16
Hupwai para Yesu kimbusi kaipisa pwoke handra
1 Pe hu Parisiy pe hu Satyusiy ara husa kili Yesu, para hu pakanohonou yiy, pe husok yiy para kipwaingani kaipisa pwoke handra kiyau kol paingan yang kiya kili hu.
2 Pwen Yesu isomwi hu, ipa. <<Iro mwonen kol iro piyah, ara wawu ngara kapa, <Lang nepo ara andre kiya hiyan, paratesah, yang ara ilam.>
3 Pe kiya mandroulang ara wawu ngara kapa: <Lang nepo, ara andre mbulou manohayen, paratesah, yang ara ilam pe mara kol ilokuh.> Pwen wawu pahasaniy para karanonoye nimnim para mara kol, hapeko k wawu kanlahiy para karanonoye hu kaipisa hu lang para mahapo pwi.
4 Hu hasap mepo kultuwayihu pwassin, pe hu kantali Ngindrai, ara yihu ngara kasok kaipisa pwoke. Hapeko yihu andre kannime hapesah pwi, kaipisa poropet Yonah kopu andre hu kanimei.>> Pwen Yesu itali hu pe iyau.
Yis tahu Parisiy pe Satyusiy
5 Pe iro mwonen huyarayah huya haroh para ndran makaiye, pwen hu ndramira Yesu, ara koyuhu imayit para kapo ndrinanohun.
6 Pe Yesu ipwai iya kili hu, ipa, <<Mara wawu kiro. Akoro rapapahan kiya yis tahu Parisiy pe Satyusiy.>>
7 Pwen huro panguluwaniy mwalingahu mbukenan pe hupa, <Ita wong tehen toro, paratesah, worou kanpo ndrinanohun pwi.>>
8 Pe Yesu ara ipahas iya tesah huro wong iya aliy, pe ipa, <<Wawu ndramat para lohongai ndrisiyon hape kopu, paratapeh pe wawu tora panguluwaniy mwalinga wawu tehe ndrinanohun pwi?
9 Lohonga wawu kinileu mapu ko? Wawu lohongani ndrinanohun mayimbut iya anahu ndramat mayipou, pe iyasura hu ndrop masahayeh wawu nihi ndritiken, ndre pwi?
10 Ndre wawu lohongani hu ndrinanohun manandrtoyoh iya anahu ndramat mahaapou, pe iyasura hu ndrop masahayeh mepo wawu nihi ndritiken, ndre pwi?
11 Pwen paratapeh pe lohonga wawu kinileu mapu ko yeh. Yo ara uwong isa kili wawu, ara kinna ndrinanohun pwi, hapeko para akoro rapapahan kiya yis tahu Parisiy pe Satyusiy.>>
12 Pwen lohongahu isa leu tehe Yesu iro wong iya kili hu, ara para hu kapenani hu kiya yis mepo ngara kaikiy kiya ndrinanohun, ara pwi, hapeko iwong, ara para hu kapenani hu kiya hinonou tahu Parisiy pe tahu Satyusiy.
Pita ipohowei tehe Yesu ara Mesayah
13 Pe iro mwonen Yesu isa kol namandran hape Sisariya Pilipai, para isok ndramiran hu, ipa, <<Hu ndramat, hupa ndre Noru Ndramat, ara hiyeh ndrokonan?>>
14 Pe husomwi yiy, hupa, <<Yihu hayah, ara hupa Yohanes Ndramat para Paptais, pe hu hayah, ara hupa Eliyah, pe hu hayah tahu yi, ara hupa Yeremayah ndre hamou tahu poropet para koluw.>>
15 Pe Yesu isok hu, ipa, <<Pe wawu, ara wawu pa ndre yo hiyeh?>>
16 Pwen Simon Pita, ara ipa, <<Wou, ara Mesayah—ndramat mepo Ngindrai kintakiniman para kisopwat hu ndramat—wou ara Noru Ngindrai Kamai Mwalen.>>
17 Pe Yesu isomwiy, ipa, <<Lomwes, ara ita kili wou, Simon NdraYonah. Ndramat hamou kinpwainganiy kinsa kili wou pwi, hapeko Tomo ita kol paingan yang, ara yiy opu kinpwainganiy.
18 Pe yo upwai isa kili wou tehe wou, ara Pita, pe kiro ndrita pat iye, yo andre kupuli ekklesiya ato, pe poho karam para kolo kimat, ara andre kinlahiy para kiramwaitini ekklesiya ta Ngindrai pwi.
19 Pe Yo andre kuiki hu kiy para kolo king mepo ngara kiro mu kiya aliy para kol paingan yang kisa kili wou. Pwen tesah awasiy kiro kol pwan, ara kol paingan yang andre kiwasiy. Pe kapa tesah ataliy kiro kol pwan, ara kol paingan yang andre kitaliy.>>
20 Pwen Yesu ipwandrandrahaniy iya kili ndramiran hu, para hu mbuna kaya tiyaniy kiya kili hamou tehe yiy ara Mesayah.
Yesu iranonoye iya kimat tan
21 Pe iro mwonen lang ara iya, Yesu iro ranonoye iya kili ndramiran hu tehe andre kiya Yerusalem, pe kiya nondriya hu nopwaran soyon kiro nima hu yapane kol, pe hu pris huhohin ta hu pris masih, pe hu ndramat para hinuwani nongan para pwahanou. Pe andre hu katingundrun pe kiro mwonen lang maroyoh, andre kitine paiwe pe kiwiri taleh.
22 Pwen Pita iwiri yiy iya pwakin pe iro pomate yiy, iro pa, <<Yapan, ara pwi! Melit iye, andre kintayah kili wou pwi yoh!>>
23 Pe Yesu ipaiwani yiy iya kili Pita, pe ipa, <<Sinai, asaya ndruwo! Wou ndramat amira singori yo. Wou anto ndruwa lohonga Ngindrai pwi, hapeko ata ndruwa lohonga ndramat opu.>>
24 Pwen Yesu ipwai iya kili ndramiran hu, ipa, <<Kapa sehe ndramat pakiho ndruwo, ara kipa pwi kiya tan mbukenan, pe kisap kei tondrih tan, pe kisa kiho ndruwo.
25 Paratesah, yiy mepo neren kiya mwoiwan mbukenan, andre mwoiwan kitali yiy. Pe yiy mepo kilohongani yo, pe tunan yo kopu kitali mwoiwan, ara andre kisopwat mwoiwan mbukenan.
26 Kapa ndramat hamou kiwiri hu memelit para kol pwan masih kiya mbukenan yiy, pe kiyamulan kimat pe kitali mwoiwan, pwen andre melit masih kene ara, andre kisopwat yiy tapeh? Ndre sehe melit ndrokonan ndramat hamou ilahiy para kiykiy, para kisuliyani mwoiwan kimui?
27 Paratesah, Noru Ndramat ara andre kisa kiyasura hu angelou tan, pe nonowa ngana Taman. Pwen andre kiyki kenne ndramat hamou-hamou kiho ndruwa tesah mepo hamou-hamou tahu kinmbusiy.
28 Upwai ndrokonan isa kili wawu, tehe hayah mepo hutopo tine aro, ara andre hu kanhingorowe kimat kileh pwi, kipoo hu kanime Noru Ndramat kiro kolo king tan mepo ngara kiro mu kiya aliy ara kisa.>>