12
Ehifo ehyʼohujumirihisyangamo
1 Nga Musa geyongera aloma ati, “Gano njʼamagambi nʼebiragiro ebi muli nʼohufubaho ohugondera mu hyalo ehi Musengwa Hatonda wʼabasehulu benywe abaŋa ohuba omuŋuluko. Muli nʼohugagonderanga endaalo josijosi ejʼobulamu wenywe.
2 Ni muhena ohubbinga amawanga ago agamenyiremo, muli nʼohusihiirihisa erala ebifo byosibyosi omu bajumirihisya abahatonda baawe: hu sozi ŋamugulu, hu ngingi ko naŋaasi wʼemisaala.
3 Mubbwanganga ebituuti byawe ohubaŋeera eŋongo era mutematemanga esiiro jaawe. Mwohyanga ebifaananyi byʼAsera era mwabbwagabbwaga nʼebifaananyi bya bahatonda baawe ebibbote, mutuhiseŋo erala amasiina ga bahatonda baawe mu byalo ebyo.
4 “Simujumiryanga Musengwa Hatonda wenywe ngʼolu abaatu abo bajumirya abahatonda baawe.
5 Aye muli nʼohujumirihisyanga Musengwa Hatonda wenywe mu hifo ehi aja hutobola mu hyalo eyi mutiina. Mu hifo ehyo,
6 peyi muja huŋiranga ebirabo ebi bohya bihwiye byaguguliha nʼeŋongo jenywe nʼehirala ehyʼehumi nʼebirabo ebyawufu, ebyʼoweyamo nʼebirabo ebi wamwene osalaŋo ohuŋaayo ko nʼebyayo ebidaayi mu husaaliwa.
7 Enywe nʼabomu mago genywe mutiinanga mu hifo ehyo mwalya embaga mu moni ja Musengwa Hatonda wenywe, mwasangaala olwʼebyo byosibyosi ebi munaabenga ni musunire, olwohuba Musengwa Hatonda wenywe abaŋaaye ekabi.
8 “Simuholanga biitu ngʼolu mubihola hatyane, ngʼolu hiisi muutu aba nabona
9 olwohuba muhiiri hwola mu hifo ehyʼehiŋuumulo, ehyalo ehi Musengwa Hatonda wenywe ali hubaŋa ngʼobusika.
10 Aye muli huupi hwambuha olwabi Yoludaani, mumenye mu hyalo ehi Musengwa Hatonda wenywe ali hubaŋa. Nabaŋonianga abalabe benywe ababetooloye, mwasuna emiyaaya,
11 muŋiranga ebirabo ebi bohya ebihwiye byaguguliha nʼeŋongo lyenywe nʼehirala ehyʼehumi nʼebirabo ebyʼoweyamo nʼebirabo ebi omuutu omwene asalaŋo ohuŋaayo ko nʼebyayo ebidaayi mu husaaliwa, mu hifo ehi Musengwa Hatonda wenywe alitobola ohumujumirihisyangamo.
12 Eyo njʼeyi muja huliiranga embaga mu moni ja Musengwa Hatonda wenywe nʼesangaalo. Mutiinanga nʼabaana benywe abaseere nʼabahaana ko nʼabeedu benywe abahasi nʼabasinde bosibosi. Era muhebuliranga ohutiina nʼAbaleevi abali mu bibuga byenywe, olwohuba nibo sibaja husuna muŋuluko.
13 Wegenderesanga ohutaŋongeranga aŋaatu ŋosiŋosi ebirabo ebi bohya ebihwiye byaguguliha.
14 Oja huŋangayo eŋongo mu hifo ehi Musengwa alitobola mu twale erala hu biha byenywe. Eyo njʼeyi oja huŋeeranga eŋongo era njʼeyi oja huŋeeranga ebirabo ebi bohya ebihwiye byaguguliha era eyo peyi oja huholeranga byosibyosi ebi kulagira.
15 “Aye osaliranga ebyayo bibyo aŋaatu ŋosiŋosi aŋa oba ni wendire, walya enyama mu hibuga hyosihyosi. Olyanga enyama ngʼolu Musengwa Hatonda wuwo anaabenga nʼahuŋaaye ekabi. Mwesimwesi abalongoofu oba abatali balongoofu, mulyenga ebyayo ngʼolu mulya namaamya nʼenjobe.
