Sam Krali (2)
Kxnzmcpx Ne Gct
Kxnzngqngung
1 Lr mrkzbleng nzngqngung mz nzngyatikr drtwrdr Yawe.
Murde mane nzyrlqtingr drtwr mz nzatrkatingr nide.
2 King rdrng x kxnzrmailz rdrng nzyrlwr-lxblrng
Mz nzoliqti-krdr nzota-krdr badr Yawe x Kxnzmcpx nede.
3 Nzrpilr kx, “Na-axtxbzku nzmnclz-krbzku mz zmatq ngrdr,
Mz nznikitx-krgu nqvi kc tzpe-ngrdr nigu, murde drtqgu naopx.”
4 A' King Yawe kc tqmncom Heven yrpalelvzle nidr,
X xtrnga-ngrde drtwr kcng tzyrlqlr.
5 Ycmne-zngyabz badr,
X nzmwxlr-ngrdr natqde kxpq.
Natq Yawe
6 Murde rpile kx, “Yrlqpex King kc tqmcpxpex Jerusalem
Mrkc Saeon, newz kxtr nyznge.”
7 X King kc tqmcpx Gct, rpile kx, “Napibo nike pim Yawe bange.
Rpimle kx, ‘Nim Mrlxnge, abzo mzbq ka, sa na-aelwapx-ngrbo mz leplz nzngini-krnge Trtem.
8 Rlxtim bange x sa nakabo bam zmatq ngr nzaclvengr neidung amrlx,
Murde leplz mz nrlc tulvzo nangi nemqng.
9 Sa na-aovxioq mrnyzdr mz nzxplr-zlwz-krm,
Kc na-apule bz kc tqrniglc botol.’ ”
Natq kx pibz Yawe mz Mevalu nede delcng.
Kxnzyrplapxng
10 Delc nimu king x kxnzrmailzng mz nrlc nayrplapxamu,
X nalalztq-angidramu, mzli ka tqycbe-ngrbz mzli.
11 Narnrctrpzmu mz nzamrlue-krmu Yawe,
X mz nzwztr-krbzmu bade.
12 Yrngzobzmu mz Mrlxde,
Murde ma tqodatile nimu,
Mz zngya ngr drtwrde kc tqwou.
A' nimu amrlx kcng tzrlatrpzng bade, sa namnc-zpwxamu.