Sam Kranzpnu-nzlvqn-nrade-li (52)
Kxetu Kx Atrkati Leplz Mz Zmatq Ngrde
Nabz ne Devet kx yrbzle mz kxrmailz ngr dzbe kxnzngrng, mzli kc Doek kc Edom tqvz-ngrbzle mz Sol mz nzrpi-krbzle kx, “Devet mncpe ma nyz Ahimelek.”
1 Kxmule-esz' nim ncblo kxetu kxmatq,
a' bzkq glqpx-lzbqq mz da kxtrka kcng tqaleq,
Murde Gct vz zvz nzangidati-krde natqde.
2 A' ryrlq-zvzq drtwr kx na-atrkati-ngrn leplz.
X mzli kc tqycmne-ngrn, natqm apule toki kx malc, mz nzpibqti-krm nidr.
3 Nzmrlz-zlwz-krbz da kxtrka bam myaszpxle da kxmrlz.
X mz drtwrm, nzpokia-krm myaszpxle nzrpi-krm da angidr.
4 Nim Mepokia,
X abrtz-zvz-ngrn nzaetq-krbzme drtq leplz mz natqmqng.
5 Delc sa nakilzpx-ngrm Gct nim ma nyzm mz nzodati-alope-krde nim.
X sa na-ayrkrpxbzle nzlu-krm mz nrlc ka.
6 X kxnztubqng sa na-amrlue-ngrdr Gct nzayrplapx-krde nim.
X sa nayrpalelvzlr nim mz nzrpi-krdr kx,
7 “Mcamu ena ncblo kc trmnc-xgleleu Gct.
A' axplr-lzbq mz nzatrkati-krde leplz x nztwz-krde trau kxkqlu mz zmatq ngrde.”
8 A' ninge sa na-apux nc olivi kc dzbrde tqtu-amqngi mz nzmncpx-krmc Mangr-nzangiongr,
Murde vz zvz nzbrtikr drtwrnge nzaodu-alokr Gct.
9 Delc Yawe, sa na-awi-zvz-ngrbo bam da kcng tqaletiqng.
X sa napipxbo mz leplz nemqng nzmrlz-zlwz-krm.