Sam Kranzpnu-li-nrade-li (22)
Nzrlxtingr X Nzrlxngitingr
Nabz ne Devet kx yrbzle mz kxrmailz ngr dzbe kxnzngrng.
Nzrlxtingr
1 Gct! Gct o! ?Memule tqvzszpe-ngrn ninge?
?X memule tqpxtxpx-ngrn nzokatr-krm ninge x trlalztqpepqu mz nzkrka'-krnge?
2 Yrniti-zvzbo bam ngrlx x nrlckxbq,
A' trmnc-zpwxwxu murde trayzlumeu natqnge.
Nzrlxngitingr
3 Nim King rgr kxtr-esz'ngr kc tqaclvele nigr lr Israel.
X angio-zvzkr nim.
4 Melrmqgrng nzabrtrpzlr drtwrdr bam.
Nzlxngitilr nim x arlapxq nidr.
5 Nzmnc-xglelr nim x tu-zvzbzme mz nibrdr.
Nzrlxtibzlr nzokatr-krm nidr x angidatibzme natqdr.
Nzrlxtingr
6 A' nzapusrngr ninge brmrda.
Nzngangr-ngrdr ninge mz nzobqszo-krdr ninge.
7 Nzycngrlrmlr nardr bange x nzmabqtimlr benaodr bange.
X nzxtrnga-ngrdr ninge.
8 Nzrpimlr kx, “Abrtrpzme drtwrm mz Yawe, a' namckr ena nzarlapxkr Gct nim mzli ka.
Murde trokatrleu nim, kxmule-esz' rpiq kx mrlzti-zlwzle nim.”
Nzrlxngitingr
9-10 Yawe, yzuo mz zbq kc tzmcngr mzke', krlzmle mzli ka,
Abrtr-zvzbo drtwrnge bam mz nzngini-krm Gct rnge.
Murde aclve-angidrq ninge mz nzrmcngr mzke',
X mz nzyq-krnge neyr lxenge.
11 Bzkq rlaszq ninge, murde trpnz-moungr kx naokatrle ninge,
Mz nzesotrpe-krm enqmi rngeng bange.
Nzrlxtingr
12 Yawe, enqmi lcng tztu-ngalelvzlr ninge.
X nzrpilr nanibqlr ninge mz nzapu-krdr poi kz peto.
13 Naodr mznem mz nzvz-krmlr bange,
Mz nzmakx-krdr ninge mz nqngidr kxmalc.
14 Nzxplr-krnge yrkrpxpe apule lue kc tzpulio mz drtc' kx mingr.
Mrkcng tzaxvctrngr nrvr rngeng nzbxplctipeng, x nqmq nr nabznge baonepe.
15 Mzli trnaboipeu nzbatr-krme nzbz-krnge.
Murde mewe-zvzpex x drtwrnge brlxkz apule nabr kxngibr mz nepi.
16 Kxdrka'-ngrng nztu-ngalelvzlr ninge, nzapulr kuli kx namaneutilr ninge,
X sc tzmaplxtitrpebzlr mqngeng x nanycngeng.
17 Mcx kx ninge nrvr-nrbalqtxpe.
X nzobqszneopelr x nzyrpalelvzpelr ninge.
18 Nzakiti-lzbq-ngrdr nctq lrpz scnge,
X nzkq scnge kc boi nzayrleo-ngrdr daes, mz nzkrlz-krdr doa kx narngisc.
19 Yawe, bzkq mncme rlru.
A' vz-anim mz nzokatr-krm ninge.
20 X arlapxbz nzlu-krnge mz mq ncblo kxayo lcng,
Tzmaneutilr ninge mz nzapu-krdr kuli kz peto.
21 X mnc-ngalelvz ninge, murde ma tzluplxtilr ninge mz toki r vea scdr
Tzapulr nqngi poi kz peto.
Nzrlxngitingr
22 Mz nzyrlwr-lxblrkr leplz nemqng,
Sa nabilvzx nim, mz nzrpi-krbo mz mzlengeng da kx aleme bange.
23 Murde sa napipxbo badr kx, “Nigu kxnzawz neng Yawe, naglqlzku nide!
Eu. Nigu lr Israel na-amrlueku nide mz nzamatq-zvz-krgu nide!
24 Kxmule-esz' nigu kxnzobqszong, a' Gct trobqszoleu nzkxpu-krgung,
Murde trpxtxpx-ngrdeu nzayzlu-krmle natqgung.”
25 Delc Yawe, narka-ngrbo blz ngr nzawingr kc tqpibo, mz nzyrlwr-lxblrkr leplz nemqng.
Murde nim nou nzrglqlz-krnge.
26 X mz nibrde, sa nakrlcng mz dakxnzng
kx vzpxm mz blz kc tqkabo bam.
X sa naglqlzlr nim mz nzbrtikr drtwrdr nim.
Amrlz-zvzbz nidr mz nzmnc-zpwx-krdr.
27 Yawe, lr mrkzbleng amrlx sa na-aoti drtwrdr nim mz nzplzpx-krbzlr alwx ngrdr bam.
X neidu lcng amrlx sa na-angiolr nim,
28 Mz nzngini-krm King kx matq-esz'ngr
Kc tqaclve-zvzle nidr.
29 Delc kxnzetung badr leplz nedrng sa nayrngzobzng bam,
Mz nzavzo-lzbq-krbzlr bam.
30 X doa negrng kz sa nawztrpzng bam,
Mzli kc naxlrtr-ngrmlr bagr nrpa ngrm,
31 Mz nzrpi-krbzkr badr kx,
“Yawe arlapx-zvzle leplz nedeng.”