32
Enyana yʼeŋombe eyi baabbota mu zaabbu
1 Olwola, abaatu ni baabona Musa nʼaluyeyo hu lusozi, behumbaania aŋʼAlooni gaali, nga bamuloma baati, “Sihumanyire ehyolire hu Musa, owatutusa mu hyalo hyʼe Misiri. Olwʼehyo, tuholereeyo abahatonda abanatutangirirenga.”
2 Ngʼehyo hireetera Alooni ohubaloma ati, “Mutuse epeta ejʼezaabbu ejiri hu matwi gʼabahasi benywe nʼabaana benywe abaseere nʼabahaana, mujindetere.”
3 Ngʼabaatu bosibosi betusamo epeta jaawe ejʼezaabbu ejaali hu matwi gaawe, bajiŋirira Alooni.
4 Nga Alooni anaaŋa ezaabbu ejo ahena ajisanuusa, awumbamo enyana yʼeŋombe. Ngʼaŋo abaatu baloma baati, “Yisirayiri, bano njʼabahatonda abahutusa mu hyalo hyʼe Misiri.”
5 Alooni ni gabona ebyo, gatongola ehituuti mu moni wʼehiwumbe ehyo, ngʼahena alangirira ati, “Olwejo, mu mugamba ŋaja hubaaŋo embaga ya Musengwa.”
6 Ni wahya, mu mugamba pwipwipwi abaatu benyoha baŋayo eŋongo eri bohya kwiye yaguguliha nʼeryohutabagana. Ngʼabaatu beehala balya, banywa era benyoha ohuhina mu ngeri eyʼobuŋemu.
7 Ngʼaŋo Musengwa aloma Musa ati, “Teremuha ogoboleyo, olwohuba abaatu babo aba watusa mu hyalo hyʼe Misiri, babbengire.
8 Mangu mangu baŋooye hale hu ngira eyi nabalagira ohugenderangamo. Babbotire enyana yʼeŋombe ohuŋwa mu zaabbu era nga bahena bayijumirya, bayiŋa nʼeŋongo baloma baati, ‘Yisirayiri, bano njʼabahatonda aba hutusa mu hyalo hyʼe Misiri.’ ”
9 Nga Musengwa aloma Musa ati, “Abaatu bano mbaweene bʼemyoyo mihahanyafu.
10 Olwʼehyo, ndehe mbahenereho obusungu wange, mbasihiirise. Aye ndihufuula ewe egwanga ebbala.”
11 Aye Musa gegayirira Musengwa Hatonda wuwe ati, “O Musengwa, lwahiina wenda ohenere obusungu buwo hu baatu babo aba watusa mu hyalo hyʼe Misiri nʼotambisa amaani amangi nʼobuŋangi?
12 Lwahiina wenda Abamisiri balome baati, ‘Watusa abaatu babo e Misiri nʼehigendererwa hyʼohubetira mu sozi, ohubasihiirihisa erala ohuŋwa hu hyalo?’ Kusunga wehubbe mu hifuba, otoosa habi hu baatu babo.
13 Hebulira Yibbulayimu ni Yisaka ni Yakobbo abaŋeeresa babo, aba ewe wamwene werayirira waloma oti, ‘Ndifuula abejuhulu benywe duuli hyʼemunyeenye hwigulu era nja hubaŋa ehyalo hino hyosihyosi ehi nasuubisa ohuba hyawe emirembe nʼemirembe!’ ”
14 Ngʼaŋo Musengwa gehubba mu hifuba, ndaleeta ndibo hu baatu babe ngʼolu gaali nʼalomire.
15 Nga Musa ateremuha ohuŋwa hu lusozi nʼaŋambire mu ngalo jije ebipande bibiri ebyʼamabaale, ebi baŋandiihaho hu njuyi jombi, mu moni nʼegongo.
