17
Yirnuntji Pakarnu Yaranku Wanangka
Nyangka Mama Kuurrtu Mawutjanya watjarnu, “Yuwa, Yitjurayilku tjamupirti-tjananya watjala tjiinya-yanku wana 12-pa mantjira katitjaku. Tjiinya Yitjurayiltu katja 12-pa kanyirnu. Nyangka katja 12-ku wartangkatja-ya liita kutju-kutjulu-yanku wana kati nintila. Nyangka wana kutju-kutjungka watiku yini walkatjurra. Palunyalun Yaranku yini walkatjunku Liipayiku tjamupirtiku wanangka. Palunyalun wana pirninya makatiku ngayuku tiinti miirl-miirlkutu. Palunyalu puuka miirl-miirlta yitingkartu tjunku, tjiinya-rnanta lurrtjurringkupayi, palunyangka. Nyangka wati nyarra ngayulu-rna ngurrkarntanu, palunyaku wana yirnuntjitjarrarriku. Nyangka-yayi pirnilurtu nyawa nintirriwa tjiinya-rna wati palunyanya ngurrkarntanu. Palunyalu-ya nyuntunya-pulanyanta mirrparn-mirrparnmaaltu kulinma.”
Nyangka mularrpartu Mawutjalu-tjananya Yitjurayilku tjamupirti palunyapirinypa watjarnu. Nyangka-yanku liita 11-tu puru Yarantutarrartu wana katingu Mawutjaku nintirnu. Nyangka katingu tiinti miirl-miirlta tjarrparralpi Mama Kuurrku puuka miirl-miirlta yitingkartu tjunu.
Palunyalu ngarringu tjirnturringkulalpi Mawutjanya tiintingka tjarrparralpi nyangu Yaranku wana ngaa wiyangkalpi yirnuntjitjarrarringkulalpi puru mirrka yurnmitjarrarringu. Nyangka Mawutjalu wana pirninyartu katingu yarnangu pirningka nintitjunu. Nyangka-ya liita pirnilu nyakulalpi wana-yanku mantjira katingu.
10 Nyangka Mama Kuurrtu Mawutjanya watjarnu, “Yaranku wana marlakulu tjarrpatjurra wanti puuka miirl-miirlta yitingka. Nyangka-ya tungun-tungunarrinyangka-tjananya wana yirnuntjitjarranya nintitjunama. Tjiinya-ya puru tungunpungkulalpi mirrparn-mirrparnpa wangkanyangka-tjananyarna mirrirntanku.” 11 Nyangka Mawutjalu mularrpartu katingu tjarrpatjunu wantingu.
12 Nyangka-ya Yitjurayilku tjamupirtilu Mawutjanya watjarnu, “Wiya, wartalpitjanu-latju kurrakuturringu. 13 Tjinguru kutjupa Mama Kuurrku tiinti miirl-miirlta ngamurringkulalpi mirrirriku. Nyangka-tjinguru-latju puru pirninyartu mirrirriku.”