14
Yibbulaamu ayeeda Luuti
1 Mu hiseera ehyo, Amulafeeri habaha wʼe Sinali ni Ariyooki habaha wʼErasaali ni Kedolawomeeri habaha wʼElamu ni Tidali habaha wʼe Goyiimu,
2 basoola ni Bbeera habaha wʼe Sodoma ni Bbiruusa habaha wʼe Gomora ni Sinaabbu habaha wʼAduma ni Semebbeeri habaha wʼe Zebboyiimu ko ni habaha wʼe Bbeera (oba Zowaali).
3 Abahabaha abataanu bosibosi beŋimba, basoosa bala abane mu hiiho eri balanga baati Sidimu oba erungu lyʼEnyanja Eŋumamo Ehiramu.
4 Baali bahenire emyaha ehumi nʼebiri ni bali ŋaasi wa habaha Kedolawomeeri. Nga mu mwaha ogwʼehumi nedatu bamujeemera.
5 Mu mwaha ogwʼehumi nʼene, Kedolawomeeri nʼabahabaha bala abadatu, batiina basoosa abahabaha abataanu nga baŋangula Abareefa mu Asuterosi Kalumayimu nʼAbazuuzi e Kaamu nʼAbbeemi e Saave Kiriyasayimu
6 ko nʼAbakooli e Seyiri mu hyalo ehyʼesozi. Nga bababbinga baboosa Elupalaani huupi nʼolulafu.
7 Ni bahena, bagamayo Eni Misapaati (oba e Kadesi), nga baŋangula abaatu bomu twale lyʼAbameleki lyosiryosi era bahubba nʼAbamooli abaali ni bamenya e Kazazoni Tamali.
8 Oluvanyuma lwa bahabaha bala abane ohuŋangula, balumba abahabaha bala abataanu. Nga habaha wʼe Sodoma ni habaha wʼe Gomora ni habaha wʼAduma ni habaha wʼe Zebboyiimu ni habaha wʼe Bbeera oba Zowaali, batiina mu hiiho hyʼe Sidimu ohusoosa
9 Kedolawomeeri habaha wʼElamu ni Tidali habaha wʼe Goyiimu nʼAmulafeeri habaha wʼe Sinali ko ni Ariyooki habaha wʼErasaali. Baali abahabaha bane ni basoosa abahabaha bataanu.
10 Ehiiho hyʼe Sidimu hyali hyejuuye amaloŋo ga kolaasi era abahabaha bʼe Sodoma ni Gomora ni badulumanga nga bagwamo, abandi nga badulumira mu hyalo ehyʼesozi.
11 Ngʼabahabaha abane abo, banyaga ebiitu byosibyosi mu Sodoma ni Gomora nʼebyohulya byosibyosi nga bahena betiinira.
12 Era baŋiriramo ni Luuti omusaani wa muganda ya Yibbulaamu nʼebiitu bibye olwohuba gaali amenyire e Sodoma.
13 Mulala hu bakabonawo, gatiina ngʼalomera Yibbulaamu Omubbebbulaniya ati Luuti yeesi gaali alutiiniyemo. Yibbulaamu gaali amenyire huupi nʼemitumba ja Mamule Omwamooli, muganda yʼEsukoli ni Aneri. Abadatu abo bosibosi baali bameeri ba Yibbulaamu.
14 Yibbulaamu ni gaŋulira ati baŋiriyeemo ni Luuti omwana wa mugandawe, ngʼayungula eŋe eryʼabaatu bidatu ehumi namunaana aba basaalira mu mago gage era ni bali batendehe. Balonda hu bahabaha abo abane nga babagaana mu hifo ehi balanga baati Daani.
15 Nga mu wiire, Yibbulaamu agabaniamo abasooli babe ohubalumba, nga babahubba bababbinga ohwola e Kobba, ehyʼengulu nʼolengereeye e Damasiko.
16 Ngʼagobosa Luuti nʼebiitu bibye byosibyosi nʼabahasi ko nʼabaatu abandi.
17 Oluvanyuma lwa Yibbulaamu ohuŋangula Kedolawomeeri nʼabahabaha abandi, habaha owʼe Sodoma gatiina ohwagaanana ni naye mu hiiho eri balanga baati Saave. Ehiiho ehyo aŋandi bahiranganga baati lwiho lwa habaha.
18 Ngʼaŋo Melukezedeki habaha wʼe Saalemu abaŋirira emere nʼomwenge ogwomu mizabbibbu. Melukezedeki gaali musengi wa Hatonda Ali Ŋamugulu Obugali.
19 Nga Melukezedeki aloma ati,
“Hatonda Ali Ŋamugulu Obugali,
owatonda egulu nʼehyalo,
aŋe Yibbulaamu ekabi.
20 Era aŋeewe eŋono Hatonda Ali Ŋamugulu Obugali,
ahuŋambiyeho waŋangula abalabe babo.”
Ngʼaŋo Yibbulaamu aŋamba hirala ehyʼehumi ehyʼebyo ebi ganyaga, aŋa Melukezedeki.
21 Ngʼaŋo habaha wʼe Sodoma aloma Yibbulaamu ati, “Kusunga wuupe abaatu aba ogobohiise aye osigase ebiitu.”
22 Ne Yibbulaamu ngʼaloma habaha wʼe Sodoma ati, “Kolire endagaano ni Musengwa Hatonda Ali Ŋamugulu Obugali, owatonda egulu nʼehyalo,
23 ti sinja huŋira hiitu hihyo hyosihyosi wayire ahahoba hʼengayito oba olubuuzi olwohuba ohanda waloma oti, ‘Yibbulaamu gagagaŋalira mu biitu byange.’
24 Ŋaŋuma ehi nja ohuŋira ohutusaho ebi basooli bange baliiye. Aye Aneri ni Esukoli ni Mamule, bali nʼohuŋiraho omugabo olwohuba batiinire ni neese mu lutalo luno.”