2
Yesu isopwoyani ndramat hamou mandran imat pe itali pakut mwomwan tan
1 Lang hayah iyamulan, Yesu imui iya Kapernawum, pe nongan ingau tehe Yesu kinmui kinsa wum.
2 Pwen ndramat soyon masih husa wule, pe nondriya seu iyapolo pohokaram kene, ara masih ipep topwei tahu ndramat. Pe Yesu iro tiyani nongna Ngindrai iya kili hu.
3 Pwen hu ndramat hayah husa kili Yesu, iyapolo hu mahaamou mepo huhuri ndramat hamou mandran imat.
4 Pe seu ara indrap tahu ndramat, pe hu kanlahiy para kahari ndramat ara kisa pakeh kili Yesu pwi. Pwen pe huhuri yiy iya payandroha seu, pe hurambuskehe payandroha seu hape, pe huyuwani yiy ma nokun iya pwan mbulmara Yesu.
5 Pe iro mwonen Yesu inime lohongahu ndrisiyon, pwen ipwai iya kili ndramat mepo mandran imat ara, ipa, <<Noru, kuntali hu pakut mwomwan atam.>>
6 Hu ndramat hayah para hinuwani nongan para pwahanou hurompwan ara, pe huro lohonge soyon iro ndriyahu mbukenan, hupa,
7 <<Tehen tapeh pe ndramat aro iwong tehen tora? Yiy ipwasisiman ana Ngindrai! Hamou kinlahi kitali pakut mwomwan pwi, hapeko Ngindrai opu, ndre?>>
8 Pe indrou pwi ko, Yesu ara mwoiwan kinpahasani tesah mepo huro lohonganiy iya ndriyahu, pe ipwai iya kili hu, ipa, <<Paratapeh pe wawu tora lohongani hu melit aro kene ita ndriya wawu?
9 Sehe nongan, ara waison para kupwai kiya kili ndramat sangin imat? Ara waison para kupa, <Kuntali hu pakut mwomwan tam,> ndre kupa, <Atine, awiri nokum pe arikai>?
10 Hapeko yo unamiliy para wawu kapahasaniy tehe Noru Ndramat, ara pwoke nopwaran iripo kili yiy iripo kol pwan para kitali hu pakut mwomwan. >> Pwen ipwai iya kili ndramat mandran imat ara, ipa,
11 <<Yo upwai isa kili wou, atine, awiri nokum, pe ayau aya suwem.>>
12 Pwen itine, iwiri nokun, pe iyau iya mawen mbulmarahu masih. Pwen hu ndramat masih mwoiwahu ihin, pe huhuri ngala Ngindrai, hupa, <<Yowu ara konoho nime memelit tehen toro pwi yoh.>>
Yesu iyoh Lepi pe inamnam iyapolo hu ndramat pakut tahu mwomwan
13 Porosih aro, Yesu iyau iya poholeng para Ndran Makaiye Kaliliy, pe hu ndramat soyon iya ara husa kili yiy pe iro hinuwani hu.
14 Pwen iro tokai iya pe inime ndramat hamou ngalan Lepi NdraAlpeyus. Yiy iro mipwan ndrohonoku poya takis, pe Yesu ipwai iya kili yiy, ipa, <<Asa, oho ndruwo.>> Pwen o Lepi itine pe iho ndruwan.
15 Pe iyamulan hape, iro mwonen Yesu iro namnam iya suwe Lepi, ara hu ndramat para poya takis soyon, iyapolo hu ndramat soyon pakut tahu mwomwan, ara huro namnam iyasura Yesu pe ndramiran hu. Paratesah, hu ndramat soyon ara huho ndruwan.
