109
Yʼomutangirisi wʼabembi. Ezabbuli ya Dawudi.
1 Hatonda wange oyu njumirya,
otaŋoleera huŋoleera,
2 olwohuba abahosi bʼebibi nʼabadulingi
bandomaho ebyakalebule.
3 Bandomaho ebibono ebyobucaayi
era banumba ni ŋaŋuma ehi kolire.
4 Bapayirisa wayire ese mbenda
era mbasabira.
5 Mu biraŋi ebi kola basasulamo bibi,
era mu muhago basasulamo bucaayi.
6 Musuneyo omuutu omuhosi wʼebibi amuŋayirise,
leha mulala hu balabe babe amulumirise.
7 Ni bamuŋira mu mbuga leha bamusalire omusango
era leha ebi asaba bibe bibi byereere.
8 Leha obulamu wuwe owohu hyalo huno wube wuupi,
era ehifo hihye bahiŋe omuutu owundi.
9 Abaana babe bafuuhe bafuubbi,
nʼomuhasi wuwe afuuhe namwandu.
10 Abaana babe balerengenga ni basungirisa
era bababbinge mu magunda gaawe.
11 Amubanja anyage byosibyosi ebi ali nabyo,
abagwira banyage byosibyosi ebi gaholerera.
12 Ŋaŋume amuŋambira ehisa
wayire ohulabirira abafuubbi aba galeha.
13 Olulyo lulwe lwosirwosi lusihiirihe
eŋume amuhebulira mu mulembe ogugobolaho.
14 Leha Musengwa ahebulire ebibi byʼabasehulu babe
era eŋume asoniŋa ehibi hya nyina.
15 Leha Musengwa ahebulirenga ebibi byawe hiisi hiseera,
ko ŋaŋume amuhebulira hu hyalo
16 olwohuba gaŋuma hisa,
gahiyaania abagadi nʼabaali mu wetaavu,
nʼabaŋuma suubi gabaleetera ohufa.
17 Gaŋomerwanga ohuŋwaba abandi, leha bimugobolere.
Sigendesanga bahye ekabi,
era leha yeesi aŋume hiraŋi.
18 Ohuŋwaba gahufuula hyambalo hihye,
hwamwingira mu mubiri hyʼamaaji,
hwamwingira hyʼamafuta mu magumba.
19 Leha ebiŋwabo bimweswanigirise hyʼehyambalo,
bibe hyʼomusibiro ni bimuhadire emirembe nʼemirembe.
20 Musengwa abasasule atyo abo abapayirisa,
abo abandomaho ebibi.
21 Aye Musengwa Omwene Buŋangi,
njeede ngʼolu wasuubisa olwohuba oli mulaŋi era wunyenda.
22 Ndi mugadi era ndi mu wetaavu
era omwoyo gwange guliho amabbwa.
23 Ndi hugota hyʼehisisigo hyʼegulo
basambulya hyʼesige.
24 Ekumbo jange jigondire olwʼohutalya,
nondire sigaaye magumba.
25 Ndi duho eyiri abo abapayirisa,
ni bambona basugusa emitwe jaawe.
26 Njeede Musengwa Hatonda wange
noŋole olwʼohwenda huhwo ohubitiirifu.
27 Leha bategeere baati Musengwa ndiiwe owuponisye.
28 Basobola ohuŋwaba,
aye ewe waapa ekabi ni banumba, leha baswale
aye ese omuŋeeresa wuwo saŋalye.
29 Abapayirisa bambale ehiswalo
era esoni jibambale hyʼehyambalo.
30 Nja hweyaase Musengwa nʼejanjaasi eryʼamaani,
nja humujumirya mu lwijuuye
31 olwohuba abeera abagadi
era abaŋonia abo ababasalira ogwʼohufa.