Sam Kranzpnu-esz'mz-nrade-pwx (64)
Drtwr Kxtrka Trngida-pnzu
Nabz ne Devet kx yrbzle mz kxrmailz ngr dzbe kxnzngrng.
Enqmi Rngeng
Gct, kxputxpex. Xlrm nzkrka'-krnge.
Mwxlrti-zlwzx enqmi rngeng. Arlapx ninge.
Tum mz nibrnge murde kxdrka'-ngrng nzyrlqng drtwr
Mz nzesabrti-krdr ninge.
Nzxngitrkr leplz nzycmne-krdr apule nzrlakikr toki r vea kx malc.
X nzpnz-krdr leplz mz natq kxtrka apule nipna.
Nzmnc-kapqng mz nzpnz-krdr kxnztubqng mz natq ngr nzpokiangr.
X trnzmwxlrung nzaniti-krdr nzatrkati-krdr nidr.
5-6 Nzapqtrlr drtwrdr mz drtwr kxtrka kx nzyrlqlr.
X nzamyatxlzpwzlr nzrkrlzkr leplz,
Mz nzrpi-lxblr-krdr kx, “Na-amwiku trtxki mz nzesabrti-krgu leplz.
X nzbrngztio-krgu lc da kxvz-rbr trpnzngr kx narmc x kx narkrlzti.”
Gct Rnge
A' Gct sa na-ayrplapx-anile nidr, na-apule kx pnzle nidr mz nipna scde.
X napwrkilvc-ngrdr nztupekr nipna ngrdr.
Sa na-atrkatile nidr murde nzrpiting natq kxtrka.
X sa nayrpalelvzng krkcng tzrmcng nidr.
X leplz amrlx sa namwxlrtilr Gct.
X sa na-aoti drtwrdr da kxmatq kc tqaleleng x nayapwxtipxlr.
10 Leplz kxnztubqng sa na-abrtzlvzlr Yawe x sa na-abrtrpzlr drtwrdr bade.
Leplz kx nabzdr lq sa na-awibzng bade.