Sam Kratrtqki-esz'-nzpnu-esz'-nrade-tq (113)
Naglqlzku Yawe Mz Nzarmyalz-krgu Drtqde
1 Naglqlzku Yawe!
Nigu kxnzawz nedeng na-armyalzku drtqde.
2 Nayzuo mzli ka nzrglqpxngr drtqde
Tqvzpe, tqvzpe.
3 Mz zbq kang kqlu nigu leplz mz nrlc tulvzo
Na-awi-ngrbzku bade nqmq krde.
4 Murde aclve-atwrnr-ngrde lr mrkzbleng amrlx.
X nzetukr zmatq ngrde krlzlzbzle bongavz.
5 Trpnzngr kx apule Yawe kc tqngi Gct rgu,
Mz nzwxbutxlz-krde mz tron nyzde Heven.
6 Sc tqobqlvztile bongavz x drtc',
Mz nzaclve-angidr-krdeleng.
7 Murde naokatrle leplz kx trnzrngiscung,
Mz nzkapx-krmle nidr mz nzkxpu-krdr.
8 X armyalzle nidr murde nanginidr nradrtq kxnzetung
Kcng tzmailzlr leplz nedeng.
9 Ngi-batrpzle mz olvz kxvz-nrbalq nzrngine-krde doa kxnztopwzng,
Murde na-abrtz-ngrde doa nede lcng.
Naglqlzku Yawe!