14
Obunaabbi wa Ahiya eyiri Yerobbowaamu
1 Mu hiseera ehyo, Abbiya omusaani wa Yerobbowaamu galwala.
2 Nga Yerobbowaamu aloma omuhasi wuwe ati, “Weholaholanie ŋaŋume ahufaania ati ndiiwe muha Yerobbowaamu, otiine e Siilo ewa naabbi Ahiya owandoma ati nja hufuuha habaha wa Yisirayiri.
3 Muŋirire ebirabo bino: emigaati ehumi ni keeki nʼomudugere. Aja huhulomera ebija hwola hu mwana.”
4 Ngʼomuhasi wa Yerobbowaamu ahola ngʼolu wamwe gamuloma, ngʼatiina e Siilo ewa Ahiya.
Mu hiseera ehyo, Ahiya gaali saabona olwʼobusahulu.
5 Aye Musengwa gaali amulomeeye ati, “Omuhasi wa Yerobbowaamu ali huuja ohuhubuusa ebiŋamba hu musaani olwohuba mulwaye. Oja humugobolamo hino ni nehira. Aja hwefuula ohuba omuutu oyu atali.”
6 Ahiya ni gaŋulira epindo ŋa mulyango, ngʼaloma ati, “Yingira, manyire ti ndiiwe muha Yerobbowaamu. Lwahiina wefuula ohuba muutu oyu otali? Ndi nʼamaŋuliro amabi.
7 Yagama olome Yerobbowaamu oti Musengwa Hatonda wa Yisirayiri aloma ati, ‘Nahutobola mu baatu bosibosi nahufuula habaha wʼabaatu bange Abayisirayiri.
8 Namaamula hu bʼolulyo lwa Dawudi owahabaha nabuhuŋa aye soobe hyʼomuŋeeresa wange Dawudi, owaŋambanga ebiragiro byange era geŋeerayo erala eyi ndi nʼomwoyo mulala gaholanga ebiraŋi mu moni jange.
9 Aye ewe oholire ebibi ohuhiraho abo abahweheerera ohubaaŋo. Webboteeye abahatonda abandi ohuŋwa mu byoma, wandeetera ohunyiga olwʼohukubba omugongo.
10 “ ‘Olwʼehyo, nja huleeta endibo hu lulyo lwa Yerobbowaamu. Nja husihiirisa hiisi musinde mu lulyo lwa Yerobbowaamu mu Yisirayiri, haabe mwidu oba bbe. Nja hwohya amago ga Yerobbowaamu hyʼolu muutu goohya amahisye, gosigosi gaŋwaŋo.
11 Embwa jija hulya abaatu ba Yerobbowaamu abalifiira mu hibuga, esega jirye abo abalifiira mu byalo. Hiriba hiityo olwohuba Musengwa njʼahiromire.’
12 “Ne ewe yagamayo engo. Onaabe waholanga mu hibuga oti, ngʼomwana afa.
13 Abaatu bosibosi mu Yisirayiri baja humulira ko bamusiihe. Era oyo yeŋene mu lulyo lwa Yerobbowaamu njʼaja husuna ekabi oyʼohumusiiha olwohuba njʼoyu Musengwa Hatonda wa Yisirayiri aweenemo ahalaŋi.
14 “Musengwa aja husuna habaha aja huŋuga Yisirayiri era asihiirise amago ga Yerobbowaamu. Era ehyo hisobola ohubaaŋo nʼolwa leero luno.
15 Era Musengwa aja huboneresa Yisirayiri, hija huba hyʼamaaji ngʼolu gatengesya olugada. Aja husiikula Yisirayiri ohuŋwa mwiroba eraŋi eri gaaŋa abasehulu baawe, ahene abasalaanie engereha wʼolwabi Yufuleeti olwohuba ni bebbotera Asera ohuba hatonda waawe, basunguŋasa Musengwa.
