Ebiitu ebi Yesu gahwehulira Yowaane
Ohuhwehula
Enyanjula
Ehitabo hino Ohuhwehula njʼehisembayo mu Ndagaano Epyaha. Era njʼehyasembayo nomu huŋandiiha. Yowaane owaali omuhwenda wa Yesu njʼowahiŋandiiha mu mwaha ogwʼecenda nʼetaanu oluvanyuma lwʼohusaaliwa hwa Kurisito (1:1). Era Yowaane omwene oyo njʼowaŋandiiha Amaŋuliro Amalaŋi nʼebbaluŋa endaayi nʼeyohubiri nʼeyohudatu eja Yowaane. Oyo njʼowaali omwegi wa Yesu omuhoda (Yow 13:23). Gaŋandiiha ehitabo hino nʼali hu hizinga Patimo eyi bamusidihira olwʼohubuulira Amaŋuliro Amalaŋi aga Yesu Kurisito (1:9).
Yowaane gaŋandiiha ebbaluŋa yino ohugumya abafugiirira Kurisito basigale ni bali besigwa eyiri Yesu Kurisito olwohuba ali huupi hugobola (1:3; 22:7). Gayiŋandiihira abafugiirira Kurisito ohuhirira erala ebibbubbu byʼabafugiirira Kurisito omusanvu (2-3). Yowaane omwene aloma ati ebi galoma byali bunaabbi (1:3). Ehitabo hino mu ngeri nyingi hifaananaho nʼebiri mu Ndagaano Ekayire (Zak 6:1-8; Ohuŋ 7-8). Ehitabo hino hiroma hu biŋamba hu komerero yʼehyalo, hu buŋangusi wa Yesu era abo abaja huŋangula baja huba ni Yesu emirembe nʼemirembe. Leha ehitabo hino hihulabule era hihene hihuleetere ohusuubira ti Yesu agobola mangu.
Ebiri mu hitabo hino mu buupi
1. Engeri eyi Yowaane gasuna obunaabbi buno (1:1–1:20)
2. Obuhwenda eyiri ebibbubbu omusanvu ebyʼabafugiirira Kurisito (1:1–3:22)
3. Obubonero musanvu (4:1–8:5) nʼamagwala musanvu (8:6–11:19)
4. Olutalo ŋagati wʼOmwana nʼogusota (12:1–14:20)
5. Ebibya omusanvu ebyʼobusungu wa Hatonda (15:1–16:18)
6. Hatonda aŋangula abalabe mwigulu (17:1–20:15)
7. Egulu nʼehyalo ehinyaaha (21:1–22:21)
1
Enyanjula
1 Hino njʼEhitabo hyʼebibono ebi Yesu Kurisito gahwehulira Yowaane. Hatonda gaŋa Yesu ebibono bino biŋange ohwola eri abaatu babe bamanye ebyali ni bija hubaŋo mu hiseera ehitali hya ŋale era Yesu gaatuma malayika eri Yowaane omuŋeeresa wuwe abimulomere.
2 Yowaane yeesi abiroosa byosibyosi ngʼolu gabibona era aŋandiiha obuhwenda buno obuŋwa eri Hatonda nʼebiitu byosibyosi ebi Yesu Kurisito gaamuhwehulira.
3 Gesiimire oyo anasomerenga abaatu ebibono bino ebyʼobunaabbi era besiimire abanabiŋulirenga baahena baabiŋamba mu mwoyo! Hiri hiityo olwohuba ehiseera hyʼohwolerera hwabyo hinatere ohwola.
Obuheese eri ebibbubbu omusanvu ebyʼabafugiirira
4 Ndiise Yowaane abaŋadiihira enywe abomu bibbubbu omusanvu ebyʼabafugiirira Kurisito ebiri mu twale lyʼAsiya. Hatonda owaaliŋo ohuŋwa ahale nahale, aliŋo hatyane era aja hubaŋo emirembe nʼemirembe, nʼali ŋalala nʼemyoyo omusanvu ejiri mu moni wʼetebe yiye eyʼobuŋugi,
5 ko ni Yesu Kurisito nasoswe mu hulamuha ohwa bosibosi, aloma ebituufu hu Hatonda era nga njʼomuŋugi ali nʼobuŋangi hu baatu bosibosi mu hyalo, babaŋambire ehisasabirisi era babaŋe emiyaaya. Eŋono nʼobuŋangi bibe eri Yesu Kurisito oyo atwenda obugali era owaatufiiririra gatunoŋola mu bibi byefe,
6 gaahena gatufuula abaatu babe era abaŋeeresa ba Semwana era Hatonda weefe, emirembe nʼemirembe. Amiina.
