OHUŊUNUHA
Enyanjula
Ehitabo hino hyeyongera ohuloosa ebyafaayo ebiŋamba hu baatu ba Hatonda, Abayudaaya, ohuŋwa aŋa ehitabo hyʼEtandiha hihoma. Etandiha yʼehitabo hino yiroma hu Abayudaaya bosibosi ngʼolu baali beedu mu hyalo hyʼe Misiri aye Hatonda gaŋulira ohusaba hwawe ni basunga obuyeedi, ngʼatobola Musa ohuba mutangirisi waawe. Musengwa gamuŋa obusobozi ohubatangirira ohuŋwa e Misiri mu wiire olu geeta abaana abaseere abadaayi bosibosi ko nʼebyayo ebidaayi byosibyosi mu hyalo hyʼe Misiri aye gabihisya Abayisirayiri (Huŋ 1–12).
Aye wayire ngʼAbayisirayiri baali bafuuhire banunule, babonaabona bugali mu lulafu mu lugendo lwawe ni batiina mu hyalo hyʼe Kanani ehi Hatonda gasuubisa ohubaŋa. Bajeemeranga Hatonda aye ni boola hu lusozi Sinaayi, Hatonda gabaŋa Amagambi Ehumi ko nʼagandi aga baali nʼohuhuuma (Huŋ 13–20).
Ohwongera hu Magambi Ehumi, Hatonda gabaŋa ebiragiro ebiŋamba hu ngeri eyʼohumujumiryangamo ko nʼengeri eyʼohutongolamo ehifo aŋa abasengi baja humuŋeerangamo eŋongo nʼebirabo (Huŋ 21–40).
Hino njʼehitabo ehyohubiri hu bitaanu ebi Musa gaŋandiiha. Era bateberesa baati gahiŋandiha mu mwaha ogwa 1,400 ko basaale Yesu.
1
Abamisiri bagudya Abayisirayiri
1 Yakobbo oyu baali ni balanga erindi baati Yisirayiri ko nʼabasaani babe baatiina e Misiri, hiisi muutu nʼabomu mago gage. Era abasaani abo baali nje
2 Lubbeeni ni Simyoni ni Leevi ni Yuda
3 ni Yisikaali ni Zebbulooni ni Bbenjamini
4 ni Daani ni Nafutaali ni Gaadi ko nʼAseri.
5 Abaatu bosibosi abʼolulyo lwa Yakobbo baali sanvu. Mu hiseera ehyo, Yosefu gaali amenyire e Misiri.
6 Oluvanyuma, nga Yosefu nʼabalebe babe ko nʼabaatu abandi bosibosi abomu mulembe ogwo, baŋwa ohufa.
7 Aye Abayisirayiri basaala era beyongera obungi bugali, nga bejula ehyalo hyʼe Goseni.
8 Ngʼaŋo Falaawo omunyaha, owaali nʼatamanyire hyosihyosi ehyali ni hiŋamba hu Yosefu, gehala hu tebe yʼobuŋugi wʼegwanga lyʼe Misiri.
9 Nga Falaawo oyo aloma abaatu babe Abamisiri ati, “Bahyange mwetegerese hino ehi njahubalomera, Abayisirayiri beyongeeye obungi bugali era bʼamaani ohutuhira.
10 Olwʼehyo, hubasalire amagesi, ni hitali cʼehyo baja hweyongera obungi era singa ŋabaaŋo olutalo baja hweŋimba nʼabalabe beefe batusoosa nga bahena bedulumiraŋo.”
11 Olwʼehyo, baabataho abanyapala ohubanyigirisa nʼemirimo emigumu, batongolera Falaawo ebibuga ebi balanganga baati Pisomu ni Lameseesi, ebyohubungangamo ebiitu.
12 Aye Abamisiri aŋa bahomya ohunyigirisa Abayisirayiri, paŋa Abayisirayiri bahoma ohweyongera obungi nʼohuhwana mu gwanga eryo. Abamisiri beesinya Abayisirayiri
13 era babagudya bugali.
14 Abamisiri bahalubya obulamu wʼAbayisirayiri ni babatambisanga emirimo emigumu ejʼohuhubba amatafaali nʼohuholanga mu ndimiro nomu mago. Nga babatambisa byosibyosi ni batabasaasira.
15 Nga habaha wʼe Misiri aloma abasaŋu abahasi Ababbebbulaniya abasaalisa, aba baali ni balanga baati Sifura ni Puuwa ati,
16 “Ni mubanga ni musaalisa abahasi Ababbebbulaniya, ne mwabona omwana nʼali museere, mumwitanga. Aye nʼabanga muhaana, mumulehanga.”
17 Aye abasaŋu abasaalisa abo, baaŋa Hatonda eŋono, sibahola ngʼolu habaha wʼe Misiri gaali nʼabalagiiye, sibeeta baana abaseere.
18 Ngʼaŋo habaha wʼe Misiri atumisa bamulangira abasaalisa abo ababuusa ati, “Lwahiina muleha abaana abaseere baaba balamu?”
19 Ngʼabasaalisa bagobola mu Falaawo baati, “Abahasi Ababbebbulaniya sibali hya bahasi Abamisiri, olwohuba nibo bali nʼamaani, aŋa abasaalisa baboleraho, baba bahenire hale ohwesaalira.”
20 Nga Hatonda aŋa abasaŋu abasaalisa abo ekabi era Abayisirayiri beyongera hweyongera ohwala.
21 Era olwohuba abasaŋu abasaalisa baaŋa Hatonda eŋono, gaabaŋa amago.
22 Ngʼaŋo Falaawo aŋa abaatu babe bosibosi ehiragiro ati, “Hiisi mwana omuseere Omubbebbulaniya oyu basaala, mumudanyanga mu lwabi Kiyira, ne omwana omuhaana mumulehanga gabaŋo mulamu.”