23
Ebibono bya Dawudi ebisembayo
1 Bino njʼebibono bya Dawudi ebisembayo:
“Bino mbʼebibono bya Dawudi omusaani wa Yese,
ebibono byʼomuutu oyu Owaŋamugulu Obugali gafuula owʼamaani,
omuutu oyu Hatonda wa Yakobbo gajuhaho amafuta,
omwembi wa Yisirayiri.
2 “Mwoyo wa Musengwa gandomeramo,
ebibono bibye byali hu lulimi lwange.”
3 Hatonda wa Yisirayiri galoma,
olwanda lwa Yisirayiri lwandoma luuti,
“Omuutu anaŋuga abaatu nʼatehubbira,
era gaŋugira mu hutya Hatonda,
4 aba hyʼeryuba eriŋa enjase mu mugamba,
ni huŋuma bireri
era hyʼobutangaafu obubaŋo efula ni yaahahya
obuleetera enyaasi ohumera.”
5 Era eyo njʼengeri eyi Hatonda aja huŋamo abomu lulyo lwange ekabi,
olwohuba gahola endagaano eyʼemirembe nʼemirembe ni neese,
endagaano eyitaja huŋwaŋo,
ehisuubiso ehi batali cuusamo.
Ehyo njʼehi peegaho era njʼobuŋangusi wange,
era mu butuufu Hatonda aja huhyoheresa.
6 Aye abo bosibosi abatatya Hatonda balibadanya hyʼamaŋwa,
aga batahumbaania nʼengalo.
7 Hiisi aŋamba hu maŋwa
ali nʼohutambisa ehyoma oba olunyago lwʼefumo,
aŋa bagahumbaanihisya, paŋa bagoohyera.
Abasooli ba Dawudi abʼamaani
8 Gano njʼamasiina gʼabasooli ba Dawudi abaali abʼamaani: omudaayi gaali nje Yosebbu Bbasebbeesi omusaani wa Takemooni, gaali mutangirisi wa badatu. Lulala gasoola nʼabalabe lunaana, gabeeta bosibosi hu ludaalo olwo nʼefumo lirye.
9 Owohubiri gaali nje Elyazaali omusaani wa Dodo ohuŋwa mu lulyo lwa Ahohi. Lulala, Abayisirayiri bosibosi baduluma olu baali ni bahumbeene ohusoosa Abafirisuuti aye Elyazaali ni Dawudi baguma basoola.
10 Gesinga geeta Abafirisuuti ohwola olu muhono gugwe gwademba gweriipa hu piima. Hu ludaalo olwo, Musengwa gabaŋa obuŋangusi owʼamaani. Abayisirayiri abaali ni badulumire, nga bagobola eyiri Elyazaali nga bahumbaania ebi Abafirisuuti abaali ni bafuuye baleha.
11 Owohudatu gaali nje Saama omusaani wa Age ohuŋwa e Harari. Lulala Abafirisuuti ni bahumbaanira e Leehi aŋaali endimiro yʼepindi, Abayisirayiri batya nga baduluma.
12 Aye Saama gesinga nga gemeerera ŋagati wʼendimiro yʼepindi gʼabulungula Abafirisuuti era Musengwa gaŋa Abayisirayiri obuŋangusi owʼamaani.
13 Lulala mu biseera byʼamakungula, abadatu hu bahulu amahumi adatu, baserengeta batiina eyiri Dawudi mu pungulu ŋaapi nʼehibuga Adulamu, ehibbubbu hyʼAbafirisuuti ni hitaaye amakanda mu hiiho ehi balanga baati Refayiimu.
14 Mu hiseera ehyo Dawudi gaali mu pungulu, Abafirisuuti ni baŋambire Bbeserekemu.
15 Dawudi gaŋemba ohunywa amaaji ngʼaloma ati, “Nahendire omuutu atiine gandetereho amaaji agʼohunywa ohuŋwa mu sobere eyiri ohuupi nʼomulyango ogwengira mu hibuga ehyʼe Bbeserekemu!”