7 Ale ni mwetege!
Kurisito oyu mbalomera
ali mu ngira gaajira hu bireri.
Abaatu bosibosi
ni mulimo ni naabo abamufumita
banahamubone.
Era abaatu bangi mu hyalo
banahalire amasiga olwʼobuti.
Mu butuufu aŋabula hubadulinga
pohinahabe hiityo. Amiina.
8 Hatonda Musengwa aloma ati, “Ndiise Alufa nʼOmega, Omwene Buŋangi, owaaliŋo ohuŋwa ahale nahale era aliŋo hatyane era aja hubaŋo emirembe nʼemirembe.”
Yesu Kurisito abonehera Yowaane
9 Ese Yowaane mulebe yenywe era owahyenywe mu hubonaabona nʼohugumira oluŋetehe olu banamaani batutaayeho olwʼohufugiirira Yesu, nʼali hu hizinga ehi balanga baati Patimo, eyi bandanya olwʼohulomera abaatu ehibono hya Hatonda ko nʼebiitu byosibyosi ebi Yesu Kurisito gaakwehulira.
10 Lulala ni nali eyo, hu ludaalo lwa Musengwa, Omwoyo wa Hatonda ni gamaamiiye, naŋulira omuutu nʼalomera egongo wange, nʼejanjaasi eribbuhulya hyʼegwala.
11 Omwene janjaasi eryo nʼaloma ati, “Ŋandiiha mu hitabo ebi obona ohene obiŋeerese ebibbubbu omusanvu ebyʼabafugiirira, ehyʼEfeeso, ehyʼe Simiruna, ehyʼe Perugaamo, ehyʼe Siyatira, ehyʼe Sarudi, ehyʼe Filadelufiya, nʼehye Lawodiikiya.”
12 Ngʼaŋo cuuha mbone owaali nʼaloma ni nange. Ni nacuuha, nga mbona ebihondo byʼetaala musanvu ebi babbota mu zaabbu.
13 Era nga mbona nʼomuutu owaali nʼafaana hyʼOmwana wʼOmuutu. Omuutu oyo gaali gambaaye ehyambalo ehyolera erala ŋaasi hu magulu gage, era ni gewoŋire omusibiro ogufaana hyʼezaabbu mu hifuba, nʼebihondo byʼetaala omusanvu ni bimweswanigirihiise.
14 Omuutu oyo gaali nʼefiiri eryene ehosa ni lipepya hupepya hyʼamabaale gʼefula, nʼemoni jije ni jaaduha hyʼenjase yʼomuliro.
15 Amagulu gage gaali gamesya hyʼehyoma ehi omubboti ali hwohya mu muliro nʼejanjaasi lirye ni lifuga hyʼomwoluumo gwʼamaaji agʼomubando.
16 Mu muhono gugwe omulungi gaali aŋambire emunyeenye musanvu era mu munwa gugwe ni musobekereeyemo epiima eriho obwogi hu mbega jombi. Mu moni gaali gaduha hwaduha hyʼenjase yʼeryuba mu tungulwe.
17 Ni namubona nga ngwa mu moni jije, pola hyʼomufu. Ngʼaŋo niye gapambaho nʼomuhono gugwe omulungi gandoma ati, “Otatya, ndiise Mudaayi era Nakoma.
18 Ndiise omwene bulamu. Naali fuuye, aye bona ŋaahani ndi mulamu emirembe nʼemirembe! Era ndiise ali nʼobuŋangi obutusa omufu e magombe gaaba mulamu.
19 “Ale ŋaahani ŋandiiha ebi oweene, ebiriŋo hatyane nʼebiija ohubaŋo oluvanyuma.
20 Amahulu gʼemunyeenye omusanvu eji oweene mu muhono gwange omulungi ko nʼebihondo byʼetaala omusanvu ebi babbota mu zaabbu nga gano: Emunyeenye omusanvu njʼabatangirisi bʼebibbubbu omusanvu ebyʼabafugiirira, nʼebihondo ebyʼetaala omusanvu, njʼebibbubbu omusanvu ebyʼabafugiirira.”