Sam Kranzpnu-li-nrade-pwx (24)
King Kc Tqmatq Vztr Mangr-nzangiongr Mz Mzteadau Nyzde
Nabz ne Devet.
Neke Takitrde Nzprtr-krde Mangr-nzangiongr
1 Nrlc atwrnrngr nyz Yawe,
X doa amrlx mz nrlc nedeng x da amrlx mz nrlc scdeng.
2 Murde nide Kxrpalz kc tqwz-ngrde nrlc,
X yrlqbzle prla x drtc' mz zmatq ngrde.
3 ?Mz nzaotikr drtwrgu zmatq lc, neke tubqbz bade nzvzdzbz mz newz nyz Yawe?
?X neke takitrde nzprtr-krde Mangr-nzangiongr nide?
4 Leplz kx nabzdr lq x nzmnc-krdr tubq
Nztakitrdr nzodutr-lxblr-krbzlr mz Yawe.
Natqdr nzangidati-zvzlr.
X trnzangiolru mqngr da kx nzlz.
5 Leplz kxnzmulr lcng nztubqbzng mz nzobqkr Yawe.
X Gct r Jekop lc sa na-amrlzle x na-arlapxle nidr.
6 Leplz lcng nzrtangrtilr me pnz drtwrde,
X suti drtwrdr nzxngi-krbzlr nzulrde mz Mangr-nzangiongr nide.
King Kc Tqmatq
7 Lvxpxbzmu bade naonrx ngr Jerusalem,
X naonrx ngr Mangr-nzangiongr kcng tqblzlongr,
Murde King kc Tqmatq navztrp.
8 ?King kznilc tqmatq?
Krlc Yawe, kc tqrninr, tqxplr.
Krkc tqaovxio zvz mz vea.
9 Lvxpxbzmu bade naonrx amrlx,
X naonrx kcng tqblzlongr,
Murde King kc Tqmatq navztrp.
10 ?King kznilc tqmatq?
Krlc Yawe, Ngrlrvea ngr ami nedeng.
Nide King kc Tqmatq.