31
Tjuulnga Katja Marnkurrtjarrartu Mirrirringu
1-2 Nyangka-yanku warrmarla Pilitjinyamartatjilu puru Yitjurayilku tjamupirtilu pika wakaranytja. Nyangka warrmarla Pilitjinyamartatjilu-tjananyaya pika purlkanya wakaranyangka-ya ngurlu kukurraarnu. Nyangka Pilitjinyamartatjilu-ya ngurlura wanarayirnu wakarayirnu mirrirntanu wiyarnu. Puru-ya Tjuulku katja marnkurrngatarrartu wakarnu mirrirntanu, Tjanatjannga puru palunyaku marlanypa kutjarra.
3 Palunyalu-ya pika purlkanya wakaranytjalu Tjuulnga ngururrtjunu kanyiranytja. Palunyalu-ya Tjuulnga kurlartangka wakarayirnu wantinyangka pika purlkanya ngarrirranytja.
4 Palunyalu wati nyarra tjara katipayinya watjarnu, “Kunmarnu purlkanyanku mantjiralpi-rni wakala mirrirntarra tjiinya-rniya wati Pilitjinyamartatjilu panypuratjarralu mirrirntankutjaku.” Nyangka wati yangupalalunku ngurlurringkulalpi wantingu.
Nyangkalta Tjuultu kunmarnu yungarranku mantjirnu tjuningka murrutjuralpi punkarnu. Palunyalulta mirrirringu.
5 Nyangka wati yangupala palunyalu nyangu Tjuulnga mirri ngarrirranyangka palunyalutarrartunku kunmarnu yungarra tjuningka murrutjuralpi punkarnu mirrirringu.
6 Nyangka tjiinya Tjuulnga, palunyaku tjara kanyilpayinya, puru Tjuulku katja marnkurrnga, puru Tjuulku warrmarla pirninya-ya mirrirringu tjirntu palunyangkartu wiyarringu.
Yuwa, palunya.