118
1 Mweyaase Musengwa olwohuba mulaŋi,
ohwenda huhwe hubitiirifu emirembe nʼemirembe.
2 Leha Abayisirayiri balome baati,
“Ohwenda huhwe hubitiirifu emirembe nʼemirembe.”
3 Leha abomu lulyo lwa Alooni balome baati,
“Ohwenda huhwe hubitiirifu emirembe nʼemirembe.”
4 Leha abo abatya Musengwa balome baati,
“Ohwenda huhwe hwʼemirembe nʼemirembe.”
5 Ni naali mu hanyigo,
neriririra Musengwa, gangobolamo, ganunula.
6 Musengwa ali ni neese, sinja hutya.
Omuutu obuutu aŋanga hukola hi?
7 Musengwa ali ni neese era njʼowunjeeda,
nja hubona Hatonda naŋangula abalabe bange.
8 Hiraŋi ohwesiga Musengwa,
ohuhira ohwesiga omuutu obuutu.
9 Hiraŋi ohwesiga Musengwa
ohuhira ohwesiga abahombe.
10 Amawanga gosigosi ganeswanigirisa
aye nabaŋangula hu lwʼamaani ga Musengwa.
11 Baneswanigirisa enjuyi josijosi
aye nabaŋangula hu lwʼamaani ga Musengwa.
12 Banjabuluhiraho hyʼenjuhi
ne basihiiriha oti hani masanja aga badanyireho omuliro,
aye nabaŋangula hu lwʼamaani ga Musengwa.
13 Baasindiha hinyumanyuma
era naali huupi hwehubbiraŋo
aye Musengwa ganjeeda.
14 Musengwa njʼamaani gange
era njʼolwembo lwange
era njʼomunoŋosi wange.
15 Enyembo ejʼesangaalo nʼobuŋangusi
jiŋwera mu weema jʼabagwalaafu ni baloma baati,
“Musengwa aholire ebyʼamaani.
16 Amaani ga Musengwa gatuleteeye ohuŋangula
era Musengwa oyo aholire ebyʼamaani.”
17 Sinja hufa ohutusaho nja husigala ni ndi mulamu
era ndomere abaatu ebi Musengwa aholire.
18 Musengwa gambonerehiise bugali
aye sigandehe hufa.
19 Munjigulireŋo emiryango ja Yekaalu omu bagwalaafu bengirira,
ningire neyaase Musengwa.
20 Guno njʼomulyango gwa Musengwa
omu bagwalaafu bengirira.
21 Nahweyaasenga olwohuba wangobolamo
era ofuuhire wunoŋosi wange.
22 Ebaale eri abatongoli baatala baati siraŋi
njʼeryafuuha ehulu eryʼomugaso.
23 Hino Musengwa njʼowahihola,
era hyesiimisa ohubona.
24 Luno njʼoludaalo olu Musengwa atuŋaaye,
leha husangaale era hulusaŋalihisyemo.
25 O Musengwa, tunoŋole.
O Musengwa, tuyeede huŋangule.
26 Ali nʼekabi oyo owuujira mu siina lya Musengwa.
Huja huhujumirya ni huli mu nyumba ya Musengwa.
27 Musengwa nje Hatonda,
atumulihisiiye enjase yiye.
Huhujumirya ni huŋambire esaga jʼemihindu,
ni hutiina ohwola hu hituuti.
28 Ndiiwe Hatonda wange era nahweyaasenga.
Ndiiwe Hatonda wange, nahuŋenga eŋono.
29 Mweyaase Musengwaolwohuba mulaŋi,
ohwenda huhwe hubitiirifu emirembe nʼemirembe.