Sam Kranzpnu-rtqmz-nrade-tq (83)
Enqmi R Israel Mzli Kc Pnz X Mzli Ka
Nabz ne Asaf.
Enqmi Rmqng
1-2 Gct, bzkq mnc-lrpitxn,
Murde enqmi rmqng nzxpqbrlr-ngrdr nim.
3 Sa tzryrlqng drtwr kxyc-kapq kx na-atrkati-ngrdr nigr.
X nigr leplz nemqng kcng tqmrlzti-zlwzq.
4 Nzrpilr kx, “Naodatitxbzku mrnyzdr,
Murde drtq Israel namrbrtxtr alo mz drtwr.”
5-8 Enqmi kcng tzmnc-ngalelr Israel drtwrdr esz'ti
Mz nzprtr-krbzlr mz lr Amcn x lr Mcab, neidu lcng li nzvzpxmqng mz nqvi lr Lot.
Kxnztupeng badr me esz' nidr seleng:
Nqvi lr Isc, nqvi lr Ismael, neidu lr Haga, x neidu lr Amalek,
Lr mztea Taea, lr Gebal, x lr Filistia.
X lr Asiria kxnzxplrng nzngi tedr kz badr.
Ayrplapx Nidr
9-11 Gct, aovxio kz enqmi lcng mzli ka, da kc tqwai pnz nzaovxio-zvz-krm enqmi r melrmqgrng.
Ayrplapx nidr, da kc tqwai nzayrplapx-krm ami ne Jabin, King r lr Kenan x Ngrlrvea nede Sisera,
Mzli kc tqmilxtxo-ngrn nidr mz Lue Kison kc tqyc-aepztr mztea Endo,
X namz ngrdr mibio mrlcde mz mzli nyz Profet Debra.
X rlxti-kzpzkr nanibqti-kzq enqmi rgrng, da kc tqwaisr-ngrn mz lr Midizn mz nznibq-krm Oreb x Seeb, ngrlrvea ngrdrng.
X maneuti nidr da kc tqwai nzmaneuti-krm king rdr, Sebz x Salmuna, mz nznibq-krm nidr mz mq profet Gidion.
12 Murde leplz lcng pnz nzrpilr kx,
“Natwzku Israel, drtc' nyz Gct, nangi nyzgu.”
13 Gct, mz nzmu-krde lcde, apusrngr nidr bq r drtc',
X leu kxglr kx wqplr nenq.
14 Odati-atwrnrngr nidr, apubz badr nyr kxetu
Kc tqyrkrtxongr dalr peto x nardzng mz mzli r nepi.
15 Maneuting x amwxlrng
Mz nzapu-krbzme badr nounenq.
16 Yawe, amyatitx-zlwzbz drtqdr,
Murde nakrlz-ngrdr zmatq ngrm.
17 Aovxio alo x amwxlr alo nidr
Murde nzmya-zlwzkr drtqdr nanibqle nidr.
18 X mzli lc, sc tzkrlz-atepelr kx nim txpwz Gct kc tqmyatxlz-esz'ngr x drtqm Yawe.
X nim King kc tqaclvele nrlc tulvzo.