16 Hatonda omwene njʼowahola ebipande ebyo ebyʼamabaale era njʼowabiŋandiihaho.
17 Yoswa ni gaŋulira abaatu ni bahayaana, ngʼaloma Musa ati, “Pulira abaatu mu kambi oti hani basoola.”
18 Aye Musa gamugobolamo ati, “Eryo sijanjaasi lyʼabahayaana olwʼobuŋangusi oba lyahulira olwʼohubawagala aye ejanjaasi eri pulira lyʼabaatu abemba.”
19 Musa ni gasembera ŋaapi nʼekambi, gaabona enyana yʼeŋombe nʼabaatu ni bahina, ehyo hyamusunguŋasa bugali gadanya ŋaasi ebipande byʼamabaale ebi gaali nʼaŋambire mu ngalo, mu materemuhiro gʼolusozi nga bibbwagijihamo.
20 Ngʼaŋo aŋamba enyana yʼeŋombe eyo eyi baali ni babbotire mu zaabbu ngʼayisanuusa nʼomuliro, ngʼahena ayiŋuula yifuuha oti gohe, ngʼayitabula mu maaji, aŋagia Abayisirayiri ohuganywa.
21 Ni gahena ngʼacuhira Alooni amuloma ati, “Abaatu bano baahuŋa hi, ko obaleetere ohuhola ehibi ehyola aŋo?”
22 NgʼAlooni amugobolamo ati, “Musengwa yange, otanyiigira, omanyire oti abaatu bano bulijo baŋeega hu huhola bibi.
23 Bandoma baati, ‘Tuholere abahatonda abanatutangiriremo, olwohuba sihumanyire ehyolire hu Musa, owatutusa mu hyalo hyʼe Misiri.’
24 Nga ese ko mbaloma ati, ‘Hiisi ali nʼezaabbu ayireete.’ Ni bayireeta, nayidanya mu muliro, nga muŋwamo enyana yʼeŋombe yino.”
25 Musa ni gabona Alooni naleteeye abaatu ohuŋaba baŋwa hu hituufu era ni bafuuhire njeho jababita eyiri abalabe baawe,
26 nga Musa gemeerera ŋa mulyango gwʼekambi abaloma ati, “Hiisi ali hu luuyi lwa Musengwa gaaje ŋano.” NgʼAbaleevi bosibosi bahumbaanira aŋa gaali bamweswanigirisa.
27 Ngʼabaloma ati, “Musengwa Hatonda wa Yisirayiri aloma ati, ‘Hiisi mulala hu enywe aŋambe epiima yiye abite mu kambi ohuŋwa hu mulyango ohwola hu mulyango ogundi, giite mugandawe nʼowemihago ni muliranwawe.’ ”
28 Era Abaleevi baahola ngʼolu Musa galagira, biita abaatu ngʼekumi edatu hu ludaalo olwo.
29 Nga Musa aloma Abaleevi ati, “Olwaleero babangaye ohuba baŋeeresa ba Musengwa olwʼohwita abaana benywe nʼabaganda benywe era Musengwa abaŋaaye ekabi.”
30 Oludaalo olwalondaho nga Musa aloma abaatu ati, “Mwaholire ehibi hibbala bugali! Leha tiine eyiri Musengwa nindi oba oli aŋo gabasoniŋa.”
31 Ngʼaŋo Musa agobolayo eyiri Musengwa amuloma ati, “Abaatu bano baahola hibi nyo, babbotire abahatonda mu zaabbu!
32 Olwʼehyo kwegayirira, obasoniŋe. Aye nʼotabasoniŋe, sanguule mu hitabo hihyo.”
33 Aye Musengwa galoma Musa ati, “Hiisi aholire ehibi, namusangule mu hitabo hyange.
34 Ŋaahani tiina, oŋire abaatu mu hifo ehi nahuloma. Malayika wange anahutangirirenga. Aye ehiseera hija ohwola mbonerese abaatu abo olwʼehibi hyawe.”
35 Era Musengwa gabaŋindihira haŋupuli olwohuba bajumirya enyana yʼeŋombe eyi Alooni gababbotera.