Ebbaluŋa endaayi eya
Peetero
Enyanjula
Owaŋandiiha ebbaluŋa ya Peetero endaayi gaali nje Peetero omuhwenda wa Yesu. Peetero gatandiha ebbaluŋa yino nʼaloma ehi gaali nʼeyi gaali nʼaŋandiihira. Ebbaluŋa yino, gayiŋandiihira abafugiirira Kurisito bosibosi aba galanga ati “balugendwa” mu hyalo muno (1:1, 1:17; 2:11). Engeri ebbaluŋa yino, yifaananaho nʼebbaluŋa eyi Pawulo gaŋandiihira Abefeeso, bangi baŋeega baati Peetero gayiŋandiiha mu mwaha ogwʼenkaaga nʼetaanu oluvanyuma lwʼohusaaliwa hwa Kurisito. Peetero gaŋandiiha ebbaluŋa yino nʼali e Rooma, eyi galanga mu ndoma eyʼohubbumbirya ati Bbebbulooni (5:13).
Peetero gaŋandiiha ebbaluŋa yino ohubagobosamo amaani nʼabaloma ati “...mu hubonaabona Hatonda abaŋeramo ekabi, olwʼehyo mutaŋwamo maani.” (5:12). Ŋaliŋo ohufaanana ŋagati wa 1 Peetero 2:11–3:7 nʼAbefeeso 5:18–6:9 nʼAbakolosaayi 3:18–4:6. Enyiriri ejo josijosi, jisomesa hu mago nʼohugondera abaŋugi. Era Peetero ahubbirisa abafugiirira Kurisito ohugumira ohubonaabona olwohuba ekomerero yiri huupi (4:1).
Ebiri mu bbaluŋa yino mu buupi
1. Peetero geyanjula (1:1-2).
2. Ohweyaasa Hatonda olwʼobunoŋosi (1:3–2:10).
3. Engeri eyʼohumenyamo (2:11–4:11).
4. Ohugumira ohubonaabona (4:12–5:11).
5. Engohoba (5:12-14).
1
Obuheese
1 Ese Peetero omuhwenda wa Yesu Kurisito mbaŋandiihira enywe abaatu ba Hatonda, aba gatobola, abalugendwa mu hyalo hino era abasasaana mu byalo byʼe Pooto, e Galatiya, e Kapadokiya, Asiya nʼe Bbisiniya.
2 Ohuŋwa ahale nʼahale Hatonda Seefe mu humanya huhwe gabatobola ohuba babe, nʼabita mu Mwoyo Omutukuvu olu mwagondera Yesu Kurisito gabagwalaasa olwʼamafugi gage. Hatonda geyongere ohubaŋa ehisasabirisi nʼemiyaaya.
Esuubi lyʼobulamu obutaŋwaŋo
3 Abaatu beyaase Hatonda era Semwana ya Musengwa weefe Yesu Kurisito. Olwʼehyere hihye ehingi, gaatunoŋola nʼabita mu hulamuha hwa Yesu Kurisito. Hino hituleetera ohusuubira obulamu obutaŋwaŋo.
4 Era mulisuna omugabo ogwo ogutacuuhacuuha era ogutaŋwaŋo emirembe nʼemirembe ogu Hatonda gaababihira mwigulu.
5 Olwʼohufugiirira hwenywe, Hatonda abahuuma nʼobuŋangi wuwe ohwola olu alinunula ebiitu byosibyosi hu ludaalo olwʼekomerero.
6 Olwʼehyo musaŋalyenga bugali weene wayire muli hugada olwʼebigosi ebingi ebi muli ni nabyo ebyʼehiseera obuseera.
7 Ebigosi ebyo biboolaho ohulaga ti ohufugiirira hwenywe hwʼamazima. Ngʼolu basanuusa ezaabbu olwʼohwenda ohutusamo obucaafu, mwesi ohufugiirira hwenywe ohuhiraho ezaabbu omuŋendo huli nʼohugezesewa ko huŋangale. Ebyo ni biŋooye ko musune eŋono era babapaahe hu ludaalo olwʼekomerero olu Yesu aligoboleraho.
