38
Ezabbuli ya Dawudi.
1 O Musengwa, otanenya nʼoluŋire
oba ohumboneresa nʼehiruŋi.
2 Obusaale wuwo busimitire
era omuhono gugwo gukangavuuye.
3 Olwʼehiruŋi hihyo omubiri gwange gwalwala
era amagumba gange
ganafuŋire olwʼebibi byange.
4 Esoni jipinga olwʼebibi byange,
hyʼomugugu ogutasobola ohubbeda.
5 Olwʼobuŋubeebe wange
amabbwa gange gaŋunya ehibulu.
6 Nefudunga era fuuhire ehitagasa
siiba mu bulumi oludaalo lwosirwosi.
7 Omubiri gwange gwohyerera olwʼobulumi
era gapooye ndi huupi hufa.
8 Nyongobaaye era mbwagijihire
nerira olwʼenaku hu mwoyo.
9 O Musengwa, omanyire byosibyosi ebi peegaho
oŋulira ohubinda hwange.
10 Omwoyo gwange guhubbahubba nʼamaani gapoyeemo
era emoni jange sijihibona.
11 Abameeri bange sibasemberera olwʼamabbwa aga ndi ni nago,
nʼabaliranwa bange banesambire.
12 Abenda ohunjita baatega emitego, abanjendesa ohufa banesoomera
era hiisi hiseera baasalira ekwe.
13 Ndi hyʼomusiŋa ataŋulira
era hyʼoyo atasobola huloma.
14 Fuuhire hyʼomuutu ataŋulira
era atasobola hugobolamo.
15 O Musengwa, nesiga ndiiwe Musengwa Hatonda wange
oja hungobolamo.
16 Nahusunga ti, “Otaleha balabe bange husaŋalihisyaho
olwʼohugwa hwange.”
17 Ndi huupi hwefumuliraŋo,
ndi nʼobulumi wubitiirifu.
18 Naatula ebibi byange,
ebibi byange bindambya.
19 Abalabe bange bali mu bulamu obulaŋi
era abo abatanyenda aŋaŋuma hiitu, bangi.
20 Abo abasasula ehibi olwʼebiraŋi ebi kola
bangeya olwʼohwenda ohuhola ebiraŋi.
21 O Musengwa, otandehulira.
Otamba ŋaleeŋi, O Hatonda wange.
22 Yanguŋaho wunjeede O Musengwa,
Omunoŋosi wange.