Yankuik kuali tlajtoli tlen okijkuilo
San Juan
1
In Tlajtoli omokuapki tlakatl
1 Antes de oyeskia in tlaltikpaktli, yokatka in Tlajtoli, iva yejón Tlajtoli okatka ivan Dios, iva yen Dios.
2 In Tlajtoli okatka ivan Dios desde ijkuak ope in tlaltikpaktli.
3 Iva ika yejón Tlajtoli, Dios okichi nochi tlen onka. Iva tlamo por yejón Tlajtoli, nochi tlen onka amo oyeskia.
4 Itech yejón Tlajtoli kajki in nemilistli, iva in nemilistli yen tlavili para kintlavilis in tlaltikpaktlakah.
5 Nin tlavili tlavia kan tlayova, iva in tlayovalotl amo veli kisevia.
6 Okatka se tlakatl itoka Juan, tlen Dios okivaltitlanki,
7 para ma yeto kemi testigo iva ma tetlapovi de yejón tlavili, para ijkó nochtin ma kineltokakah.
8 Juan amo yen tlavili, sino Dios okititlanki para ma tetlapovi de yejón tlavili.
9 Neká tlen yi neli tlavili yoajsitivalaya itech nin tlaltikpaktli para kintlavilis nochtin tlaltikpaktlakah.
10 Neká Tlajtoli yokatka itech nin tlaltikpaktli. Iva por yen Tlajtoli Dios okichi in tlaltikpaktli, pero in tlaltikpaktlakah amo okixmatkeh akin Ye.
11 Ovala itech nin tlaltikpaktli tlen Ye okichi, pero tlen iaxkavah amo okiselijkeh.
12 Pero nochtin tlen okiselijkeh iva okineltokakeh, okinkavili ma mochivakah Dios ipilvah.
13 Oneskeh kemi Dios ipilvah, pero amo oneskeh kemi ijkuak se tlakatl ivan se sivatl mosetiliah para kipiah inkone, sino oneskeh kemi Dios ipilvah porke otlaneltokakeh inavak.
14 Iva neká Tlajtoli omokuapki tlakatl iva tovah okatka itech nin tlaltikpaktli. Iva otikittakeh imavistilis, iva yejón mavistilistli kipia san yen iKone toTajtzin Dios, porke otechititi nochi itlasojtlalis iva nochi tlen yi neli melajka.
15 Juan otetlapovi aserka de neká Tlajtoli. Iva chikavak okijtovaya:
—Ye nin tlakatl tlen ne onimechilviaya: “In tlakatl tlen vitz satepa de ne, Ye okachi weititok iva amo kemin ne, porke Ye yokatka desde antes de ne ninesis.”
16 De nochi tlen kipia, tinochtin tikselijtivitzeh okachi iva okachi de itlatiochivalis.
17 Dios otechmakak itlanavatil por medio de Moisés. Pero itlasojtlalis iva tlen melajkayotl, ovala por medio de Jesucristo.
18 Amo keman íkka kitta Dios, pero iKone tlen san Ye se, tlen noijki Dios iva kajki seppa inavak iTajtzi, Ye otechixmatiltiko in Dios.
Juan tlen tlabautisaro okijto mach yen Cristo
(Mt. 3:11-12; Mr. 1:7-8; Lc. 3:15-17)
19-20 In tlayakankeh judiojtih de Jerusalén okintitlankeh sekimeh tiopixkeh iva sekimeh levitas para ma kitlajtlaniitih in Juan akin ye. Iva Juan okinmilvi tlen yi neli:
—Mach ne niCristo.
21 Ijkuakó yejvah oksemi okitlajtlanijkeh:
—Tonses, ¿akin te? ¿Te tiElías?
Juan okinnankili:
—Amo, mach ne.
Oksé welta okitlajtlanijkeh:
—¿Te tiprofeta tlen tikchixtokeh ma viki?
Ye okinnankili:
—Amo.
22 Ijkuakó okilvijkeh:
—Tonses, ¿akin te? Moneki techilvi para ijkó velis itla tikinmilviskeh tlen otechvaltitlankeh. ¿Tlán velis techilvis de te?
23 Juan okinnankili:
—Yen ne tlen nitetzajtzilia chikavak kan tlavaki: “Xikmelavakah iojviv in toTeko” —ijkó kemi okijto in tiotenejmachti Isaías.
24 Yejonmeh tlen oviah okittatoh in Juan, yejvah in fariseos okintitlankeh,
25 iva okitlajtlanijkeh:
—Tla amo te tiCristo, nion amo te tiElías, nion amo te tiprofeta, tonses, ¿akin omitznavati xitlabautisaro?
26 Juan okinnankili:
—Ne nitlabautisarova ika atl, pero imovah kajki se tlen imejvah amo inkixmatih,
27 iva yen tlen vitz satepa de ne. Iva ne nion amo notech povi para nikintojtomilis ikakvah.