16 Pwen hu ndramira Parisiy hayah para hinuwani nongan para pwahanou, ara hunimei tehe Yesu iro namnam iyapolo hu ndramat pakut tahu mwomwan, pe hu ndramat para poya takis. Pe hupwai iya kili hu ndramira Yesu, ara hupa, <<Paratapeh pe Yesu ita namnam iyasura hu ndramat para poya takis, pe hu ndramat pakut tahu mwomwan?>>
17 Yesu ihilingi hu, pe ipwai iya kili hu, ipa, <<Hu ndramat mwanyehu hiyan, ara andre hu kanna nime hu ndrokta pwi, hapeko hu ndramat humwa, kopu andre hu kaya nime ndrokta. Yo kunsa para kuyoh hu ndramat hu mwonen pwi, hapeko usa, ara para kuyoh hu ndramat mepo pakut tahu mwomwan.>>
Husok Yesu iya lohongai para kayuh anandrinai
18 Nondriya hu lang ara, hu ndramira Yohanes, pe hu ndramira hu Parisiy, ara huyuh anandrinai. Pe hu ndramat hayah husa, pe hupwai iya kili Yesu, hupa, <<Paratapeh hu ndramira Yohanes, pe hu ndramira hu Parisiy, ara hutora yuh anandrinai, hapeko hu ndramiram, ara hu kaniyuh anandrinai pwi.>>
19 Yesu ipwai iya kili hu, ipa, <<Kapa ndramat hamou nakipo kowase yesou, tehen tapeh andre yowen hu kayuh anandrinai ma iro ndron kili hu? Pwi yoh! Yihu kanlahiy para kayuh anandrinai pwi, paratesah, iro ndron sura hu.
20 Hapeko lang itapo isa andre hu kawiri mbukena kowase yesou, ara kiya mawen kili hu, pwen kiro mwonen lang ara, andre yowen hu kayuh anandrinai.
21 Ndramat hamou kinho sorowe koyau hasai howen, pe kirapairaniy kiyasura koyau saken, ara pwi. Kapa tehen tora, koyau hasai howen ara, andre kindrohomwiri koyau saken, pe kiya mwomwan masih.
22 Pe ndramat hamou kinho songorani wain howen kiya nondriya pwisi wain saken, ara pwi. Kapa tehen tora, pwen wain howen andre kimbusi hu pwisi wain saken karahis; pe wain howen kiyapolo pwisi wain saken, ara maluwoh kene andre kaya mwaihei opu. Pwen iya lohongai ara ko, hu ndramat ngara kasongorani wain howen kiya nondriya hu pwisi wain howen opu.>>
Noru Ndramat ara yiy Yapane lang Sapat
23 Lang Sapat sih, Yesu iyapolo ndramiran hu huro tokai nondriya piyang para wit hambut. Pe ndramiran hu huro rih mbuwa wit tiken.
24 Pwen pe hu Parisiy husok yiy, hupa toro: <<Akahilingiy! Paratapeh pe yihu tora mbusi tesah mepo nonombun para kambusiy kiho nondriya lang Sapat?>>
25 Yesu isomwi hu, ipa, <<Wawu kannime titiye ta Tepit, ndre pwi? Titiye ipa tehe Tepit iyapolo ndramiran hu, ara anandrinahu pwi pe humundrui.
26 Pe aro, ara irayah tandrohonga Apiyatar iro ndron tehe pris ihohin ta hu pris masih kene. Pwen Tepit isong iya nondriya yumwa Ngindrai pe iwiri ndrinanohun nonombun. Nongan para pwahanou, ara ipa tehe hu pris opu andre kayan ndrinanohun ara, hapeko Tepit iya pe iya wiri ndrinanohun ara pe iyan pe ihang ndramiran hu i. Wawu nime titiye ara, ndre pwi?>>
27 Pwen ipwai iya kili hu, ipa, <<Lang Sapat, ara irayah para kisopwat hu ndramat; hapeko hu ndramat hu kantayah para kasopwat lang Sapat, ara pwi.
28 Pwen tunan aro ko, Noru Ndramat, ara yiy Yapane lang Sapat.>>