15
Abbusolomu ahola oluhwe hu semwana
1 Ehiseera ni hyabitaŋo nga Abbusolomu asunayo ehigaali nʼembalaasi nʼabasinde amahumi ataanu ohumutangiriramo.
2 Abbusolomu genyohanga mu mugamba, nga gemeerera hu ngira aŋali omulyango ogwingira mu hibuga. Hiisi muutu owatiinanga nʼesonga eyi genda habaha amuholereho, Abbusolomu gamulanganga ngʼamubuusa ati, “Oŋwera mu hibuga hi?” Omuutu oyo gamugobolangamo ati, “Ese omuŋeeresa wuwo pwera mu hiha hirebe ehya Yisirayiri.”
3 Ngʼaŋo Abbusolomu amuloma ati, “Esonga yiyo tuufu aye hibi nyo habaha ohuŋuma omuutu oyu atayeeŋo ohuyiŋulirisa.
4 Singa mbaaye ndiise omulamuzi, hiisi muutu owahaletirenga esonga yiye eyi ndi nahayimuholeraho ni tehubbira.”
5 Era olu muutu gendanga ohuhubba amafuha mu moni wuwe ohulaga ati amuŋa eŋono, sigahamuganyire. Aye geyunanga gamuŋamba hu muhono ngʼamugwa mu hifuba.
6 Abbusolomu gaholanga atyo hiisi muutu owatiinanga eyiri habaha ohumulamula. Era ngʼaŋamba emyoyo jʼAbayisirayiri.
7 Oluvanyuma lwʼemyaha ene, Abbusolomu galoma habaha ati, “Leha tiine e Kebbulooni noherese oweyamo wange obu neeyama eyiri Musengwa.
8 Ni naali e Gesuri mu Alaamu, neeyama ohujumirya Musengwa e Kebbulooni singa gangobosa e Yerusaalemu.”
9 Nga habaha amuloma ati, “Tiina miyaaya” Olwʼehyo gatiina e Kebbulooni.
10 Aye Abbusolomu ni goola e Kebbulooni, gatuma abahwenda mu ngiso ohutiina eyiri ebiha byosibyosi ebya Yisirayiri balome abaatu baati, “Ni muŋulira ejanjaasi lyʼegwala eryʼetaama emiigu, ngʼaŋo ni naaŋo muloma muuti, ‘Abbusolomu nje habaha era geehaye e Kebbulooni.’ ”
11 Abbusolomu gatiina nʼabasinde bibiri ngʼabageni ohuŋwa e Yerusaalemu ne sibamanya higendererwa hihye.
12 Era Abbusolomu ni gaali nʼaŋayo eŋongo, ngʼatumisa Akisofeeli ohuŋwa mu hibuga Giilo. Akisofeeli oyo, gaali mulala hu baŋi bʼamagesi ba Dawudi. Amangu ago, ngʼabaatu bangi bamweŋimbaho ngʼoluhwe luba lwʼamaani.
Dawudi geyiba
13 Ngʼaŋo eŋwayo omuhwenda owaaja galomera Dawudi ati, “Abayisirayiri bosibosi beŋimbire hu Abbusolomu mu luhwe lulwe.”
14 Nga Dawudi aloma abahungu babe bosibosi abaali mu Yerusaalemu ati, “Hwinyoheremo, hutagayaala. Hwanguŋeeho, singa hulwa ŋano sihuja huŋona Abbusolomu, efe nʼehibuga Yerusaalemu hija husihiiriha.”
15 Ngʼabahungu abo bamugobolamo baati, “Huli ŋalala ni neewe, hola ehi obona oti njʼehiraŋi.”
16 Nga habaha nʼabomu mago gage bosibosi basimbuha. Ne galeha abahasi babe abohutulo ehumi ohuhuuma olubiri.
17 Nga habaha asimbula nʼabaatu bosibosi batiina bameerera hu nyumba esembayo mu hibuga.
18 Ngʼaleha abahungu babe ohutangiramo. Ŋaaliŋo abasinde lukaaga ohuŋwa e Gaasi abatiina ni Dawudi ko nʼabahuumi babe bosibosi.
19 Nga Habaha Dawudi aloma Yitayi Omugiti era omutangirisi wʼabasooli ohuŋwa e Gaasi ati, “Lwahiina weesi oli hutiina ni neefe? Galuhayo obe ni habaha Abbusolomu olwohuba oli mugwira era ehyahutusa ewenywe hwendula aŋoneŋogome.
