26
Amakungula nʼehirala ehyʼehumi
1 “Ni wolanga mu hyalo ehi Musengwa Hatonda wuwo ali huhuŋa, watandiha ohumenyamo,
2 obugulanga hu hiisi hiha hyʼebibala ebidaayi ehi oba nʼohunguuye, waata mu hisero waŋira mu hifo ehi Musengwa Hatonda wuwo alitobola ohumujumirihisyangamo.
3 Ni woola mu hifo ehyo, otiinanga eyiri omusengi aba nʼali hu lubu mu hiseera ehyo wamuloma oti, ‘Olwaleero luno nijire nʼehirabo hino ehiraga ti ndi mu hyalo ehi Musengwa Hatonda wuwo oyu ŋeeresa galayirira abasehulu beefe ati aja hutuŋa.’
4 Ngʼomusengi oyo anaaŋa ehisero ahita hu hituuti hya Musengwa Hatonda wuwo.
5 “Ngʼaŋo mu moni ja Musengwa Hatonda wuwo oloma oti, ‘Sehulu yange Yakobbo gaali Mwalaamu asengujuha, gatiina gamenya e Misiri. Abaatu abomu mago gage baali batono aye ni bali e Misiri, basaala bafuuha egwanga ebbala era eryʼamaani.
6 Abamisiri ni batubisya wubi era batubonyaabonya, batufuula beedu baawe.
7 Ngʼaŋo huliririra Musengwa Hatonda wʼabasehulu beefe. Era gaŋulira ohulira hwefe, gabona enaku nʼohutubisya owubi ko nʼohunyigirisa ohu baali ni batunyigirisa.
8 Olwʼehyo, Musengwa gatutusa ohuŋwa e Misiri nʼobuŋangi nʼamaani gage ko nʼobubonero oweŋunjisa nʼebyamaliholiho.
9 Gatuleeta ŋano era gatuŋa ehyalo hino ehihuluhuta amabeere nʼomudugere!
10 Era ŋahani Musengwa ndetiire amakungula agasooka ohuŋwa mu binalima.’ Nʼohena ohuloma otyo, oŋambanga ehisero wahita mu moni ja Musengwa Hatonda wuwo, ngʼohubba amafuha omujumirya.
11 Ewe nʼabomu mago gago nʼAbaleevi nʼabalugendwa abamenyire ni nenywe, musaŋalyanga mwaliira ŋalala olwʼebiraŋi byosibyosi Musengwa Hatonda wuwo abaŋaaye.
12 “Hiisi luvanyuma lwʼemyaha edatu, oŋambanga hirala ehyʼehumi wahiŋirira Abaleevi nʼabalugendwa nʼabafuubbi ko nʼabanamwandu mu bibuga bibyo, bahaba nʼebyohulya balye beegute.
13 Ngʼaŋo oloma mu moni ja Musengwa Hatonda wuwo oti, ‘Pambire hu biwaapa mu mago gange nʼaleeta ohubiŋa Abaleevi nʼabalugendwa nʼabafuubbi nʼabanamwandu, ngʼolu wandagira ohuhola. Ŋaŋuma hiragiro ehimbwagire oba ehi nerabiiye.
14 Era ŋaŋuma hirala ehyʼehumi ehi nalya ni naali hu magombe oba ni tali mulongoofu era ŋaŋuma ehi naŋongera abafu. Ngondeeye Musengwa Hatonda wange era kolire hiisi hiitu ehi wandagira.
15 Kale heja ŋaasi hu hyalo, nʼoli mu hifo hihyo ehyawufu, oŋe abaatu babo Abayisirayiri ekabi, nʼeroba eri walayirira abasehulu beefe ohutuŋa, ehyalo ehihuluhuta amabeere nʼomudugere.’
Ohugondera Amagambi ga Musengwa
16 “Olwaleero, Musengwa Hatonda wuwo alagira ohugondera amagambi nʼebiragiro bibye. Ofubanga ohubigondera nʼomwoyo gugwo gwosigwosi nʼobulamu wuwo wosiwosi.
17 Olangiriiye olwa leero oti Musengwa nje Hatonda wuwo. Era musuubihiise ohugenderanga mu magira gage nʼohuhuumanga amagambi nʼebiragiro bibye era muuti munaholenga ebi abaloma.
18 Era Musengwa alangiriiye olwa leero luno ati muja huba baatu babe abenjawulo ngʼolu gasuubisa era ati mugonderenga ebiragiro bibye.
19 Era aja huhufuula mwegingihiriri hu mawanga gosigosi aga gatonda. Oja huba gwanga eryʼeŋono era erimanyiheene. Oja huba gwanga eryawufu eyiri Musengwa Hatonda wuwo ngʼolu gasuubisa.”