalauelhiroum, kare popokoho tun remi ninamana tar uanguangoul gete tapokisiha nagi Tamata Nomaneig Iesu Kristo.
Ro bung uanotoumiueim, God e malauelhirintiehe tun tamiuoum. Doh inggeim mi ate uaia tun manasa pare, God ke uamatoto manasa tamiuoum o nan, *teeit inggeim king keipime toro Uelhire Uaia tamiuoum, ahik pah ko lame a menemene puk, bo ko la keipime tar nitampopokoh, kara Iabena Dedeil. Inggoum kung bang paroko tun tar uleikir nitagorong manar emiueim, karung banga katongo tun king uangoul keip pemeeim tamiuoum, teeit tar niuia tamiuoum. *Inggoum kung babasira tamiueim mer Tamata Noman, gitiempe kung kale peoum tar uleikir uelmahing, inggoum kung kale keip kompe toro uelhire tar niuah geke heirinir Iabena Dedeil.
Temaeit inggoum tera bangbanga tonguar tamata uakapa tun gera tagorong mana tang Kristo tar pang uan i Masedonia, kare tar pang Akaia. No uelhirer Tamata Noman ko tauete tur tamiuoum, karo haiala ueltebeir, ahik pah tar pang Masedonia, kare tar pang Akaia puk, bo toro giniamehe ponompe ro pang uan, doh remi nitagorong manoum tang God ka la ueliateig toro mamang buturulik, temaeit inggeim ahik baka poluk me inete ring menein. Gisina katongomper tamata ka ueluatata tar uleikir niuaha kung heir uoumuioum tamiueim tar binaka king uangoul tokaha keipieim tamiuoum, karung de tasir god bohoboh, kare uiuirisioum tar niguata ger sa ger pensioun, karung uakeluk tang God gere uangoul dede, kara uauaman, 10 karung uanguangoul pono tar tunon gere turung la tapokis turuha i Heuen. Inggono te geke mata bak, kare uatua tapokis God tatanon, inggono te Iesu gere turung uelkarus tur tagigeig tena nimaliana God gere turung lame.
* 1:1 Apo 17.1-9 * 1:3 1Ko 13.13; Kol 1.4-6 * 1:5 1Ko 2.4-5 * 1:6 Apo 17.5-9