16
Yesu itine paiwe
1 Pwen lang para Sapat kinhipwen pe Mariya para Maktala, Mariya tina Yamis, pe Salome, huya sowani ndraikei pe melit hayah mangonohon layin, pe hu pakaya tumwiy kiya nombuwe Yesu.
2 Pe makohuping o para lang iho mu para sandre sih, hu pihin ara, huya ngat maparamwandrai iro sisiyaniy o.
3 Pwen huro wong mwalingahu, hupa, <<Hiyeh ndrokonan andre kitiriyani pat kiltou kiya mawen poho mara ngat?>>
4 Pwen huyarayah pe marahu pakitandras o, hunime pat ara, ara hu kantiriyaniy kinna mawen. Pe pat ara namandra-namandran iya.
5 Pe husong huya nondriya ngat, pe hunime wihou hamou, koiwen pallen pe niwen, ara imimpwan iyapwen te mot. Pwen pe hu lohonge ndrit.
6 Hapeko wihou ara ipwai iya kili hu, ipa, <<Mbuna akalohonge ndrit. Yo upahasaniy tehe wawu tora ten Yesu, ndramira Nasaret, yiy mepo kantapaingi yiy kinna kei tondrih. Yiy kinto iye pwi. Yiy kintine. Akanime nokun huiki yiy iyen aliy, ara iye.
7 Pwen wawu kaya mahapo ko, pe akayapwai kaya kili ndramiran hu, pe Pita i, tehe Yesu andre kiro mu kili wawu kiya Kaliliy. Pe wawu andre kaya nime yiy kaya aliy, tehe mamu kinpwai pwen kinsa kili wawu.>>
8 Pwen huya ngawan ngat pe huwop huya mawen. Paratesah, hulelen pe lohongahu indrap. Pe hu kannese ndrainga hamou pwi, paratesah, hunoh.
9 Yesu itine kimat makohuping o, iya lang sih imu para sandre sih, ara yiy iyarayah imu iya kili Mariya para Maktala mepo koluw kintapiyani payit manandrtimou iro ndritan iya mawen.
10 Pwen Mariya para Maktala ara, iya pe inese ndrainga hu mepo hu ngara koro sura Yesu, mepo huro nondriya yumwa merei pe huro rang.
11 Pe iro mwonen ara, huhulong kili Mariya tehe Yesu kintine, pe kinnime yiy pwen. Hapeko ndriyahu kinpwotisingi nongnan pwi.
12 Pe iyamulan hape, Yesu ipiy pe iyarayah iya kili hilu ndramiran malmou hilu ro tokai nakatali kol namandran kaya ngawan.
13 Pwen hilya pe hilnese ndrainga hu ndramira Yesu masih, hapeko ndriyahu kanpwotisingi nongna hilu pwi yi.
14 Pwen iyamulan para aliy, Yesu iyarayah iya kili ndramiran hu songui pe hamou hurompwan hurakayani keyau para namnam. Pwen ipomate hu, paratesah, hu kanpwotisingi lohongahu pwi, pe payahu ara pwokeyan iya. Ipwai tehen toro, paratesah, hu kanpwotisingi lohongahu kinna nongnahu pwi, yihu mepo hunime yiy imu pe husa nese iya kili hu tehe kintine.
15 Pwen ipwai iya kili hu, ipa, <<Akaya kene kol pwan masih, pe akapohowe nongan hiyan kiya hu masih kene mepo Ngindrai imangsani hu.
16 Pe yiy mepo lohongan kipwotisingi yo, pe kiwiri paptais ara andre kiro hiyan. Hapeko yiy mepo ndriyan kinpwotisingi yo pwi, ara andre kikuni kora kultuwayin.
17 Pe hu ndraikiya pwoke iye, ara andre kiro ndruwa hu mepo hu pwotisingi yo: kiyau ngolo, andre hu karasses hu payit, pe andre hu kawong kiya nongna kol hakol-hakol.
18 Pe andre hu kasap mwat para taya ndramat, pe kapa hu kayin melit tunguyan, ara andre kinngahi hu pwi. Pe andre hu kaiki nimahu kaya ndrita hu ndramat humwa, ara andre hu kangoh.>>
19 Pwen Yapan iwong iya kili hu ihipwen, pe Ngindrai isoli yiy iya kol paingan yang, pe iya impwan iyapwen te nima Ngindrai mot.
20 Pwen ndramiran hu huyau pe huya pohowe nongnan. Yapan iropo mbulen iyasurahu, pe imbusi hu ndraikiya pwoke ara para kipwokeyani nongnahu.