7
Bata hu baatu 144,000 eraama ya Hatonda
1 Ebyo ni byaŋwa, ehiitu ehindi ehi nabona baali bamalayika bane ni bemereeye hiisi mulala hu mbega ene ejʼehyalo. Abamalayika abo baali batigaliiye hibuyaga owʼamaani aŋwera hu mbega ene ejʼehyalo atonoona biitu hu hyalo oba hu nyanja wayire ohubbwaga emisaala.
2 Naali keja nga mbona malayika owundi nʼaniinanina nʼaŋwera ewuŋwalyuba. Malayika oyo gaali nʼehiitu ehiriho eraama ya Hatonda omulamu. Ngʼalangirira nʼejanjaasi eryʼamaani nʼaloma nʼabamalayika bala abane aba baali ni baŋaaye obuŋangi owʼohuleeta ebiŋeriŋeeri hu hyalo nʼenyanja.
3 Ngʼabaloma ati, “Mutalehula hibuyaga ohwonoona ebiitu hu hyalo oba hu nyanja wayire ohubbwaga emisaala, ohwola olu hunahahene ohuta eraama ya Hatonda weefe mu weeni wʼabaŋeeresa babe.”
4 Ngʼaŋo pulira ni baloma baati omuŋendo gwʼabo aba bataho eraama ya Hatonda baali abaatu emitwalo ehumi nʼene nʼekumi ene, ohuŋwa mu biha byʼabaana ba Yisirayiri byosibyosi.
5 Aba bataho eraama ohuŋwa mu hiha hya Yuda baali abaatu omutwalo mulala nʼekumi ebiri.
Abomu hiha hya Lubbeeni abaatu omutwalo mulala nʼekumi ebiri,
abomu hiha hya Gaadi abaatu omutwalo mulala nʼekumi ebiri.
6 Abomu hiha hyʼAseri abaatu omutwalo mulala nʼekumi ebiri,
abomu hiha hya Nafutaali abaatu omutwalo mulala nʼekumi ebiri.
Abomu hiha hya Manase abaatu omutwalo mulala nʼekumi ebiri.
7 Abomu hiha hya Simyoni abaatu omutwalo mulala nʼekumi ebiri,
abomu hiha hya Leevi abaatu omutwalo mulala nʼekumi ebiri.
Abomu hiha hya Yisikaali abaatu omutwalo mulala nʼekumi ebiri,
8 abomu hiha hya Zebbulooni abaatu omutwalo mulala nʼekumi ebiri.
Abomu hiha hya Yosefu abaatu omutwalo mulala nʼekumi ebiri,
nʼabomu hiha hya Bbenjamini abaatu omutwalo mulala nʼekumi ebiri.
Ehiŋindi hyʼabaatu ba Hatonda mwigulu
9 Ebyo ni byaŋwa, naali keja nga mbona ehiŋindi hyʼabaatu aba omuutu ataŋanga hubala gahena. Abaatu abo baali bʼesibo joosi ni baŋwa mu hiisi hiha, olulimi, nʼegwanga hu hyalo. Ngʼabaatu abo bemeerera mu moni jʼetebe ya Hatonda eyʼobuŋugi, nomu moni ja Yesu ali mu hifo hyʼEtaama Etusaŋo Ebibi. Abaatu abo baali bambaaye ebyambalo ebihosa ohulaga ti bagwalaafu, era hiisi muutu nʼaŋambire olusaga lwʼomuhindu ngʼahabonero ahalaga esangaalo eri baali ni nalyo.
10 Nga bayaalira ŋalala ni baloma nʼejanjaasi eryʼamaani baati,
“O! Ewe Hatonda weefe,
ewe owihaaye hu tebe eyʼobuŋugi,
ni Yesu, ali mu hifo hyʼEtaama Etusaŋo Ebibi,
ndiinywe abeene hutuŋonola!”
11 Mu hiseera ehyo abamalayika bosibosi baali bemereeye ohweswanigirisa etebe yʼobuŋugi ŋalala nʼabasaaja bahulu amahumi abiri nʼabane ko nʼebiramu bira ebine. Nga bosibosi beyala ŋaasi mu moni wʼetebe yʼobuŋugi ohujumirya Hatonda.
12 Nga bayaalira ŋalala baati,
“Amiina.
Abaatu bajumirye, beyaase era baŋe
Hatonda weefe owʼamagesi era ali nʼobuŋangi
eŋono emirembe nʼemirembe Amiina!”
13 Ngʼaŋo mulala hu basaaja bahulu abiri nabane gambuusa ati, “Bano abambaaye ebyambalo ebihosa mbaba ani, era baŋwereeye ŋeena?”
14 Ngʼese mugobolamo ti, “Muhulu, ewe ndiiwe omanyire.” Nga niye gandoma ati, “Bano mbʼabaatu abaŋunuha baabita mu biseera ebigosi nʼohubonaabona ohwʼamaani mu hyalo, aba Yesu ali mu hifo hyʼEtaama Etusaŋo Ebibi googa obulamu waawe nʼamafugi gage gabatusaho ebibi gabagwalaasa.
15 Olwʼehyo,
“abaatu abo, banabenga mu moni ja Hatonda,
ni bamuŋeeresa mu Yekaalu yiye mu muusi nʼowiire.
Era Oyo owihaaye hu tebe eyʼobuŋugi,
anaabenga ni nabo nʼabahuuma eri ebiŋeeriŋeeri.
16 Olwʼehyo enjala nʼenduŋo sibinabalumenga
nʼomumwi sigunabohyenga,
wayire ehiitu ehindi hyosihyosi ohubohya,
17 Olwohuba, Yesu ali ŋatebe yʼobuŋugi
era ali mu hifo hyʼetaama Etusaŋo Ebibi,
anabalabirirenga.
Anabatangirirenga gabaŋira aŋali amaaji amalaŋi,
era Hatonda alibasabuusaho amasiga aga babaaye ni balira.”