2
Yoswa atuma embega e Yeriko
1 Ngʼaŋo Yoswa omusaani wa Nuuni atuma abambega babiri ohuŋwa e Sitimu, ngʼabaloma ati, “Mutiine mwetegerese ehyalo hyʼe Kanani ohusingira erala ehibuga Yeriko.” Nga batiina, ni boola bengira mu nyumba yʼomuhasi malaaya oyu balanganga baati Rahabbu, nga baŋenyuha eyo.
2 Nga balomera habaha wʼe Yeriko baati, “Bona! Balala hu Bayisirayiri baajire ehyegulo hino ohuheeta ehyalo hyefe.”
3 Nga habaha wʼe Yeriko aŋindiha abasirikale ewa Rahabbu bamuloma baati, “Tusayo abaatu abaajire mu nyumba yiyo olwohuba ehi baleetire huheeta hyalo hyefe.”
4 Aye omuhasi oyo gaali aŋambire abasinde abo bombi nʼabahwehire. Ngʼabagobolamo ati, “Hituufu abasinde abo baajire aye simanyire eyi baŋwereeye.
5 Ehiirema ni hyenda ohuŋamba, mu hiseera ehyohwigalaŋo omulyango gwʼehibuga, paŋa basinde abo baŋwereeyeŋo. Sinamanyire ngira eyi baŋambire. Mubalondeho mangu, muŋanga mwabagaana.”
6 Aye gaali abaŋirire ŋamugulu hu nyumba nʼabahwehire mu bihangala ebi gaali ni ganjaaye bulaŋi hu hasolya.
7 Ngʼabasirikale abo basimbuha balonda hu bambega abo hu luguudo olutiina aŋa bambuhira olwabi Yoludaani. Aye ni batula baati mu hibuga, nga begalaŋo omulyango.
8 Abambega abo ni baali ni bahiiri huŋenyuha, nga Rahabbu atiina aŋa baali hu nyumba
9 abaloma ati, “Manyire ti Musengwa abaŋaaye ehyalo hino. Era hiisi muutu mu hyalo hyefe hino ali hulebera ekoba olwenywe.
10 Hwaŋulira ngʼolu Musengwa gomeesa amaaji gʼEnyanja Enando ni muŋwa e Misiri. Era hwaŋulira ehi mwahola abahabaha ababiri abʼAbamooli, Sihoni ni Ogi, abaali ebuŋwalyuba wʼolwabi Yoludaani, aba mwasihiirihisa erala.
11 Ni hwaŋulira ebyo, hwaŋwamo amaani olwenywe. Musengwa Hatonda wenywe, nje Hatonda owa ŋamugulu mwigulu nohu hyalo huno.
12 “Ŋaahani mundayirire mu moni ja Musengwa, muuti muja humbisya ese nʼolulyo lwange bulaŋi ngʼolu ese mbabihisye bulaŋi. Era muupe ahabonero ahanahahase
13 haati simuja hwita bbaabba ni maama nʼababoojo bange nʼabaganda bange ko nʼabomumago gaawe era mutuŋonie ohufa.”
14 Ngʼabasinde abo beeyama baati, “Hatonda atusihiirisanga singa sihuhola ehi huhuloma. Huhuhahasa huuti, singa solomera muutu yesiyesi ehi hubaaye ni huhola ŋano, Musengwa nʼalituŋa ehyalo hino, hulibabisya bulaŋi.”
15 Ngʼaŋo Rahabbu aŋamba omugoye abehisaho ŋaasi nʼababisya mu dinisa. Enyumba yiye baali bayitongooye hu hiteepe ehyeswanigirisanga ehibuga.
16 Ngʼabaloma ati, “Mutiine mu hyalo hyʼesozi ko ababaŋiima batababona. Mwehwehe eyo ohuhena endaalo edatu ohwola olu banahagoboleŋo, oluvanyuma mwetiinire eyi mwetiinira.”
17 Ngʼabasinde abo bamuloma baati, “Ehirayiro ehi otulomire ohulayira, sihija huhola ni hunahaaje ohuwaagala ehyalo hino
18 ohutusaho nʼosidihire olugoye olulando mu dinisa muno omu oja hutwihisa ŋaasi era wengisa mu nyumba yiyo lataawo ni maawo nʼababoojo babo nʼabaganda babo ko ni naabo bosibosi abomu nyumba ya lataawo.
19 Ni ŋalibaŋo omuutu yesiyesi atula mu nyumba yiyo, nʼafanga omwene guliba gugwe sosi efe. Aye anahasune ehigosi hyosihyosi nʼali ni neewe mu nyumba, ehyo hinahabe hituŋambaho.
20 Aye singa olomeraho omuutu yesiyesi gamanya ebi huliho, ehyo hija huba hibbwagireŋo oweyamo obu otulomire ohweyama.”
21 Ngʼaŋo Rahabbu abagobolamo ati, “Fugiriiye, leha hibe ngʼolu mulomire.” Ngʼahena abaseebula batiina. Nga Rahabbu asidiha olugoye olulando mu dinisa.
22 Abasinde abo nga basimbuha batiina mu hyalo hyʼesozi, nga babaayo endaalo edatu ohwola olu abaali ni babaŋiima bagamayo. Babaheja mu magira gosigosi aye sibababona.
23 Ngʼaŋo abasinde ababiri abo baserengeta baŋwa mu hyalo hyʼesozi bambuha olwabi Yoludaani, nga bagamayo eyiri Yoswa omusaani wa Nuuni, nga bamuŋayira byosibyosi ngʼolu byali.
24 Ngʼaŋo baloma Yoswa baati, “Mu butuufu Musengwa alihutuŋa ehyalo ehyo hyosihyosi. Abaatu baayo balihulebera ekoba olwefe.”