20 Wahahena ŋano ehiseera hitono, eŋuma songa egira walerenga ni neefe abatamanyire nʼeyi hutiina. Yagamayo nʼabalebe babo, Musengwa abalage ohwenda huhwe ohubitiirifu nʼowesigwa wuwe.”
21 Aye Yitayi ngʼagaluha mu habaha, ati, “Mu butuufu ngʼolu Musengwa ali njʼomwene bulamu era ni neewe musengwa yange nʼohiiri mulamu, hiisi eyi musengwa habaha wange onaabe, nʼolu hinaabe mu mafa, omuŋeeresa wuwo yeesi anaabe ni neewe.”
22 Nga Dawudi aloma Yitayi ati, “Ŋaŋuma wubi, yinyoheramo hutiine!” Nga Yitayi Omugiti nʼabasirikale babe bosibosi nʼabomu mago gaawe bosibosi batiina.
23 Abaatu ni babona habaha nʼabaatu babe ni batiina, balira bugali. Nga habaha nʼabaatu bosibosi aba gaali ni nabo basomoha ehiiho ehi balanga baati Kedulooni nga baluŋama mu lulafu.
24 Mu baatu abo mwalimo Zadooki nʼAbaleevi ni babbeedire Esanduuku eyʼEndagaano ya Hatonda. Nga bayitengeha ŋaasi, ngʼAbbiyasaali aŋaayo eŋongo. Aye Abaleevi sibabbeeda Sanduuku eyo nindi ohwola olu baatu bosibosi baŋwa mu hibuga.
25 Ngʼaŋo habaha aloma Zadooki ati, “Yagamya Esanduuku ya Hatonda mu hibuga Yerusaalemu. Musengwa nʼaba ni genda, alingobosa nʼagobolamo ohuyibona, nʼehifo hihye omu amenya.
26 Aye ni hiba ni hitamusangaasa, leha ahole hyosihyosi ehi abona ati hiraŋi eyi ali.”
27 Nga Habaha aloma Zadooki omusengi ati, “Oli muutu asalaŋo bulaŋi. Yagamayo mu hibuga miyaaya, tiina ni Ahimaazi omusaani wuwo ni Yonasaani omusaani wa Abbiyasaali. Yagama ni Abbiyasaali ko nʼabasaani benywe bombi.
28 Ese nja huba hu haabi aŋa basomohera ohutiina mu lulafu ni kumiriiye ohwola olu munahatumire obuhwenda.”
29 Nga Zadooki ni Abbiyasaali bagamya Esanduuku ya Hatonda mu Yerusaalemu era nga basigala eyo.
30 Ne Dawudi geyongera paka hu lusozi olwʼemisaala emizayiti era gatiinanga nʼalira ni gewihiriiye hu mutwe era nʼamagulu amereere agaŋumamo hiitu. Nʼabaali ni naye bosibosi batiinanga ni balira, ni bewihiriiye hu mitwe jaawe.
31 Nga ŋabaaŋo owalomera Dawudi ati, “Akisofeeli mulala hu behobeene ni Abbusolomu.” Nga Dawudi alomba ati, “O Musengwa, leha amagesi gʼAkisofeeli gaŋume mahulu.”
32 Dawudi ni goola hu mutwe gwʼolusozi aŋa bajumirihisyanga Hatonda, nga gagaanana ni Husaayi Omwaruki nʼehiganduula hihye ni hinabuhire era ni geŋahire efuuhe hu mutwe.
33 Nga Dawudi amuloma ati, “Oja humbeera mugugu nʼonatiine ni neese.
34 Aye singa wagamayo mu hibuga waloma Abbusolomu oti, ‘O habaha nja huba muŋeeresa wuwo ngʼolu mbaayenga ni peeresa lataawo,’ aŋo oja hunjeeda ohugotaania amagesi gʼAkisofeeli.
35 Abasengi ba Hatonda aba Zadooki ni Abbiyasaali baja hubaayo ni neewe. Obalomeranga hiisi ehi onabenga nʼoŋuliiye mu lubiri lwa habaha.
36 Abasaani baawe bombi: Ahimaazi omusaani wa Zadooki ni Yonasaani omusaani wa Abbiyasaali baali eyo ni nabo. Onaba nʼehi oŋuliiye hyosihyosi, batume eyi ndi.”
37 Nga Husaayi meeri ya Dawudi atiina mu hibuga Yerusaalemu, Abbusolomu ni gengira.