16 Era aja huhubba Abayisirayiri omugongo olwʼebibi bya Yerobbowaamu era aleeteeye Abayisirayiri ohubihola.”
17 Ngʼaŋo omuhasi wa Yerobbowaamu genyoha gagama mu hibuga Tiruza. Gaali gahoolanga ŋa mulyango gwʼenyumba ati bbepa, ngʼomwana afa.
18 Bamusiiha era abaatu bosibosi mu Yisirayiri bamulira ngʼolu Musengwa gaali nʼalomire mu muŋeeresa wuwe naabbi Ahiya.
19 Ebiitu ebindi mu buŋugi wa Yerobbowaamu, etalo eji gasoola nʼengeri eyi gaŋugamo, babiŋandiiha mu hitabo hyʼebyafaayo byʼabahabaha ba Yisirayiri.
20 Gaŋuga emyaha abiri nʼebiri ngʼafa, alonda hu basehulu babe. Nga musaani wuwe Nadabbu agobola mu magulu gage nga habaha.
Rehobbowaamu habaha wa Yuda
21 Rehobbowaamu omusaani wa Sulemaani gaali habaha wa Yuda. Gafuuha habaha nʼali nʼemyaha ane namulala era gaŋuga emyaha ehumi namusanvu ni gehala mu Yerusaalemu ehibuga ehi Musengwa gatobola mu Yisirayiri ohumujumirihisyangamo. Nyina gaali nje Naama, omuhaana Mwamooni.
22 Abaatu bomu Yuda bonoona mu moni ja Musengwa era bamuleetera ohuluŋa olwohuba bahola ebibi nʼohuhiraho ebi abasehulu baawe bahola.
23 Betongolera amasabo, babaaja nʼesiiro ejʼamabaale ajʼohusengerangaho ko nʼehibbote hyʼAsera babihomeha mu hiisi hifo ehyʼolugingi naŋaasi wa hiisi musaala.
24 Era mu masabo gomu Yisirayiri mwalimo abasinde abamalaaya abaŋenyuha nʼabasinde bahyawe. Abaatu bosibosi baŋwera mu huhola ebiitu ebyʼembiho ebi mawanga aga Musengwa gabbinga ohuŋweraŋo Abayisirayiri, gaholanga.
25 Mu mwaha ogwohutaanu ogwʼobuŋugi wa habaha Rehobbowaamu, Sisaki habaha wʼe Misiri gawaagala Yerusaalemu.
26 Ganyaga ebyʼobuŋinda ebyomu nyumba ya Musengwa nʼebyomu lubiri. Gaŋira hiisi hiitu nga pomuli nʼengabo ejʼezaabbu josijosi eji Habaha Sulemaani gaabbota.
27 Olwʼehyo, habaha Rehobbowaamu gabbotesa engabo ejindi ohuŋwa mu hihomo ohugobosaŋo jira eji banyaga. Ngʼaŋamba engabo ejo ajiŋa abaduumisi babahuumi, abahuumanga omulyango ogwohu lubiri bajeyeedese.
28 Era hiisi olu habaha gatiinanga mu nyumba ya Musengwa, abahuumi baŋambanga engabo ejo batiina ni naye. Era oluvanyuma nga bajagamya mu hifo aŋa bajihuumiranga.
29 Ebiitu ebindi byosibyosi ebyʼomubuŋugi wa Rehobbowaamu ni neebyo ebi gahola, babiŋandiiha mu hitabo hyʼebyafaayo byʼabahabaha ba Yuda.
30 Ŋaalingaŋo etalo eja hiisi hiseera ŋagati wa Rehobbowaamu ni Yerobbowaamu.
31 Nga Rehobbowaamu afa bamusiiha mu mbafu jʼabasehulu babe mu ehibuga hya Dawudi. Nyina gaali nje Naama, omuhaana Mwamooni. Ngʼomusaani oyu balanganga baati Abbiyamu amugobola mu magulu nga habaha.