EHITABO HYA
SAMWIRI
EHYOHUBIRI
Enyanjula
Ehitabo hya Samwiri ehyohubiri hyali hitabo hirala ehibba, ni hiri hiŋimbye ŋalala nʼehitabo hya Samwiri ehidaayi era ni bahiranga baati Samwiri. Ni bahicuusa mu Luyonaani nga ko biba bitabo bibiri. Ŋaŋuma amanyire owaŋandiiha ehitabo hya Samwiri ehidaayi nʼehyohubiri.
Ebitabo bino biŋa ebyafaayo ebiŋamba hu Yisirayiri oluvanyuma lwʼebiseera byʼabalamuzi era Samwiri njʼowajuha amafuta ohwabula abahabaha ba Yisirayiri ababiri abadaayi, Sawulo ni Dawudi.
Ehitabo hino hiijaŋo oluvanyuma lwʼohufa hwa habaha Sawulo era hiraga Habaha Dawudi ngʼolu gatagiha emyaha amahumi ane ejʼobuŋugi buwe. Dawudi gaali muhoda eyiri Hatonda, ne ehitabo hino sihihweha bibi bibye ebi gaahola. Dawudi genda Hatonda bugali era goola nʼohwenda ohumutongolera Yekaalu mu Yerusaalemu aye Hatonda sigamufugiirira huhihola. Ohutusaho Hatonda gamusuubisa ati mulala hu bejuhulu babe aja huba habaha emirembe nʼemirembe (2 Sam 7:8-16).
1
Dawudi aŋulira ebiŋamba hu hufa hwa Sawulo
1 Oluvanyuma lwʼohufa hwa Sawulo, Dawudi gagobola e Zikilagi nʼahenire ohuŋangula Abameleki ngʼamenya eyo endaalo ebiri.
2 Hu ludaalo olwohudatu yaaliyo omuutu owaŋwa mu kambi ya Sawulo ni gambaaye engoye enabuhi nʼefuuhe mu mutwe. Ni goola aŋa Dawudi gaali, ngʼahubba amafuha ohulaga ati amuŋa eŋono.
3 Nga Dawudi amubuusa ati, “Oŋwera ŋeena?”
Ngʼomusinde oyo amugobolamo ati, “Neyibire mu kambi yʼAbayisirayiri.”
4 Nga Dawudi amubuusa ati, “Byali biitye?”
Ngʼamugobolamo ati, “Eŋe lyefe lyadulumire mu lutalo era baatu bangi baafa. Era Sawulo nʼomusaani Yonasaani boosi bafiiramo.”
5 Nga Dawudi amubuusa ati, “Omanyire otye oti Sawulo nʼomusaani Yonasaani bafuuye?”
6 Ngʼomusinde oyo amugobolamo ati, “Naali hu lusozi Gilubboowa nʼabona Sawulo ni gediiye hu fumo lirye. Era nabona nʼabasirikale abʼAbafirisuuti abagendera hu bigaali nohu mbalaasi ni bamwolireho.
7 Ni gacuuha gambona, gananga nga mugobolamo ti, ‘Wanji.’ ”
8 Nga gambuusa ati, “Ndiiwe ani?”
Nga mugobolamo ti, “Ndi Mumeleki.”
9 Ngʼaŋo gandoma ati, “Nja ŋano wunjite! Banjohiseeho ebisago ebyʼamaani, sinja huŋona.”
10 Olwʼehyo negerera aŋa ali namwita olwohuba namanya ti ngʼolu aguuye ŋaasi sasobola huŋona. Namufiihula engule hu mutwe nʼehihomo ehyali hu muhono era mbebino musengwa yange.
11 Ngʼaŋo Dawudi nʼabasirikale babe nga banabula engoye jaawe.
12 Balira era basiiba ohuŋwa mu mugamba ohwola egulo olwa Sawulo nʼomusaani Yonasaani nohu lwʼeŋe lya Musengwa nohu lwʼAbayisirayiri abaali ni bafiiriiye mu lutalo.
13 Nga Dawudi abuusa omusinde oyo owaaja ohumulomera amaŋuliro ago ati, “Oŋwera ŋeena?”
Ngʼamugobolamo ati, “Ndi Mumeleki omwihasi womu gwanga liryo.”
14 Nga Dawudi amubuusa ati, “Lwahiina sotyeho ohusihiirisa oyu Musengwa gajuhaho amafuta?”
15 Nga Dawudi alanga mulala hu basirikale babe amuloma ati, “Mwite!” Ngʼomusinde oyo asoŋolayo epiima amuhenaŋo.
16 Dawudi galoma Omumeleki oyo ati, “Amafugi gago gabe hu ewe wamwene. Omunwa gugwo guhusaliiye omusango nʼolomire oti, ‘Neetire oyu Musengwa gajuhaho amafuta.’ ”
Dawudi geririgana hulwa Sawulo ni Yonasaani
17 Nga Dawudi gemba olwembo olwʼohweririgana oluŋamba hu Sawulo nʼomusaani Yonasaani.
18 Era galagira abaatu babe ohusomesa hiisi muutu mu Buyudaaya olwembo olwo. Gaaŋa olwembo olwo esiina ati, “Olwembo olwʼomubaso,” Era baluŋandiiha mu hitabo hya Yasari.
19 “Hu sozi ja Yisirayiri,
abatangirisi babo bafuuye!
Abasira beefe baguuye!
20 “Mutahiromera baatu bʼe Gaasi,
mutasalania maŋuliro ago mu nabiŋwera yʼAsikelooni,
mutaleetera bahaana Bafirisuuti ohusaŋalya,
abahaana bʼabatali bahomole ohusangaala.
21 “Enywe esozi jʼe Gilubboowa,
eŋume lume oba efula etonya,
oba endimiro jenywe ohwama ebibala,
olwohuba engabo yʼomusooli omusira bayonoona,
engabo ya Sawulo sibahiyiŋahaho mafuta gwomu mizayiti.
22 “Epiima ya Yonasaani yaali sesoboha,
epiima ya Sawulo yaali eŋuma hisa,
ni yiita abanamaani, ni yiita abalabe.
23 “Sawulo ni Yonasaani baali beŋunjisa era ni bali bahoda,
era baali ŋalala ni bahiiri balamu, baali ŋalala nomu hufa.
Bahuŋuhanga hya haŋungu,
era baali bʼamaani ohuhira epologoma.
24 “Abahaana bomu Yisirayiri mulire Sawulo
owabambasa engoye endaŋi
owabambasa ebihomo ebyʼezaabbu.
25 “Abasooli abasira baguuye babeetiiye mu lutalo,
Yonasaani agalamiriiye hu sozi.
26 “Kulira ewe Yonasaani, muganda yange, ngʼobaaye muhoda eyi ndi.
Obaaye wunyenda ehibitiiriye nʼohusinga ohwenda ohu muhasi gendamo wamwe oba omwana wuwe.
27 “Abasooli abʼamaani baguuye.
Ebisoosa byʼolutalo bisihiirihire.”