28 Nochi nin tlamantli otlamochi itech altepetl Betábara, ik nepa lado de kan weyatl Jordán, kan Juan otlabautisarojtoka.
Jesús yen iichkakone in Dios
29 Omostlatik, Juan okittak in Jesús ompa vitz inavak, iva okijto:
—Xikittakah, yen nin iichkakone in Dios, tlen kinkixtilia intlajtlakol in tlaltikpaktlakah.
30 Ne onimechtlapovi de Ye ijkuak onimechilvi: “Satepa de ne vitz se tlakatl tlen okachi weititok iva amo kemin ne, porke Ye yokatka desde antes de ne ninesis.”
31 Ne amo onikixmatia, pero Dios onechnavati ma nitlabautisaro ika atl para ke in gentejtih de Israel ma veli kimomakakah kuenta akin Ye.
32 Juan noijki okijto:
—Ne onikittak in Tioijyotzintli ovaltemok de ilvikak kemi se palomax, iva omotlaliko ipan Jesús.
33 Ne ayamo onikixmatia. Pero tlen onechvaltitlanki ma nitlabautisaro ika atl, onechilvi: “Ijkuak tikittas in Tioijyotzintli valtemos iva motlaliki ipan se tlakatl, yen tlabautisaros ika Tioijyotzintli.”
34 Ne yonikittak, iva por eso nimechilvia nik yen iKone in Dios.
Tlen primer momachtijkeh de Jesús
35 Omostlatik, Juan tlen tlabautisaro oksemi ompa okatka invan ome tlen okinmachtiaya.
36 Iva ijkuak okittak ke Jesús ik ompa panova, Juan okijto:
—Xikittakah, yen nin iichkakone in Dios.
37 Yejonmeh ome momachtijkeh de Juan, san nima ijkuak okikakkeh tlen okijto, oyajkeh ivan Jesús.
38 Jesús omokuapki iva okinmitak okivaltokayah, iva okintlajtlani:
—¿Tlán inkinekih?
Yejvah okinankilijkeh:
—Rabí —kijtosneki Tlamachti—, ¿kan tichanti?
39 Iva Jesús okinnankili:
—Xivikikah iva xikittakah.
Tos oyajkeh ivan Jesús iva okittakeh kan chanti, iva ompa omokajkeh ivan Jesús yejón tonali porke yokatka kemi las kuatro de tiotlaki.
40 Andrés, tlen ikni in Simón Pedro, okatka se de yejonmeh tlen okikakkeh tlen okijto in Juan iva satepa okiseguirojkeh in Jesús.
41 Andrés san nima oyá okitemoto ikni Simón, iva okilvi:
—Yotikajsikeh in Mesías —kijtosneki Cristo o noso tlen Dios okipejpenki.
42 Andrés okivikak ikni Simón inavak Jesús, iva ijkuak Jesús okittak okilvi:
—Te tiSimón tiipiltzi in Jonás, pero axka motoka yetos Cefas —kijtosneki Pedro o noso Tetl.
Jesús okinotzki in Felipe ivan Natanael
43 Omostlatik Jesús okijto yas ik tlali de Galilea. Ompa okittak in Felipe, iva okilvi:
—Xiviki nova.
44 Felipe okatka de Betsaida, ialtepe in Andrés ivan Pedro.
45 Felipe okitemoto in Natanael iva okilvi:
—Yotikajsikeh in tlakatl tlen Moisés okijkuilo itech itlanavatil, iva tlen okijkuilojkeh in tiotenejmachtijkeh. Yejón tlakatl yen Jesús ipiltzi in José de altepetl Nazaret.
46 Natanael okilvi:
—¿Velis kisas itla kuali de Nazaret?
Felipe okinankili:
—Xiviki, xikittaki.
47 Ijkuak Jesús okittak in Natanael ompa vitz, okijto:
—Nika vitz se tlakatl tlen yi neli israelita, tlen amo kimati tlakajkayava.
48 Natanael okitlajtlani:
—¿Kenik techixmati?
Jesús okinankili:
—Ijkuak otikatka itlampa igoskuavitl, antes de mitznotzati in Felipe, Ne ipa yonimitzitak.
49 Natanael okilvi:
—¡Tlamachti, tejwatzi tiiKone in Dios! ¡Tejwatzi tiwei tlanavati de Israel!
50 Jesús okinankili:
—¿Techneltoka san por onimitzilvi onimitzitak itlampa igoskuavitl? Velis tikinmitas okachi wejwei tlamantih ke ninmeh.
51 Jesús noijki okijto:
—Yi neli nimechilvia, imejvah inkittaskeh in ilvikak tlapotok, iva inkinmitaskeh in ilvikaktlatitlaniltih tlejkoskeh iva temoskeh ipan iKone in Tlakatl.