33
Musa asabira ebiha bya Yisirayiri ekabi
1 Musa, omuutu wa Hatonda nʼahiiri hufa, gasabira Abayisirayiri ekabi ati,
2 “Musengwa gaŋwa hu lusozi Sinaayi,
geeha ohutuyeeda era gaŋwayo hyʼesaawa gaaduha ohuŋwa e Seyiri,
era gaaduha ohuŋwa hu lusozi Parani.
Ekumi nʼekumi jʼabamalayika babe baali ni naye,
nʼomuliro ogwaduha ni gumuli mu mehiriro.
3 Mu butuufu Musengwa genda abaatu babe abawufu.
Era ahuuma ababe.
Olwʼehyo humuhubbira amafuha
era hugondera ebiragiro bibye.
4 Hugondera amagambi aga Musa gatuŋa,
amagambi ago hiitu hyʼomuŋendo bugali
eri egwanga lya Yakobbo.
5 Musengwa gafuuha habaha wa Yesuramu,
olu biha nʼabatangirisi Bayisirayiri
bahumbaana.”
6 Musa gaaloma hu hiha hya Lubbeeni ati,
“Leha abaatu ba Lubbeeni batafa
wayire baatu batono.”
7 Hu hiha hya Yuda galoma ati,
“Musengwa ŋulira ohulira hwa Yuda.
Bagobose ŋalala nʼebiha ebindi.
Basoolere, O Musengwa,
era obaŋonie abalabe baawe.”
8 Hu hiha hya Baleevi galoma ati,
“Musengwa, hwehula ohwenda huhwo nʼobitira mu Wurimu ni Samimu.
Nʼobita mu baŋeeresa babo
Abaleevi abesigwa, wabagesesya e Maasa.
Era wabategeera oti batuufu eyo hu maaji gʼe Meribba.
9 Abaleevi balaga baati ewe ohira abasaaye baawe,
nʼabaganda baawe era nʼabaana baawe.
Baaŋulira ebiragiro bibyo,
bahuuma endagaano yiyo.
10 Baja husomesa Yakobbo ohugondera ebiragiro,
Yisirayiri ohuŋamba amagambi gago.
Adunyisa obubbaani hu hituuti hihyo.
11 O Musengwa yeeda ehiha hyawe ohuba nʼamaani,
Era ebi bahola bihusangaase.
Tetenula abalabe baawe,
abo ababacaawa
batagobolamo hwinyoha nindi.”
12 Hu hiha hya Bbenjamini gaaloma ati,
“Hino njʼehiha ehi Musengwa genda era ahuuma.
Abagadirira hiisi haseera
era anaabenga mu bo.”
13 Hu hiha hya Yosefu gaaloma ati,
“Musengwa aŋe ehyalo hyawe efula,
ahiŋe amaaji agaŋwa mwiroba.
14 Ehyalo hyawe hibeemo ebibala
ebi mumwi guleetera ohulaba,
era libemo ebiraŋi ebya hiisi makungula.
15 Leha engingi jaawe ekalekale
muŋwemo ebiraŋi.
16 Ehyalo hyawe hiijule ebiraŋi byereere
ebi bulaŋi wa Musengwa buŋa ekabi,
oyo owalomera mu hadeŋo
ahaaduha omuliro.
Ekabi jino jibe hu Yosefu,
olwohuba gaali mutangirisi mu baganda babe.
17 Yosefu ali nʼamaani
hya gʼebunwa yʼeŋombe,
ali nʼameega hyʼagembogo.
Ameega gago, njʼemitwalo jʼAbamanase,
njʼemitwalo nʼemitwalo jʼAbefulayimu.
Agagunyisa amawanga,
era agasindigirisa eyo eyi hyalo hihoma.”
18 Hu biha bya Zebbulooni ni Yisikaali gaaloma ati,
“Leha Zebbulooni abe wʼekabi mu byamaguzi gage hu nyanja,
era leha obuŋinda wa Yisikaali weyongere engo.
19 Baliranga abamawanga agandi
ohutiina hu lusozi lwawe,
era baŋayo eŋongo etuufu.
Basuna ebyʼobuŋinda waawe mu nyanja,
nomu mujehe hwigobo.”
20 Hu hiha hya Gaadi gaaloma ati,
“Aŋeewe eŋono Hatonda oyo owagalamya ehyalo hya Gaadi.
Gaadi awundala hyʼepologoma,
ohunawulanawula omuhono
oba ehyanjo hyohu mutwe gwʼomuutu.
21 Baŋira ehitundu ehihirira erala obulaŋi,
bamubiihira omugabo gwʼomuŋugi.
Abatangirisi ba Yisirayiri ni bahumbaana ŋalala,
Gaadi gaahola ebiruŋamu ebi Musengwa genda era ebigalagira Abayisirayiri.”
22 Hu hiha hya Daani gaaloma ati,
“Daani ali hyʼenyana yʼepologoma,
Atuumatuuma ohuŋwa e Bbasani.”
23 Hu hiha hya Nafutaali gaaloma ati,
“Nafutaali, Musengwa owʼehisa
ahuŋaaye ekabi nyingi.
Ehyalo hihyo hiŋwa mu mehiriro hu nyanja eyʼe Galilaaya.”
24 Hu hiha hyʼAseri gaaloma ati,
“Aseri ali nʼekabi ohuhira ebiha ebindi.
Leha abe muhoda eyiri abaganda babe.
Era ehyalo hihye hiijule amafuta gʼemizayiti.
25 Ebibuga bibye bibeho obuhuumi wʼenjigi
ejʼehyoma nʼejehihomo.
Era amenyenga mu miyaaya.
26 “Enywe Yesuramu,
eŋuma hatonda ali hya Hatonda wenywe,
owefuga hwigulu mu bbanga,
mu ŋono eryʼamaani ohubayeeda.
27 Hatonda owʼemirembe nʼemirembe,
njʼehyehwehero hyenywe.
Emihono jije ejʼemirembe nʼemirembe
njʼeji badederera.
Abbinga abalabe benywe,
ngʼabaloma ati, ‘Mubasihiirise.’
28 Olwʼehyo, Yisirayiri yija humenya mu miyaaya,
abejuhulu ba Yakobbo banabenga nʼobuhuumi
mu hyalo omuli engaano nʼomwenge gwʼemizabbibbu,
ni bahijuhirira nʼolume ohuŋwa mwigulu.
29 Wesiimire ewe Yisirayiri!
Njʼani obundi ali hyʼewe,
egwanga eri Musengwa anoŋola?
Musengwa njʼengabo,
era njʼepiima yenywe eyibaŋa obuŋangusi!
Abalabe benywe baaja ni batya,
era oja hubatyakirira hu migongo.”