16 Aye simulyanga malasire, mugajuhanga ngʼolu mujuha amaaji.
17 Nʼonaabenga nʼosalireŋo ohuŋaayo eŋongo eyiri Musengwa, soyiriranga mu bibuga byenywe omu mumenya. Wayire hiba hirala ehyʼehumi ehyʼengaano oba omwenge ogwomu mizabbibbu oba amafuta oba eŋombe nʼetaama nʼembusi jenywe endaayi mu husaaliwa, oba ebirabo ebyʼoweyamo nʼebirabo ebi wamwene osalaŋo ohuŋaayo oba ebirabo ebindi byosibyosi.
18 Oliranga ebiitu ebyo mu moni ja Musengwa Hatonda wuwo mu hifo ehi aja hutobola. Oliranga ŋalala nʼabaana babo abaseere nʼabahaana nʼabeedu babo abasinde nʼabahasi ko nʼAbaleevi abamenya mu bibuga benywe. Era osangaalanga mu moni ja Musengwa Hatonda wuwo olwʼebiitu ebyo byosibyosi.
19 Wegenderesanga ohutadanyirira Baleevi, endaalo jʼobulamu wuwo josijosi hu hyalo.
20 “Musengwa Hatonda wuwo nʼagalamyanga esalo jijo ngʼolu gahusuubisa, waŋemba hu hulya enyama, oja hulyanga ehiseera ehi wenderamo.
21 Singa ehifo ehi Musengwa Hatonda wuwo alitobola ohumujumirihisyangamo hiba ŋaleeŋi bugali, oja huŋambanga eŋombe oba etaama oba embusi eji Musengwa Hatonda wuwo aba nʼahuŋaaye, wasalira mu bibuga bibyo, ngʼolya enyama ngʼolu kulagira.
22 Omuutu yesiyesi omulongoofu oba atali mulongoofu analyenga hu nyama eyo, ngʼolu balya enjobe ni namaamya.
23 Aye simulya malasire olwohuba obulamu buli mu mafugi. Olwʼehyo, simulyanga enyama ehiirimo amafugi.
24 Mujuhanga amafugi ngʼolu mujuha amaaji.
25 Simulyanga malasire, ko ebiitu bibatiinire bulaŋi, enywe nʼolulyo lwenywe, olwohuba munahola muutyo, muba muholire ehisangaasa Musengwa.
26 Oŋambanga ebirabo bibyo ebyawufu ko nʼebyoweyamo wabiŋira mu hifo ehi Musengwa alitobola.
27 Oŋonganga hu hituuti hya Musengwa Hatonda wuwo, enyama nʼamafugi ebyʼeŋongo eyi bohya ni yiri kwiye yaguguliha. Aye amafugi gʼeŋongo ejindi ogajuhanga hu hituuti hya Musengwa Hatonda wuwo, ne enyama mwayirya.
28 Singa ofubangaho ohugonderanga ebiragiro ebyo byosibyosi ebi kulagira, ewe nʼabolulyo lulwo, oja huba bulaŋi emirembe nʼemirembe, olwohuba onaahabe ohola ehiitu ehiraŋi era ehisaana mu moni ja Musengwa Hatonda wuwo.
Ohulabula ohutajumirya ebitali Hatonda
29 “Musengwa Hatonda wuwo nʼasihiirisanga abaatu abamawanga ago, wababbinga ngʼohena omenya mu hyalo hyawe,
30 siwingiranga mu mutego gwawe wajumirya abahatonda baawe. Sobuusanga nʼohubuusa oti, ‘Abaatu abamawanga gano bajumirya baatye abahatonda baawe? Nenda keesi mbajumirye.’
31 Sojumiryanga Musengwa Hatonda wuwo mu ngeri eyi abaatu abamawanga ago bajumiryamo abahatonda baawe, olwohuba bajumirya abahatonda baawe ni bahola ebiitu ebyʼembiho ebi Musengwa acaawa. Boohya nʼabaana baawe ngʼeŋongo eyiri abahatonda baawe.
32 “Ofubangaho bugali ohugondera ebiragiro byosibyosi ebi kuŋa. Siwongerangaho oba huhendesaho hiitu hyosihyosi.”