Sam Kranzpnu-esz'mz-nrade-rpwxmz (69)
Nzkxpukr Ncblo Kxwztr-zvzbz Mz Yawe
Nabz ne Devet kx yrbzle mz kxrmailz ngr dzbe kxnzngrng.
Nabzpex
1 Gct, pi-zvzbo bam kx, “Arlapx ninge!”
Murde nzkxpu-krngeng nzaetunepxpeng.
X apupex rplz kc namrbropebz mz nrlr.
2 X apu-kzx kx twznede ninge drlr ngr nrc.
X mz nzboo-krnge, nabzpex, murde trpnzngr me nakcblztr-ngrne.
3 Gct, drtqnge satxpe x drtwrnge kaatxpe mz nzkqle-zvz-krnge nim.
Mzke' ngqbqtxtrpebz mz nzaenzli-zvz-krnge nzvz-krme.
4 Enqmi rngeng nzrpilr nanibqlr ninge murde nzxplr-zlwzng.
X nzpxtxpx-krdr lc ninge trpnzngr noude.
X nzkqlu-krdr nzmyaszpxlr nqnginarnge.
Nzpokiatitrlr ninge mz nzrpi-krdr kx nakabo trau rde. ?A' myx kxnamu nzka-krbo trau r da kx tralewxu?!
Nzxtrnga-ngrdr Ninge
5 A' Gct, nim txpwz kx rkrlz alwx rngeng,
Murde trnzyc-kapqpwzung bam.
6-7 Yawe, nim Ngrlrvea r ami nem,
X nim Gct r lr Israel.
Nzatrkatilr ninge murde lxngitix nim,
X nzamyati-zvz-ngrm drtqnge.
A' bzkq rlr-ngrme bange nzamyati-krbo drtq leplz nemqng,
Kcng tzlxngitilr x tzangiolr nim.
8 Murde apubo lr mrkzble mz lr mrnyznge,
X mzlengeng nzmapulrtr-ngrdr ninge peto.
9-10 Kxmule-esz' nzxtrnga-ngrdr ninge
Nzaxtx-krnge dakxnzng mz nzavzo-lzbq-krnge,
A' mz nzpq-zlwzkr nzaotikr drtwrnge Mangr-nzangiongr nim,
Apusr-ngrde ninge da kx nzangc mz nyr x yrkrtxo.
X natq kcng tzpikiti-ngrdr nim,
Yrplatr-kzpqng bange.
11 Nzyrpalelvzlr ninge
Mz nzpxi-krnge lrpz ngr nzvzkr drtwr.
12 Lr mztea nzpikitinedr ninge.
X ncblo kxnzrmnqng nzngr-xtrnga-ngrdr ninge.
Arlapx Ninge
13 Yawe, arlapx ninge mzli kznike mrlzbz bam
Mz nzmyalzkr zmrlz ngrm.
14 A' veclzm ninge mz mu ngr nzkxpu-krngeng.
X arlapxbz ninge mz nzngyatikr drtwr enqmi rngeng ninge.
15 Bzkq rlrpx-ngrn nzyrlemikr drlr ngr nrc ninge,
X bzkq botxo-alox mz nzbzlz-krmc mz gqpr.
16-17 Yawe, ninge kxnzawz nem. Ayzlum natqnge murde aodu-zvzq ninge.
X amrlz ninge murde yc mz drtwrm ninge.
Bzkq mnc-rlrume bange.
A' okatr ninge, murde nabznge talvzo.
18 Vzm bange
X xpepxbz ninge mz mq enqmi rngeng.
Ayrplapx Enqmi Rngeng
19 Murde krlzq enqmi rngeng amrlx,
Kxmu nzpibqti-krdr ninge x nzamyati-krmlr drtqnge.
20 Nzobqszo-krdr ninge yrnibungr nabznge.
Yrni-ngrne nzvzkr drtwrnge,
A' trpnzngr kxnaokatrle x na-amqtrple drtwrnge.
21 A' nzrkamqng nange dakxnzng kxpiz,
X mz nzbrlxkzkr drtwrnge, nzrkamqng mqnge waen kxrkx.
22 Yawe, kxmu nzmukr leplz lcng badr kztedrng Mangr-nzangiongr trtubqu mz nzobq-krm.
Delc, tzrtxlvzlz-mou-ngrdr alwx ngrdrng x takitrde nzodati-krm nidr.
23 Akcbz mztr,
X ayangrnga-zvzbz nrkrdrtqdr.
24 Ayrplapx nidr mz zngya ngr drtwrm,
Kc tqapule nyr kx nangc-ngrdr.
25 X batrpz nzbz-krdr,
Murde ma nyzdr namznrtx-alongr.
26 Rlxtibo bam da lcng murde ayrplapxpeq ninge,
A' nzrtxlvzlz-moplr nzetqkr drtqnge.
27 Delc alwx ngrdrng nartxlvzlz-kz-ngrdeng,
Murde ma tzprtrng mz nzripqpx-krm alwx.
28 Bzkq yroq drtqdr mz Buk ngr Nzlungr,
Mrkc tqyclz-ngrm drtq kxnztubq nemqng.
Nzrglqlzngr Gct
29 Gct, tangigx-zvzx mz nzetqkr drtqnge,
Mzli ka tqaenzlix nzmnc-zpwxngr kc navzm mz nzarlapx-krm ninge.
30 Murde na-angrlvzx nim,
X naglqlzx nim mz nzawingr.
31 Murde sa na-abrtz-ngrm nzangio-krnge nim
Namyaszlzle nzangc-krbo blz bam.
32 X leplz txneng na-abrtzng mz nzokatr-krm nidr,
Murde apqtr-mopwzme nabzdr.
33 Murde lalztqbzme mz kxtrnzrngiscung,
X trmrbrtru mz drtwrm leplz nemqng kcng tzkxpung.
34 Nimu bongavz x drtc' naglqpxamu Kxrpalz.
Nimu prla x dalr prla amrlx naglqlz-kzamu nide.
35 Murde sa na-arlapxle Mzteadau nyzde x sa na-atulz-moule mztea ngr Judz amrlx.
X kxnzwztrpzng bade namncng elr x nangi nyzdr drtc'.
36 X sa na-aprcbzle drtc' mz doa ne leplz nedeng,
Murde leplz kcng tzmrlztilr nide namnc-zvzng elr.