Lata-tjanampa Yiipuru Pirniku
1
Mama Kuurrnga Wangkangu Palunyaku Katjawana
Yuwa, ngarnmanypalpi Mama Kuurrtu-tjananya tjamu pirningka tirtu wangkarranytja palunyaku wangka kulira tjakultjunkupayi pirniwana. Nyangka-ya kulira tjakultjunkupayi. Nyangka kuwarrinya-lanya Mama Kuurrnga palunyaku Katjawana wangkangu. Tjiinya-pula Mamalu Katjalu ngarnmanytjulpi manta yilkari palyarnu. Nyangka Mamalunku Katja tjunu ngula mantangkatja puru yilkaringkatja pirninyartu puurrarringkula kanyiltjaku. Katjalu-lanya yutira kanyira Mama Kuurrku tilipirinytju. Tjiinya Mamaku-ra kurrurntatja Mamanyapirinypartu nyinarra. Palunyalu wangkalu manta yilkari pirninyartu yayirninytjulu witurrpungkula kanyira. Tjiinya yarnangu palyamunuku yangarrakatingu mirrirringkulalpi Mamanya kalyparnu. Palunyatjanu yilkaringka nyinakatingu Mamala yitingkartu.
Mamalu Tjiitjanya Marninypungkulanytja
Yuwa, Mama Kuurrtu palunyaku Katja tjunu yayintjulta-tjananya munkarra nyinarratjaku. Nyangka puru palunyapirinypartu Mamalu yini walykumunu tjapirnu, yini walykumununya yayintjulpa pirniku yiningka munkarra ngaralatjaku. Tjiinya Mama Kuurrtu yayintjulpangka ngaapirinypa watjantjamunurtu,
“Nyuntunya-tjun ngayuku Katja nyinarra.
Kuwarri-rnanku Mamarringu.”
Nyangka puru yayintjultjarra Mama Kuurrtu ngaapirinypa watjantjamunu,
“Ngayulu-rnara Mama nyinama.
Nyangka-tju Katja nyinama.”
Nyangka Mama Kuurrtunku Katja ngarnmanytjatjanya mantakutu witulkitjalu watjarnu,
“Yayintjulpa pirnilu-yayi ngayuku Katja pupakatirra marninypungama.”
Nyangka Mama Kuurrtu yayintjulpa pirnitjarra ngaapirinypa watjarnu,
“Ngayulu-rnatju yayintjulpa pirninya palyarnu
waarka-tjuya palyaratjaku,
tjiinya-tjuya pirriyapirinytju
puru waru tilipirinytju waarka palyaratjaku.”
Nyangka Mama Kuurrtunku Katjangka watjarnu,
“Yuwa Katja, nyuntunyan puurrpa nyinarra-wanalku wiyarringkutjamaalpa tirtu nyinama.
Palunyalu yarnangu pirninya tjukarurrulu watjara kanyinma.
Nyuntulun pukurltu nyakupayi yarnangulu-ya tjukarurru palyaranyangka.
Palunyalun nyakula walykurringkupayi palyamunu-ya palyaranyangka.
Palunyangka-rnanta Mamalu tjunu puurrpan pukurlpa nyinarratjaku.
Tjiinya-rnanta nyuntuku yamatji pirningka wayirntaralpi tjunu.”
10 Puru Mama Kuurrtunku Katja watjarnu,
“Nyuntulun ngarnmanypalpi nyinarranytjalu manta palyarnu.
Palunyalun mara yungarralu yilkaritarrartu palyarnu.
11 Nyangka manta yilkari wiyarringkunyangka nyuntulun wanka tirtu nyinama.
Manta yilkari warntu yurnantjipirinypa punkalku wiyarringku.
12 Tjiinyakurlu warntu yurnantjirringkulanyangka yarrala warni.
Palunyalu kutjupanya tjarrpatjurra. Palunyapirinymankun.
Tjiinyamarntun kutjupa-kutjuparringkukitjamunu,
tirtu palunyanyartu nyinarra-wanarayinma.”
13 Yuwa, Mama Kuurrtu yayintjulpangka ngaapirinypa watjantjamunurtu,
“Yuwa, yitingkartu-rni puurrarri nyinama.
Nyangka-rna yanyan-yanyanpa nyinapayi pirninya kati pupatjurra
nyuntulu-tjananyan tjina tinatjunkula nyinatjaku.”
14 Nyangka-ya yayintjulpa pirninya wanytjapirinypa nyinarra? Wiya, kuurtipirinypa-ya nyinarra Mama Kuurrku waarka palyalpayi. Nyangka-tjananya witulpayi yirringkankutjaku yarnangu pirni nyarra Mama Kuurrtu kulira wankarunkukitjalu, palunyanya.