Sam Kratrtqki-esz'-nzpnu-pwx-nrade-esz' (141)
Arlapxbz Ninge Mz Zmatq Ngr Alwx X Kxdrka'-ngrng
Nabz ne Devet.
Yawe, kqle-zvzx nim. Xlrm natqnge.
Vz-anim x okatrp ninge. Yawe, kqle-zvzx nim.
Abrtzlvz nzkrka'-krnge nzvzdz-krbzle bam na-apule zsikapu ngr bqlr nc ninz kc tzangcbz bam.
X nzglalz-krnge mqnge na-apubzle bam blz ngr milzpq.
Yawe, mailz ninge murde ma tqrpitix natq kxtrka,
A' nzycmne-krnge natubqpwz.
Bzkq rlr-ngrme nzsutikr drtwrnge da kxdrka'ngr,
Murde ma tqprtrpo badr kxnzaleng alwx
Mz nzale-krdr da kxvz-rbr,
X ma tqprlvz mzke' da kxtrka.
A' mz nzprtr-krbo badr, mrlzvxitx nzayrplapxngr ninge.
Murde nzatubqtingr apule tolo ngr nzamrlzngr.
Bzkq narnge mqngi,
Murde krka'-zvz-ngrne kx nayrlqpx-lzbqnge mz nzvz-rbr-krdr.
X ncblo sa na-abrtz-ngrdr natq ngr nzatubqti-krnge nidr
Mzli kc namc-ngrdr nzbzkr kxnzetu r kxdrka'-ngrng mz nzayrplapxngr nidr.
X nrvr ngrdr sa natwzbetxne mz drtc'
Mz nzapu-krdr lrdz kcng tqalvxlz nrc.
Yawe, nim Gct rnge, abrtr-zvzbo drtwrnge bam.
Nanginim lrpalvc nyznge, murde ma tqmnc-lxlrx.
Mailz ninge murde ma tqprtzx mz trtxki sc kxdrka'-ngrng,
X ma tqtaox mz gq kx nzekqtilr.
10 Mrlzvxitx nzdwatr-mou-krdr mz br scdr,
A' drtqnge naopx zvz.