3
Ohwonoona hwʼomuutu
1 Musengwa Hatonda gatonda esolo josijosi aye omusota gwali mugesigesi ohuhira josijosi. Ngʼaŋo lulala guloma omuhasi guuti, “Kaho Hatonda galoma ati, ‘Simulyanga hu bibala byʼomusaala gwosigwosi hu misaala jomu ndimiro’?”
2 Ngʼomuhasi agugobolamo ati, “Huli badembe ohulya hu bibala byʼemisaala jomu ndimiro
3 ohutusaho Hatonda galoma ati, ‘Simulyanga hu bibala byʼomusaala oguli ŋagati wʼendimiro era nʼohuguŋambaho simuguŋambangaho, ni muli hihola muja hufa.’ ”
4 Ngʼomusota gumuloma guuti, “Mu butuufu simuja hufa.
5 Hiri hiityo olwohuba Hatonda amanyire ati olu muligulyaho, emoni jenywe jija hulimbuha era mwesi mube hya Hatonda, ohumanya ehiraŋi nʼehibi.”
6 Omuhasi ni gabona ehibala hyʼomusaala ni hiboneha bulaŋi era ni hisaanira ohulya nga gegomba ohuhirya olwohuba hyali hireeta amagesi, kale nga anoga alya. Ngʼaŋaho ni wamwe yeesi owaali ŋalala ni naye.
7 Ngʼaŋo emoni jaawe bombi jiiguha nga betegeera baati baali majula. Olwʼehyo banabanabania amahoola gʼemitiini, nga betaaho.
8 Egulo ni lyola, ngʼAdamu nʼomuhasi wuwe baŋulira Musengwa Hatonda nʼagenda mu ndimiro. Ni baŋulira, behweha hu Musengwa Hatonda ŋagati mu misaala ejomu ndimiro.
9 Nga Musengwa Hatonda alanga Adamu amubuusa ati, “Oli ŋeena?”
10 NgʼAdamu amugobolamo ati, “Ni puliiye nʼogenda mu ndimiro, obuti bupambire nga nehweha olwohuba mbaye majula.”
11 Ngʼamubuusa ati, “Omanyire otye oti oli majula? Oliiye hu bibala byʼomusaala ogu nahugaana ohulyaho?”
12 NgʼAdamu amugobolamo ati, “Omuhasi oyu waapa ohubanga ni neese njʼowupaaye ehibala, nga ndya.”
13 Nga Musengwa Hatonda abuusa omuhasi ati, “Oholire hiina ehyo?”
Ngʼomuhasi aloma ati, “Omusota njʼogukooŋire, nga ndya.”
14 Nga Musengwa Hatonda aloma omusota ati,
“Olwohuba ohooŋire omuhasi,
osunire ehiraamo ohuhiraho ebyayo
ko nʼesolo josijosi ejomwisugu!
Onagenderenga hida
era onalyenga fuuhe
endaalo josijosi ejʼobulamu buwo.
15 Era nja hutaaŋo obulabe
ŋagati wuwo nʼomuhasi,
naŋagati wʼolulyo lulwo nʼolwomuhasi.
Omwana wuwe aja hutetenula omutwe gugwo
era weesi oja hubbonja ehibbonje hihye.”
16 Ngʼaloma omuhasi ati,
“Nja huhwongeraho obulumi nʼosaala
era oja husaaliranga mu bulumi.
Onaŋembenga hu wamwo
era aja huhuŋuganga.”
17 Ngʼaloma Adamu ati,
“Olwohuba oŋulirihiise omuhasi wuwo,
walya hu hibala hyʼomusaala ehi nahugaana,
hu lulwo eroba lisunire ehiŋwabo.
Onahalabanenga ko wasuna ehyohulya
endaalo josijosi ejʼobulamu buwo.
18 Eroba linamerenga amaŋwa amahosa nʼamanani
era onalyenga bimera byomwisugu.
19 Onahahaluhanenga era watuyaana ko wasuna ehyohulya
ohwola olu olyagama mwiroba,
olwohuba omwo pomu waŋwa.
Era olwohuba oli loba,
mwiroba muweene omwo pomu olyagama.”
20 Ebyo ni baŋwa, ngʼAdamu aguliha omuhasi wuwe esiina ati Kaawa, olwohuba gaali aja hufuuha nyina wʼabaatu bosibosi.
21 Nga Musengwa Hatonda aholera Adamu nʼomuhasi wuwe ebyambalo mu byanjo, ngʼabambasa.
22 Nga Musengwa Hatonda aloma ati, “Ŋaahani omuutu afuuhire hyefe, amanyire ehiraŋi nʼehibi. Hutamuleha hunoga alye hu musaala oguleeta obulamu ohuwangala emirembe nʼemirembe.”
23 Nga Musengwa Hatonda amubbinga ohuŋwa mu ndimiro Edeni, amuŋindiha aje alime eroba omu gamuwumba.
24 Oluvanyuma lwʼohubbinga omuutu mu ndimiro Edeni, Hatonda gaata ebuŋwalyuba wʼendimiro abakerubbi nʼepiima emasamasa ni yetala, ohuhuuma omuutu ohutalya hu musaala oguleeta obulamu.