23
1-6 Nyangka-pula yapu tjunkula parrawanarnu katurnu Mama Kuurrku kuka nintilkitjalu. Palunyalu-pula puluka 7-pa puru tjiipu 7-patarrartu pungkulalpi tilirnu tjunu Mama Kuurrku nintirnu. Nyangka Payilamanya kutju yapu katu tatirnu Mama Kuurrta wangkarranytja. Nyangka-lu tjukurrpa watjarnu. Nyangka marlaku pitjangu puurrpa Payilikila lurrtjurringu.
7-10 Palunyatjanu wangka walykumunu Yitjurayilku tjamupirtiku-tjanampa ngaratjaku watjarayirnu wantingu.
11 Nyangka puurrpa Payilikilu watjarnu, “Wiya, nyaakunykan palunyapirinypa watjarnu? Yarltingu-rnanta tjiinya-tjananyan yinitjura wantitjaku ngayunya-lanyatju papurrmunulu pitjala pungkula wiyaltjakutarra. Parturtu-tjanampan wangka walykumunu watjarnu wantingu.”
12 Nyangka Payilamalu watjarnu, “Wiya, kamu-rna kutjupa-kutjupa watjalku. Ngarna wangka nyarra Mama Kuurrtu-rni watjarnu, palunyanyakutju-rna watjalku.”
Pururtu Wangka Walykumunu-tjanampa Watjarnu Wantingu
13 Nyangka puurrpa Payilikilu Payilamanya watjarnu, “Yarra-li yapu kutjupangka tatila. Nyangka palunyanguru-tjananyan walunyakulalpi yinitjunku.”
14 Nyangka-pula mularrpartu yanu yapu kutjupangka tatiralpi Yitjurayilku tjamupirti walunyakulanytja. Nyangka puurrpa Payilikilu yapu tjunkula parrawanarnu katurnu. Palunyalu puluka 7-pa puru tjiipu 7-pa pungkulalpi tilirnu tjunu Mama Kuurrku nintirnu.
15-17 Nyangka Payilamanya kutju mapitjangu Mama Kuurrku tjukurrpa kuliralpi marlaku pitjangu puurrpa Payilikila lurrtjurringu. Nyangka-lu tjapirnu, “Nyaa watjarnu Mama Kuurrtu?”
18 Nyangka Payilamalu Mama Kuurrku tjukurrpa watjarnu,
“Yuwa Payiliki, kulila ngayulu-rnanta watjaranyangka.
19 Tjiinya Mama Kuurrnga yarnangupirinymaalpa.
Tjiinya mayulkitjamunu.
Ngarna yarnangulu mayulpayi.
Nyangka Mama Kuurrnga yarnangupirinymaalpa.
Tjiinya wuyurrpa kutjuparrikitjamunu.
Ngarna yarnangu wuyurrpa kutjuparripayi.
Nyangka Mama Kuurrtu watjalku wantirralpi tjurrkurltu palyalku.
Tjiinya Mama Kuurrtu watjannyangka palunyapirinypartu ngarama.
20 Tjiinya Mama Kuurrtu-rni watjarnu
wangka walykumunu-tjanamparna watjara wantitjaku.
Nyangka-rna kamu kutjupanku.”
21-24 Nyangka Payilamalu-tjanampa wangka walykumunu watjara-wanarayirnu wantingu.
25 Nyangka puurrpa Payilikilu watjarnu, “Wiya! Wiya! Palunyapirinypa watjaranytjamaaltu wanti.”
26 Nyangka Payilamalu watjarnu, “Wiyangkalpi-rnanta watjarnu. Kamu-rna kutjupa-kutjupa watjalku. Ngarna wangka nyarra Mama Kuurrtu-rni watjalku, palunyanyakutju-rna watjalku.”
Payilamalu-tjanampa Wangka Palunyanyartu Puru Watjarnu Wantingu
27 Nyangka puurrpa Payilikilu watjarnu, “Yarra-li yapu kutjupanguru tatiralpi nyawa. Tjinguru Mama Kuurrtu wuyurrpa kutjuparringkulalpi watjalku yinitjunkutjaku-tjananyan.”
28-30 Nyangka-pula mularrpartu tjarungarala yanu yapu kutjupangka tatirnu. Nyangka puurrpa Payilikilu yapu tjunkula parrawanarnu katurnu. Palunyalu puluka 7-pa puru tjiipu 7-pa pungkulalpi tilirnu tjunu nintirnu Mama Kuurrku.