14
Herot itingundru Yohanes Ndramat para Paptais
1 Pe iro mwonen lang ara, Herot, pohon para kol Kaliliy, ara ihilong titiye ta Yesu.
2 Pe ipwai iya kili ndramiran hu, ipa, <<Aro ara Yohanes Ndramat para Paptais! Yiy kinsa tine paiwe! Pwen ndroiyin ara ko, hu ndraikiya pwoke, ara hutora tayah kili yiy.>>
3 Paratesah, Herot ara kinpwandrisa hu ndramat pe hu kanmbultuwe tahatini Yohanes pe kanwasi yiy, pe kaniyki yiy kinna nondriya kou, pe Herot ara kinwiri nambuyu nalin Pilip, ngalan Herotiyas, kinna nambuyun.
4 Paratesah, Yohanes ara kinpomate Herot, kinpa, <<Wou anwiri pihin ara, hapeko nongan para pwahanou, ara ipwai tehe nonombun para awiri yiy.>>
5 Pe Herot, ara pakitingundru Yohanes, hapeko inoh tahu ndramat, paratesah, hupa ndre Yohanes ara poropet hamou.
6 Pe iro mwonen lang para hu kalohongani lang mepo tina Herot imwalahiy tan, noru Herotiyas pihin isa pe iho ndran mbulmarahu. Pe Herot ara ipwes iya ndraniyan namandran iya.
7 Pwen irandrangan pe ipwatisingiy iya kili yiy tehe andre kiyki tesah mepo inamiliy pe isok yiy iya aliy.
8 Pwen Herotiyas iyki lohongai iya kili norun pihin, pe pihin ara, ipwai, ipa, <<Aiki paya Yohanes Ndramat Para Paptais, kiya pwelekei maihan sih pe kisa kili yo.>>
9 Pwen king ihilingi nongan aro, pe ndriyan ipworu. Hapeko kintandrangan pwen iro mbulmara hu ndramat mepo kinpwanos hu husa namnam iyapolo yiy. Pwen pe ipwatisingiy tehe tesah mepo pihin ara isok yiy iya aliy, ara hu kaikiy opu kiya kili yiy.
10 Pwen ipwatisingiy para kaya sondriti koyu Yohanes kiro nondriya kou.
11 Pe huhuri payan, iro ndrita pwelekei maihan sih, pe huikiy iya kili pihin ara. Pwen ikuniy iya kili tinan.
12 Pe hu ndramira Yohanes husa pe huhuri nombuwen pe huyaroniy. Pwen pe huya nese ndrainga Yesu.
Yesu itaingani anandrinai iya ana hu ndramat mayipou (5,000)
13 Pe iro mwonen Yesu ihilong tesah kintayah kili Yohanes, pwen itali kol ara, pe ihis ndroi nokule ko, pe iyau iya kol hape lohowayin. Pe hu ndramat soyon iya huhulong, pe hutali hu kol ngawan pe hurukai huho ndruwan.
14 Pwen iro mwonen Yesu ituh ndroi iya pwan, pe inime hu ndramat soyon iya, hu kansa mbultere hu huro. Pe koyun ara isikirani hu pe isopwoyani yihu mepo humwa.
15 Pe kol iro piyah pe ndramiran hu husa kili yiy, pe hupa, <<Kol aripo ara ndramat aliy pwi, pe mwandrai nakiya lai ara. Apwandrisa hu ndramat hu kayau, pwen pe andre hu kaya hu kol mendreheh pe hu kaya sou hayah anandrinahu mbukenan.>>
16 Pe Yesu isomwi hu, ipa, <<Kinlahiy para hu kayau pwi. Akahang hu hapesah para hu kayan.>>
17 Pe husomwi yiy, hupa, <<Annowu ndrinanohun mayimbut pe ni malmou opu iripo.>>
18 Pe Yesu ipwai, ipa, <<Akawiriy kisa kili yo aripo.>>
19 Pwen Yesu ipwai iya kili hu ndramat para hu kampwan ndrita ndromwindriu. Pe yiy iwiri ndrinanohun mayimbut pe ni malmou ara, pe maran itandras iya kol paingan yang, pe itoholiy, pwen iramburingi ndrinanohun ara. Pe iykiy iya kili ndramiran hu, pe hutainganiy iya kili hu ndramat.
20 Pe hu ndramat masih kene, ara huyan pe isihi hu. Pwen ndritikehu mepo huro ndron, ara hunihiy iya hu ndrop mandropwa songui pe luhat.
21 Pe ndromwoya hu kamai mepo hunamnam ara, ara kiho tehe mayipou (5,000). Hu pihin pe hu mbunah, ara kanndromwa hu pwi.
Yesu irikai ndrita ndran
22 Hape pwi ko, Yesu ipwai iya kili ndramiran hu para hu kahis kaya nondriya ndroi, pe hu koro mu kili yiy kaya haroh. Pe yiy iro ndron, pe ipwai iya kili hu ndramat para hu kalon.
23 Pe hu ndramat ara, ara hu kannau, pwen yiy mbukenan ingas iya ngondron sih pe iya tohun. Pe iro mwonen kol iro piyah, yiy hamou opu iro ariya.
24 Pe ndroi, ara kintali leng pwen, pe kinna mwanan hape ndrokolo ndran makaiye. Pe nowei, ara iro mbuiwani ndroi, paratesah, nohai imum te ngondroi isa.
25 Pe lang iro mbungahiy, pe Yesu, ara iya pe ihorokai ndrita ndran makaiye iropo iya kili hu.
26 Hapeko ndramiran hu hunime yiy iro tokai ndrita ndran makaiye, pwen hunoh turuwehu. Pe huwayeh iyapolo nohowai, hupa, <<Ara mwomwoyou hamou.>>
27 Hapeko Yesu hape pwi ko ipwai iya kili hu, ipa, <<Wawu mbuna kanoh! Aripo yo kopu; ndriya wawu kipwoke.>>
28 Pita isomwi yiy, ipa, <<Yapane, kapa ara wou, pwen apwai kisa kili yo para kurukai ndrita ndran kusa kili wou.>>
29 Pe Yesu ipwai, ipa, <<Asa.>> Pwen Pita itali ndroi iya pwan ndrita ndran, pe irikai iya kili Yesu.
30 Hapeko iro mwonen Pita inime nohai, pwen pe inoh pe iro somun. Pwen iyoh pwokeyan iya kili Yesu, ipa, <<Yapan, asopwat yo!>>
31 Hape pwi ko, nima Yesu iyah iya, pe isoli Pita, pe ipwai iya kili yiy, ipa, <<Wou lohongam ndrisiyon ara hape kopu. Paratapeh pe ahandrundru?>>
32 Pwen iro mwonen hilu his hilya nondriya ndroi, ara nohai imaito.
33 Pwen yihu mepo huro nondriya ndroi, ara huhuri ngalan, pe hupa, <<Ndrokonan masih, wou ara Noru Ngindrai Kamai.>>
34 Pe iro mwonen yihu singondriti ndran makaiye huya haroh, ara husarayah husa kol hakol mendreheh ngalan Kennesaret.
35 Pwen pe iro mwonen hu ndramat para kol ara, ara huyirowe Yesu, pwen hu pwanos nongan iya kene hu kol mepo huro pakeh. Pe huwiri hu masih kene mepo humwa, ara husa kili Yesu.
36 Pe hurakamam iya kili yiy, para kipa hiyan para hu ndramat humwa ara, ara nimahu ko kiyahatek kiya payango koiwen. Pwen hu masih mepo nimahu iyahatek iya aliy, ara hungoh topwei.