5
Ohuŋwa hwʼAdamu ohwola hu Nuwa
1 Luno njʼolwanji lwʼamasiina gʼabaatu abomu lulyo lwʼAdamu. Hatonda ni gawumba omuutu, gamuwumba mu hifaananyi hihye.
2 Gawumba omusinde nʼomuhasi, ngʼahena abaŋa ekabi. Ngʼabalanga ati baatu.
3 Adamu ni gahena emyaha cikumi mwasatu, gasaala omwana museere owaali nʼamufaanana, mu hifaananyi hihye ehyene era ngʼamuguliha esiina ati Seezi.
4 Oluvanyuma lwʼohusaala Seezi, Adamu gahena emyaha lunaana, ngʼasaala abaana abandi abaseere nʼabahaana.
5 Ŋosiŋosi Adamu gahena emyaha lwenda nʼadatu, ngʼafa.
6 Seezi ni gahena emyaha cikumi nʼetaanu, ngʼasaala Enosi.
7 Oluvanyuma lwa Seezi ohusaala Enosi, gahena emyaha lunaana namusanvu ngʼasaala abaana abandi abaseere nʼabahaana.
8 Ŋosiŋosi, Seezi gahena emyaha lwenda ehumi nʼebiri, ngʼafa.
9 Enosi ni gahena emyaha cenda, gasaala Kenani.
10 Oluvanyuma lwʼEnosi ohusaala Kenani, gahena emyaha lunaana ehumi nʼetaanu, gasaala abaana abandi abaseere nʼabahaana.
11 Ŋosiŋosi Enosi gahena emyaha lwenda nʼetaanu, ngʼafa.
12 Kenani ni gahena emyaha sanvu, gasaala Mahalalyeri.
13 Oluvanyuma lwa Kenani ohusaala Mahalalyeri, gahena emyaha lunaana mu ana, gasaala abaana abandi abaseere nʼabahaana.
14 Ŋosiŋosi Kenani gahena emyaha lwenda nʼehumi, ngʼafa.
15 Mahalalyeri ni gahena emyaha kaaga nʼetaanu, gasaala Yaledi.
16 Oluvanyuma lwa Mahalalyeri ohusaala Yaledi, gahena emyaha lunaana mwasatu, gasaala abaana abandi abaseere nʼabahaana.
17 Ŋosiŋosi Mahalalyeri gahena emyaha lunaana mu cenda nʼetaanu, ngʼafa.
18 Yaledi ni gahena emyaha cikumi nakaaga nʼebiri, gasaala Enoka.
19 Oluvanyuma lwa Yaledi ohusaala Enoka, gahena emyaha lunaana, ngʼasaala abaana abandi abaseere nʼabahaana.
20 Ŋosiŋosi Yaledi gahena emyaha lwenda kaaga nʼebiri, ngʼafa.
21 Enoka ni gahena emyaha kaaga nʼetaanu, gasaala Mesuseela.
22 Oluvanyuma lwʼEnoka ohusaala Mesuseela, ngʼaba nʼekolagana endaŋi ni Hatonda ohuhena emyaha bidatu era gahena gasaala abaana abandi abaseere nʼabahaana.
23 Ŋosiŋosi, Enoka gahena emyaha bidatu kaaga nʼetaanu.
24 Mu bulamu wuwe, Enoka gaali nʼekolagana endaŋi ni Hatonda era lwali lulala nga Hatonda amutusa mu hyalo muno nʼahiiri mulamu.
25 Mesuseela ni gahena emyaha cikumi mukinaana namusanvu, gasaala Lameeka.
26 Oluvanyuma lwa Mesuseela ohusaala Lameeka, gahena emyaha lusanvu kinaana nʼebiri ngʼasaala abaana abandi abaseere nʼabahaana.
27 Ŋosiŋosi, Mesuseela gahena emyaha lwenda kaaga namwenda, ngʼafa.
28 Lameeka ni gahena emyaha cikumi kinaana nʼebiri, gasaala omwana omuseere.
29 Omwana oyo gamuguliha esiina ati nje Nuwa, nʼaloma ati, “Omwana ono alituleetera ehiŋuumulo ohuŋwa mu huhalabana nʼohutegana ohwaja Musengwa ni gaholimira eroba.”
30 Oluvanyuma lwʼohusaaliwa hwa Nuwa, Lameeka gahena emyaha bitaanu cenda nʼetaanu ngʼasaala abaana abandi abaseere nʼabahaana.
31 Ŋosiŋosi, Lameeka gahena emyaha lusanvu sanvu namusanvu, ngʼafa.
32 Oluvanyuma lwa Nuwa ohuhena emyaha bitaanu, gasaala Seemu ni Kaamu ko ni Yafeesi.