8 Wayire simumubonangaho, mumwenda era wayire simumubonaho esaawa yino muli nʼesangaalo bitiriifu bugali eritalomeha olwohuba mumufugiirira.
9 Ehyo hibaleetera ohunoŋoha era njʼehigendererwa hyʼohufugiirira hwenywe.
10 Abanaabbi babalomera ebiŋamba hu hisasabirisi hya Hatonda ehi gaali nʼaja hubaŋambira ohubanoŋola era bendulirisa bugali nʼobwegenderesa.
11 Ni bagesyaho ohutegeera embeera nʼebiseera ebi Omwoyo wa Kurisito gaali nʼabalengesa olu galoma hu hubonaabona hwa Kurisito nʼeŋono eribalimuŋa.
12 Hatonda galeetera abanaabbi abo ohutegeera baati ebi baali ni balomaho sibyali ni bija hubaŋo mu mulembe gwawe aye mu gwenywe. Ŋaahani abo abababuulira Amaŋuliro Amalaŋi, babuulira mu maani gʼOmwoyo Omutukuvu. Nʼabamalayika boosi begomba ohumanya ebiŋamba hu bunoŋosi buno.
Hatonda genda hube bagwalaafu
13 Olwʼehyo mwetegehe, mumanye ehiraŋi ehyohuhola era muŋuge emitwe jenywe, nʼesuubi lyenywe lyosiryosi libe hu hisasabirisi ehi Yesu Kurisito alibaŋambira nʼagobooye.
14 Ngʼabaana abagondi, mutagenderanga mu hwegomba ohubi ohu mwalinga ni nahwo ni muhiiri humanya hituufu.
15 Aye ngʼolu Hatonda owʼabalanga aŋuma hibi, mwesi mubenga bagwalaafu mu hiisi hiitu ehi muhola.
16 Olwohuba hyaŋandiihiwa hiiti, “Mube bagwalaafu ngʼolu ese ndi mwawufu.”
17 Ngʼolu muli ni Hatonda oyu mulanga muuti Bbaabba, oyo asalira hiisi muutu omusango nʼatehubbira, ŋaahani mumenye hu hyalo huno hyʼabalugendwa ni mumutya era ni mumanyire muuti sinje wenywe.
18 Olwohuba mumanyire bulaŋi weene muuti endiŋi eyi basasula siyabiitu ebiŋwaŋo hyʼefeeza oba ezaabbu aye gabanunula mu bulombolombo wabasehulu benywe.
19 Gabanunula olwʼamafugi ga Kurisito ali mu hifo hyʼetaama eyibulaho mbalo oba buleme wosiwosi. Era amafugi ago gabbeeyi.
20 Hatonda ko atonde ehyalo gaatobola Kurisito ohuba eŋongo hu lwenywe aye ohumuhwehula hibaayeŋo mu ndaalo jino ejʼekomerero.
21 Ohubita mu Kurisito, mwafugiirira Hatonda owamulamusa ngʼahena amuŋa obubbala era ohufugiirira nʼesuubi lyenywe biri mu Hatonda oyo.
22 Ngʼolu mwaŋulira ehibono hya Hatonda ehyʼamazima mwagonda mwafugiirira, Hatonda gabagwalaasa era mwasuna ohwenda ohwʼamazima. Olwʼehyo mwendanenga nʼomwoyo mulala.
23 Olwohuba ni mwanoŋoha mwafuuha baana ba Hatonda atafa era mwasuna obulamu obutaŋwaŋo ohubita mu hibono hihye.
24 Hyaŋandiihiwa hiiti,
“Abaatu bali hyʼenyaasi,
era nʼobuŋoono waawe
buli hyʼehimuli ehiŋotoha ehiseera buseera.
Enyaasi liŋotoha,
era nʼehimuli hyosi hiŋotoha nga higwa ŋaasi.
25 Aye ehibono hya Musengwa
hiribaŋo emirembe nʼemirembe.”
Era ehyo njʼehibono ehi bababuulira mwafugiirira.