16 Abasinde abo abʼamaani abadatu beŋagula babita mu Abafirisuuti, batiina badaŋa amaaji mu sobere aŋaapi nʼomulyango gwʼehibuga hyʼe Bbeserekemu, nga bagaŋirira Dawudi. Aye gagaana ohuganywa, gagajuha mwiroba ngʼeŋongo eyiri Musengwa.
17 Ngʼaloma ati, “O Musengwa, sipanga hunywa maaji gano. Ohuganywa, mba hyanyoye amafugi gʼabasinde bano abalyoŋire obulamu waawe ohugaja!” Era Dawudi sigaganywa.
Ebyo njʼebyobusira ebi basinde abo abʼamaani abadatu baahola.
18 Abbisaayi muganda ya Yowaabbu, abasaani ba Zeruyiya, gaali mutangirisi wʼabasinde abo Abʼamaani Adatu. Era lulala nʼatambisa efumo lirye, geeta abalabe bihumi bidatu. Era ehyo hyamufuula mututumufu hyʼabadatu bala.
19 Abbisaayi njʼowaali nʼasinga efuma mu basinde Adatu era njʼowaali omutangirisi waawe wayire nga sigaali nʼefuma hya Badatu.
20 Bbenaaya omusaani wa Yehoyaada ohuŋwa e Kabbuzeeli gaali musira. Geeta Abamowaabbu babiri abaali ni bahira amaani mu ŋe lyawe era lulala mu biseera ebyʼobuŋololohi obungi gabbinga epologoma yengira mwiroŋo ngʼayiita.
21 Lulala, geeta Omumisiri owaali omuŋoono. Wayire Omumisiri oyo gaali nʼefumo, Bbenaaya gamulumba nʼogubbiro ngʼamunyagulaho efumo nga amwita nʼefumo lirye eryene.
22 Ebyo njʼebyobusira ebi Bbenaaya omusaani wa Yehoyaada gahola. Yeesi gaali nʼefuma hya bala abʼamaani abadatu.
23 Gaali wʼeŋono ohusinga bosibosi adatu aye sigaali mulala hu Badatu bala. Era Dawudi gamufuula muhulu wʼabahuumi babe.
24 Mu basooli adatu pomwali: Asaheeli muganda ya Yowaabbu,
Eluhanani omusaani wa Dodo ohuŋwa e Bbeserekemu,
25 Saama ohuŋwa e Harodi,
ni Elika yeesi ohuŋwa e Harodi,
26 ni Helezi ohuŋwa e Peleti,
ni Yiira omusaani wa Yikesi owʼe Tekowa,
27 ni Abbiyezeeri ohuŋwa e Anasoosi, ni Mebbunaayi ohuŋwa e Huusa,
28 ni Zalumooni owʼe Ahowa,
ni Maharaayi ohuŋwa e Netofa
29 ni Helebbu omusaani wa Bbaana ohuŋwa e Netofa
ni Yitayi omusaani wa Ribbayi owʼe Gibbeya mu twale lyʼe Bbenjamini,
30 Bbenaaya owʼe Pirasoni,
ni Hidaayi ohuŋwa mu hiiho ehyʼe Gaasi,
31 ni Abbi Alibbooni owʼe Arabba,
ni Azumaveesi owʼe Bbahurimu,
32 Eliyaabba ohuŋwa e Salubbooni, abasaani ba Yaseni, Yonasaani,
33 omusaani wa Saama ohuŋwa e Harari, Ahiyaamu omusaani wa Sarari ohuŋwa e Harari,
34 Elifeleeti omusaani wa Ahasibbayi owʼe Maaka, ni Eliyaamu omusaani wa Akisofeeli ohuŋwa e Giilo,
35 Heziro ohuŋwa e Karumeeli, ni Paalayi ohuŋwa e Arabba,
36 ni Yigali omusaani wa Nasani ohuŋwa e Zoobba, ni Bbani ohuŋwa e Gaadi,
37 Zeleki Omwamooni, ni Naharayi ohuŋwa e Bbeerosi, owabbeedanga ebisoosa bya Yowaabbu omusaani wa Zeruyiya,
38 ni Yiira ohuŋwa e Yisiri, ni Garebbu ohuŋwa e Yisiri,
39 ko ni Wuriya Omuhiiti.
Bosibosi ŋalala baali adatu namusanvu.